ဒုတိယအကြိမ် CDMA 800MHz မိုဘိုင်းဖုန်းများ ရောင်းချမည့် စာရင်း

တောင်ကြီး   မေ   ၁၆

ရှမ်းပြည်နယ်အစိုးရအဖွဲ့ အတွင်းရေးမှူး ဒေသဖွံ့ဖြိုးရေး ကွင်းဆင်းဆောင်ရွက်

တောင်ကြီး  မေ  ၀၅

  မေ (၀၄)ရက်နေ့တွင် ရှမ်းပြည်နယ်အစိုးရအဖွဲ့ အတွင်းရေးမှူး ဦးရဲနိုင်အောင်မှ ကလောမြို့နယ်အတွင်းရှိ အောင်ပန်းမြို့၊ သီခေါင်ကျေးရွာအုပ်စုနှင့် ဘော်နင်းကျေးရွာအုပ်စုများသို့ ဒေသဖွံ့ဖြိုးရေးကွင်းဆင်းဆောင်ခဲ့ရာ ကလော မြို့နယ်အုပ်ချုပ်ရေးမှူး၊ မြို့နယ်စည်ပင်သာယာရေးအဖွဲ့ အမှုဆောင်အရာရှိ၊ မြို့ဟောင်းရပ်ကွက်နှင့် မင်္ဂလာရပ်ကွက်တို့မှ ရပ်ကွက်အုပ်ချုပ်ရေးမှူးတို့ လိုက်ပါလျက် ဒေသဖွံ့ဖြိုးရေးလုပ်ငန်းများ ဆောင်ရွက်ခဲ့သည်။

  ထို့နောက် (၀၉၄၅)အချိန်တွင် အောင်ပန်းမြို့၊ မြို့ဟောင်းရပ်ကွက်နှင့် မင်္ဂလာရပ်ကွက်ရှိ အိမ်ထောင်စု(၂၅၀)ကို စည်ပင်သာယာရေးအဖွဲ့ပိုင် ရေသယ်ယာဉ်ဖြင့် ရေဂါလန်(၃၂၀၀)အား ရေပေးဝေနေမှုကို ကွင်းဆင်းစစ်ဆေးပါသည်။

     ဆက်လက်ပြီး (၁၂၀၀)အချိန်တွင် သီခေါင်ကျေးရွာအုပ်စုအတွင်း အင်းခေါင်းရေထွက်သို့ သွားရောက်ကြည့်ရှုပြီး ပတ်ဝန်းကျင်ရှိ သစ်တောများအား ထိန်းသိမ်းဆောင်ရွက်သွားရန် မှာကြားခဲ့ပြီး၊ (၁၂၃၀)အချိန်တွင် ဟဲဟိုး−ဘော်နင်းလမ်းတံတား အမှတ်(၂/၂) တည်ဆောက်နေမှုအခြေအနေကို ကွင်းဆင်းကြည့်ရှုခဲ့ပြီး ဒေသခံတောင်သူများ တင်ပြချက်အပေါ် တံတားတည်ဆောက်ရေး အထူးအဖွဲ့(၄)မှ ဒုတိယအင်ဂျင်နီယာမှူးကြီး ဦးဝင်းထွဋ်နှင့် အငယ်တန်းအင်ဂျင်နီယာ ဦးဝေဖြိုးတို့နှင့် တွေ့ဆုံညှိနှိုင်းဆွေးနွေးမှုများ ဆောင်ရွက်ခဲ့သည်။

ဟဲဟိုး - မိုင်းဆတ် ခရီးစဉ်အတိုင်း ပျံသန်းလာသော မြန်မာ့လေကြောင်း ဆင်းသက်စဉ် ဘရိတ်ပိုင်းဆိုင်ရာ ချို့ယွင်းမှုဖြစ်ပွား

တောင်ကြီး   မေ   ၁၆

     မေ ၁၆ (၁၁၅၅)အချိန်ခန့်တွင် လေယာဉ်မှူးကြီး ဦမောင်မောင်စိုး မောင်းနှင်ပြီး ခရီးသည် (၅၅)ဦးတင်ဆောင်၍ ဟဲဟိုး - မိုင်းဆတ် ခရီးစဉ်အတိုင်း ပျံသန်းလာသော မြန်မာ့လေကြောင်းပိုင် XY- AIQ, MA 60 ခရီးစဉ်အမှတ် (၆၄၅)လေယာဉ်သည် မိုင်းဆတ်လေဆိပ် ခန့်မှန်မြေပုံညွှန်း (NC-201300)လေယာဉ်ပြေးလမ်းပေါ် ဆင်းသက်စဉ် ဘရိတ်ပိုင်းဆိုင်ရာ ချို့ယွင်းပြီး ပြေးလမ်းထိပ် ပေ(၃၀၀)ခန့်အကွာရောက်ရှိ ရပ်တန့်သွားခဲ့သည်။

