Articles

ပြည်နယ်လူမှုရေးဝန်ကြီး၊ လားရှိုးပညာရေးကောလိပ်နှင့် လားရှိုးတက္ကသိုလ်များသို့ ကွင်းဆင်းစစ်ဆေး

တောင်ကြီး  စက်တင်ဘာ  ၀၂

 

1

 

   ပညာရေးဝန်ကြီးဌာန၊ ပညာရေးစီမံကိန်းနှင့် လေ့ကျင့်ရေးဦးစီးဌာနမှ လားရှိုးပညာရေးကောလိပ်အသစ်(တစ်)ကျောင်းအား ၂၀၁၃-ခုနှစ်၊ ဒီဇင်ဘာလတွင် သင်တန်းသား/သူ (၂၀၀)ဦးဖြင့် စတင်ဖွင့်လှစ် သင်ကြားနိုင်ရေး လျာထားသတ်မှတ် ဆောင်ရွက်လျက်ရှိရာတွင် လားရှိုးပညာရေးကောလိပ် အချိန်မှီ ဖွင့်လှစ်နိုင်ပါရန် အဆောက်အဦများ ကြိုတင်ပြင်ဆင် ဆောက်လုပ်လျက်ရှိသည့် အခြေအနေများကို (၂၈-၈-၂၀၁၃)ရက်နေ့တွင် ရှမ်းပြည်နယ်အစိုးရအဖွဲ့၊ ပြည်နယ်လူမှုရေးဝန်ကြီး ဒေါက်တာ မျိုးထွန်း၊ ပြည်နယ်လွှတ်တော်ကိုယ်စားလှယ်၊ လားရှိုးမဲဆန္ဒနယ် အမှတ်(၁)မှ ဦးစိုင်းကြူနှင့် အတူ ကွင်းဆင်းစစ်ဆေးကြည့်ရှုခဲ့သည်။

 

   ဆက်လက်ပြီး ကျောင်းအုပ်ကြီး ဦးစိုးသိန်းနှင့် အတူ ဝန်ကြီးဌာနမှ အိတ်ဖွင့်တင်ဒါ အောင်မြင်ခဲ့သည့် ကုမ္ပဏီ (၆)ခုမှ တာဝန်ရှိသူများက ဆောက်လုပ်လျက်ရှိသည့် အဆောက်အဦ အခြေအနေများကို လိုက်လံရှင်းလင်းပြသခဲ့ပြီး ပြည်နယ်လူမှုရေးဝန်ကြီး ဒေါက်တာ မျိုးထွန်းမှ သတ်မှတ်အရည်အသွေး ပြည့်မှီရေးကို အလေးထားဦးစားပေး ဆောက်လုပ်သွားကြရန် မှာကြားခဲ့သည်။

 

   ထို့နောက် လားရှိုးတက္ကသိုလ်၌ ပညာရေးဝန်ကြီးဌာန၏ အစီအစဉ်ဖြင့် ကုမ္ပဏီ (၂)ခုမှ ဆောက်လုပ်လျက်ရှိသော (၃)ထပ်စာသင်ဆောင် (၂)လုံး (၁၉၂' × ၃၈') သံကူကွန်ကရစ် (ရေမီး အပါအဝင်)တို့ကို သွားရောက် ကြည့်ရှုစစ်ဆေးခဲ့ကြောင်း သတင်းရရှိသည်။

 

ရှမ်းပြည်နယ်အစိုးရအဖွဲ့၊ တရုတ်နိုင်ငံ Hanergy Holding Group မှ Ms. Zhu Junfeng ( Senior Vice President ) ဦးဆောင်သော အဖွဲ့အား လက်ခံတွေ့ဆုံ

တောင်ကြီး  သြဂုတ်  ၃၀

 

1

 

ရှမ်းပြည်နယ်အစိုးရအဖွဲ့၊ ပြည်နယ်ဝန်ကြီးချုပ် ဦးစဝ်အောင်မြတ်သည် သြဂုတ်(၃၀)ရက်၊ နေ့လည်(၁)နာရီက ရှမ်းပြည်နယ်အစိုးရအဖွဲ့ရုံး၊ အစည်းအဝေးခန်းမ၌  တရုတ်နိုင်ငံ Hangery Holding Group  မှ Ms. Zhu Junfeng ( Senior Vice President )  ဦးဆောင်သော အဖွဲ့အား လက်ခံတွေ့ဆုံခဲ့သည်။

 

ထိုသို့ လက်ခံတွေ့ဆုံရာတွင် Hangery Holding Group မှ တည်ဆောက်မည့် အထက်သံလွင်၊ ကွမ်းလုံရေအားလျှပ်စစ်စီမံကိန်း အကောင်အထည်ဖော်နိုင်ရေးအတွက် လုပ်ငန်းစီမံကိန်းများကို ရှင်းလင်းတင်ပြပြီး စီမံကိန်းနှင့် စပ်လျဉ်း၍ ဆွေးနွေးညှိနှိုင်းမှုများ ပြုလုပ်ခဲ့သည်။

 

အဆိုပါ တွေ့ဆုံပွဲသို့ ပြည်နယ်ဝန်ကြီးချုပ်နှင့်အတူ ပြည်နယ်လုံခြုံရေးနှင့် နယ်စပ်ရေးရာဝန်ကြီး၊ ပြည်နယ်လျှပ်စစ်နှင့် စက်မှုလက်မှုဝန်ကြီး၊ အစိုးရအဖွဲ့ တာဝန်ရှိသူများ၊ ပြည်နယ်အဆင့် ဌာနဆိုင်ရာများ၊ Hangery Holding Group မှ Ms. Zhu Junfeng ဦးဆောင်သော အဖွဲ့ဝင်များ၊ Asia World Co.Ltd မှ တာဝန်ရှိသူများ တက်ရောက်ခဲ့ကြသည်။

 

ဒုတိယသမ္မတ ဒေါက်တာစိုင်းမောက်ခမ်း သိန္နီမြို့၌ ဒေသခံပြည်သူများနှင့် တွေ့ဆုံ ဒေသဖွံ့ဖြိုးရေး လုပ်ငန်းများဆောင်ရွက်

သြဂုတ် ၂၆

 

4

 

နိုင်ငံတော်ဒုတိယသမ္မတ ဒေါက်တာစိုင်းမောက်ခမ်းသည် သြဂုတ်(၂၆)ရက်၊ နံနက်ပိုင်း တွင် သိန္နီမြို့၊ အောင်မင်္ဂလာခန်းမ၌ပြုလုပ်သော ဒေသခံပြည်သူများနှင့် တွေ့ဆုံပွဲသို့ တက်ရောက်၍ အမှာစကားပြောကြားခဲ့သည်။ 

 

တွေ့ဆုံပွဲသို့ လွှတ်တော်ကိုယ်စားလှယ်များ၊  မြို့မိမြို့ဖများ၊ ဌာနဆိုင်ရာအကြီးအကဲများ၊ ယဉ်ကျေးမှုအဖွဲ့များ၊ လူမှုရေးအသင်းအဖွဲ့များ၊ ရပ်ကွက်/ ကျေးရွာအုပ်ချုပ်ရေးမှူးများ၊ ဖွံ့ဖြိုးတိုးတက်ရေးအထောက်အကူပြုကော်မတီတာဝန်ရှိသူများ တက်ရောက်ခဲ့ကြပြီး ဒေသခံ များ၏တင်ပြချက်များအပေါ်  လုပ်ငန်းဆိုင်ရာများကို ဒုတိယသမ္မတက ညှိနှိုင်းဖြည့်ဆည်း ဆောင်ရွက်ပေးခဲ့သည်။

 

ထို့နောက် ၂၀၁၂-၂၀၁၃ပညာသင်နှစ် တက္ကသိုလ်ဝင်စာမေးပွဲတွင် ထူးချွန်စွာအောင်မြင်ခဲ့ကြ သည့်ကျောင်းသား/သူများနှင့် အောင်မြင်ခဲ့ကြသည့်ကျောင်းသား/သူများကို ဂုဏ်ပြုဆုများ ပေးအပ်ခဲ့ကြသည်။ 

 

ဆက်လက်ပြီး ဒုတိယသမ္မတသည် ကွတ်ခိုင်မြို့လေယာဉ်ကွင်းဟောင်းကို သွားရောက်ကြည့်ရှု စစ်ဆေးရာ ပြည်နယ်ဝန်ကြီးချုပ်နှင့် တိုင်းမှူးတို့က ရှင်းလင်း တင်ပြကြသည်။

 

ထို့မှတစ်ဆင့် ဒုတိယသမ္မတသည် ကွတ်ခိုင်မြို့ပြည်ထောင်စုခန်းမ၌ပြုလုပ်သည့် ဒေသခံ ပြည်သူ များနှင့် တွေ့ဆုံပွဲသို့ တက်ရောက်အမှာစကားပြောကြားပြီး မြို့နယ်အုပ်ချုပ်ရေးမှူး နှင့် ဒေသခံ ပြည်သူများ၏တင်ပြချက်များအပေါ် ပေါင်းစပ်ညှိနှိုင်းဆောင်ရွက်ပေးခဲ့သည်။