   အဆိုပါဖြစ်စဉ်တွင် လေယာဉ်တွင်ပါရှိသော ခရီးသည်များအနက် ဒေါ်နန်းမြင့်အေး၊ အသက် (၆၇)နှစ်(ဘ)ဦးအိုက်ကြူး၊  ၁၃/မဆန(နိုင်)၀၀၂၈၅၂၊ ရှမ်း/ဗုဒ္ဓ၊ မြို့သစ်ရပ်၊ မိုင်းဆတ်မြို့နေသူသည် ဝဲပခုံးအဆစ်လွှဲ(မစိုးရိမ်ရ)နှင့် ဒေါ်နွေဦးမော်၊ (သ)၂၈နှစ်၊ (ဘ)ဦးဝင်း၊ စျေးရောင်း၊ မယ်ဆွမ်မြောက်ရပ်၊ မိုင်းဆတ်မြို့နေသူသည် ခါးရိုးကျိုး(မစိုးရိမ်ရ)အသီးသီးဒဏ်ရာများရရှိခဲ့ရာ ဒေါ်နန်းမြင့်အေးအား(၁၁/၁၀၀) တပ်မတော်ဆေးရုံသို့လည်းကောင်း၊ ဒေါ်နွေဦးမော်အား မိုင်းဆတ်ပြည်သူ့ဆေးရုံသို့လည်းကောင်း အသီးသီးတင်ပို့ကုသစေခဲ့သည်။

    ၎င်းလေယာဉ်သည် ဝဲဘက်တောင်ပံကျိုး၊ ဝဲဘက်ဘီးနောက်သို့ ခေါက်ဝင်၊ ဝဲဘက် ပန်ကာကျိုးသွားကြောင်း သိရှိရပါသည်။

ကလောမြို့ မိုးသည်းထန်စွာရွာသွန်းပြီး လေပြင်းတိုက်ခတ်မှု ဖြစ်ပွား

တောင်ကြီး  မေ  ၀၅

   မေ (၀၂)ရက်နေ့(၀၁၃၀)တွင် ကလောမြို့ အနောက်ဘက်(၁၈)မိုင်ခန့်အကွာရှိ ရွှေမင်းဖုန်းအုပ်စု၊ ရွှေတော(ကေစီ−၄၀၉၈၈၃၂၁)ရှိ အာရှကမ္ဘာမြေစက်မှုနှင့် သတ္တုတူးဖော်ရေး ရွှေလုပ်ကွက် ပတ်ဝန်းကျင်အနီးတွင် မိုးသည်းထန်စွာရွာသွန်းပြီး လေပြင်းတိုက်ခတ်ခဲ့သဖြင့် နေအိမ်များ သစ်ပင်ပိရာမှ ဝန်ထမ်းအလုပ်သမား၊ အရပ်သား စုစုပေါင်း(၈)ဦး သေဆုံးပြီး၊ (၃)ဦးထိခိုက်ဒဏ်ရာ ရရှိခဲ့သည်။

    အဆိုပါ မိုးသည်းထန်စွာရွာသွန်းပြီး လေပြင်းတိုက်ခတ်မှု ဖြစ်စဉ်ကြောင့် သစ်ပင်ပိသေဆုံးသူ(၁)ဦး၊ အင်းအတွင်းပိတ်မိသေဆုံးသူ(၅)ဦးတို့၏ အလောင်းများကို ထပ်မံဖော်ထုတ်နိုင်ခဲ့ပြီး အင်းအတွင်း ပိတ်မိပျောက်ဆုံးနေသူ (၂)ဦးရှိနေကြောင်း သိရှိရပါသည်။ လေပြင်းတိုက်ခတ်မှုနှင့် မိုးသည်းထန်စွာရွာသွန်းမှုကြောင့် အာရှကမ္ဘာမြေစက်မှုနှင့် သတ္တုတူးဖော်ရေး ရွှေလုပ်ကွက်ပတ်ဝန်းကျင်၌ သေဆုံးသူစုစုပေါင်း(၁၄)ဦးနှင့် အင်းအတွင်း ပိတ်မိပျောက်ဆုံးနေသူ (၂)ဦးရှိကြောင်း သတင်းရရှိသည်။