 

ထို့နောက် ဒုတိယသမ္မတ၊ ပြည်ထောင်စုဝန်ကြီးများနှင့် ပြည်နယ်ဝန်ကြီးချုပ်တို့က တိုင်းရင်းသားယဉ်ကျေးမှုအဖွဲ့များ၊ ၂၀၁၂-၂၀၁၃ပညာသင်နှစ် တက္ကသိုလ်ဝင်စာမေးပွဲတွင် ထူးချွန်စွာအောင်မြင်ခဲ့ကြသည့်ကျောင်းသား/သူများအား ဂုဏ်ပြုဆုငွေများ ပေးအပ် ခဲ့ကြသည်။

 

ညပိုင်းတွင် ဒုတိယသမ္မတနှင့် အဖွဲ့ဝင်များအား လားရှိုးမြို့ရှမ်းတိုင်းရင်းသားစာပေနှင့် ယဉ်ကျေးမှုအဖွဲ့ရုံး၌ ရှမ်းပြည်နယ်အစိုးရအဖွဲ့က ညစာစားပွဲဖြင့် တည်းခင်းဧည့်ခံရာ တိုင်းရင်းသားရိုးရာယဉ်ကျေးမှုအကအဖွဲ့များက ဖျော်ဖြေတင်ဆက်ကြပြီး ယဉ်ကျေးမှု အဖွဲ့များ အား ဂုဏ်ပြုဆုငွေများ ပေးအပ်ခဲ့သည်။ 

 

ပြည်ထောင်စုသမ္မတမြန်မာနိုင်ငံတော် ဒုတိယသမ္မတ ဒေါက်တာစိုင်းမောက်ခမ်း ရှမ်းပြည်နယ်(မြောက်ပိုင်း)ဒေသဖွံ့ဖြိုးတိုးတက်ရေး ဖြည့်ဆည်းဆောင်ရွက်

သြဂုတ် ၂၅

 

3

 

ပြည်ထောင်စုသမ္မတမြန်မာနိုင်ငံတော် ဒုတိယသမ္မတ ဒေါက်တာစိုင်းမောက်ခမ်းသည် သြဂုတ်၂၅ ရက် နံနက်ပိုင်းတွင် ရှမ်းပြည်နယ်(မြောက်ပိုင်း)လားရှိုးခရိုင်၊ မီးသတ်ဦးစီးဌာန၌ ပြုလုပ်သော ရွှေသံလွင်မီဒီယာကုမ္ပဏီလီမီတက်မှ လှူဒါန်းသည့် မီးသတ်ယာဉ်(၅)စီး လွှဲပြောင်းပေးအပ်ပွဲသို့ တက်ရောက်ပြီး မီးသတ်ယာဉ်များအား ကြည့်ရှုစစ်ဆေးခဲ့သည်။ 

 

ဆက်လက်ပြီး ဒုတိယသမ္မတသည် လားရှိုးပြည်သူ့ဆေးရုံကြီး၌ပြုလုပ်သည့် ကွန်ပျူတာပုံရိပ် ဖေါ် ဓါတ်မှန်အဆောက်အဦဖွင့်ပွဲသို့ တက်ရောက်ခဲ့သည်။ အဆိုပါကွန်ပျူတာ ပုံရိပ်ဖေါ်ဓါတ်မှန် အဆောက်အဦအား ရှမ်းပြည်နယ်အစိုးရအဖွဲ့၊ ပြည်နယ်ဝန်ကြီးချုပ် ဦးစဝ်အောင်မြတ်၊ ကျန်းမာရေးဝန်ကြီးဌာန ဒုတိယဝန်ကြီး ဒေါက်တာသန်းအောင်နှင့် ပြည်နယ်လူမှုရေးဝန်ကြီး ဒေါက်တာမျိုးထွန်းတို့က ဖဲကြိုးဖြတ်ဖွင့်လှစ်ပေးခဲ့သည်။ 

 

ထို့နောက် ဒုတိယသမ္မတသည် လားရှိုးမြို့ ဆရာဝန်အသင်းတိုက်၌ ပြုလုပ်သည့် မြန်မာနိုင်ငံ ဆရာဝန်အသင်းအဆောက်အဦဖွင့်ပွဲသို့ တက်ရောက်ပြီး အသင်းဆိုင်းဘုတ်ကို စက်ခလုတ်နှိပ် ဖွင့်လှစ်ပေးသည်။ ယင်းနောက် အဆိုပါအဆောက်အဦခန်းမအတွင်း ဆရာဝန်အသင်းဝင်များ ကျန်းမာရေးဝန်ထမ်းများနှင့် တွေ့ဆုံအမှာစကားပြောကြားပြီး မြန်မာနိုင်ငံဆရာဝန်အသင်း (လားရှိုး)အတွက် အလှူငွေကျပ်သိန်း(၅၀၀)ကို အလှူရှင်ကိုယ်စား ပြည်နယ်ဝန်ကြီးချုပ်က ပေးအပ်လှူဒါန်းခဲ့သည်။

 

ယင်းနောက် မွန်းလွဲပိုင်းတွင် ဒုတိယသမ္မတသည် လားရှိုးမြို့၊ မြို့တော်ခန်းမ၌ပြုလုပ်သော ဒေသခံပြည်သူများနှင့်တွေ့ဆုံပွဲသို့ တက်ရောက်အမှာစကားပြောကြားပြီး ဒေသခံ ပြည်သူများ၏ တင်ပြချက်များအပေါ် ညှိနှိုင်းဆောင်ရွက်ပေးခဲ့သည်။ ထို့နောက် ဒုတိယသမ္မတ၊ ပြည်ထောင်စု ဝန်ကြီးများ၊ ပြည်နယ်ဝန်ကြီးချုပ်နှင့် ဒုတိယဝန်ကြီးများသည် ၂၀၁၂-၂၀၁၃ပညာသင်နှစ် တက္ကသိုလ်ဝင်စာမေးပွဲ၌ လားရှိုးစာစစ်ဌာနမှ ထူးချွန်စွာ အောင်မြင်ခဲ့ကြသူများအား ဂုဏ်ပြုဆု များပေးအပ်ခဲ့ကြသည်။

 

၄င်းနောက် ဒုတိယသမ္မတသည် မြို့နယ်စည်ပင်သာယာရေးအဖွဲ့ရုံး၌ ရေစီးရေလာကောင်းမွန် ရေးဆောင်ရွက်ထားရှိမှုနှင့်ပတ်သက်၍ တင်ပြချက်များအပေါ် ဆွေးနွေးဖြည့်ဆည်း ဆောင်ရွက်ပေးပြီး လားရှိုးမြို့ ရေစီးရေလာကောင်းမွန်ရေး ဆောင်ရွက်ထားရှိမှု အခြေအနေများကို လှည့်လည်ကြည့်ရှုစစ်ဆေးခဲ့သည်။

 

ညနေပိုင်းတွင် ဒုတိယသမ္မတမိသားစုနှင့် အဖွဲ့ဝင်များသည် ရန်တိုင်းအောင်ဆုတောင်းပြည့် မြို့ဦးစေတီ၌ ကပ်မိန်ကျောင်းတိုက်ဆရာတော်အမှုပြုသော ဆရာတော်၊ သံဃာတော်များ အား ဝါဆိုသင်္ကန်းဆပ်ကပ်လှူဒါန်း၍ စေတီတော်အား လှည့်လည်ဖူးမျှော်ကာ အလှူငွေများ ပေးအပ် လှူဒါန်းခဲ့သည်။

 

ထို့နောက် ဒုတိယသမ္မတသည် လားရှိုးမြို့၊ မြို့ရှောင်လမ်းအား လှည့်လည်ကြည့်ရှုစစ်ဆေးပြီး ရှမ်းတိုင်းရင်းသားစာပေနှင့် ယဉ်ကျေးမှုအဖွဲ့ရုံး၌ တိုင်းရင်းသားယဉ်ကျေးမှုအဖွဲ့များနှင့် တွေ့ဆုံပြီး ယဉ်ကျေးမှုအဖွဲ့များအား ဂုဏ်ပြုဆုငွေကျပ်သိန်း(၃၀၀)ပေးအပ်ခဲ့သည်။

 

Subcategories

မူလသို့

အစိုးရအဖွဲ့

သတင်းများ

ဆက်သွယ်ရန်

တိုင်းရင်းသား လူမျိုးများ

taung-yoeရှမ်းပြည်နယ်(တောင်ပိုင်း) တောင်ကြီး၊ ကလော(ဟဲဟိုး)၊ ရပ်စောက်နှင့် ညောင်ရွှေမြို့နယ်တို့တွင် အများဆုံး နေထိုင်ကြသည်။

We have 53 guests and no members online