ပြည်နယ်ဝန်ကြီး ဦးအောင်ကျော်ညွှန့်၊ သမဝါယမလုပ်ငန်းများ ဖွံ့ဖြိုးတိုးတက်ရေးအဖွဲ့ ညှိနှိုင်းအစည်းအဝေးကျင်းပ

တောင်ကြီး   မေ   ၁၀

   မေလ(၉/၁ဝ)ရက်နေ့များတွင် ရှမ်းပြည်နယ်သမဝါယမဦးစီးဌာနရုံးခန်း၌ ကျင်းပသော ရှမ်းပြည်နယ်ကျေးလက်ဒေသဖွံ့ဖြိုးရေး၊ ဆင်းရဲမှုလျော့ချရေးနှင့် သမဝါယမလုပ်ငန်းများ ဖွံ့ဖြိုးတိုးတက်ရေးအဖွဲ့ အစည်းအဝေးကို ရှမ်းပြည်နယ်အစိုးရအဖွဲ့၊ စီးပွားရေးနှင့် စီမံကိန်း ဝန်ကြီး၊ သမဝါယမလုပ်ငန်းများ ဖွံ့ဖြိုးတိုးတက်ရေးအဖွဲ့ ဥက္ကဌ ဦးအောင်ကျော်ညွှန့်နှင့် အဖွဲ့ဝင်များ တက်ရောက်ကြသည်။

    အစည်းအဝေးတွင် ပြည်နယ်ဝန်ကြီး ဦးအောင်ကျော်ညွှန့်မှ သမဝါယမလုပ်ငန်းများ ဖွံ့ဖြိုးတိုးတက်ရေး ဆောင်ရွက်ရာတွင် အဖွဲ့ဝင်များမှ နယ်မြေအလိုက် ကြပ်မတ်ဆောင်ရွက်ရန်လိုကြောင်း၊ အဖွဲ့၏ ရည်ရွယ်ချက်ဖြစ်သော ဆင်းရဲမှုလျော့ချရေးအတွက် တောင်သူလယ်သမား၊ ဆင်းရဲသားများ၊ ပြည်သူများ အရင်းအနှီးရရှိရေးအတွက် ချေးငွေ ချေးပေးရန်လိုကြောင်း၊ ရှမ်းပြည်နယ်အစိုးရအဖွဲ့မှ ထုတ်ချေးငွေကျပ်သိန်း(၅၁ဝဝ)အား သမဝါယမလုပ်ငန်းများ ဖွံ့ဖြိုးတိုးတက်ရေးအဖွဲ့မှ ရယူ၍ ထုတ်ချေးပေးသွားမည်ဖြစ်ကြောင်း၊ အဖွဲ့တွင် ပါဝင်သည့် အဖွဲ့ဝင်(၁၄)ဦးတို့မှ တာဝန်ယူ/ တာဝန်ခံ ဆောင်ရွက်ရမည်ဖြစ်ကြောင်း၊ ထုတ်ချေးရာတွင် ထုတ်ချေးမည့် မြို့နယ်အသင်းများအား ပြည်နယ်သမဝါယမဦးစီးဌာန၊ ရှမ်းပြည်နယ် သမဝါယမအသင်းစုချုပ်များ အပါအဝင် အဖွဲ့ဝင်များက ညှိနှိုင်းစိစစ်၍ သမဝါယမလုပ်ငန်းများ ဖွံ့ဖြိုးတိုးတက်ရေး အဖွဲ့အစည်းအဝေးတွင် တင်ပြပြီး အဖွဲ့၏ ဆုံးဖြတ်သဘောတူညီချက်ဖြင့် ဆောင်ရွက်သွားရန်ဖြစ်ကြောင်း လမ်းညွှန်မှာကြား ခဲ့ပါသည်။

    အစည်းအဝေးဆုံးဖြတ်ချက်အရ ရှမ်းပြည်နယ်အတွင်းရှိ မြို့နယ်(၂၂)မြို့နယ်မှ အခြေခံ သမဝါယမအသင်း (၉၅)သင်းသို့ ကျပ်သိန်း(၅၁ဝဝ)အား ထုတ်ချေးရန် ဆုံးဖြတ်ခဲ့ကြပါသည်။ ရှမ်းပြည်နယ်အတွင်း အခြေခံသမဝါယမအသင်းပေါင်း (၉၃၅)သင်း ဖွဲ့စည်းထားပြီး ၂ဝ၁၃ ခုနှစ်၊ မေလအထိ ထုတ်ချေးငွေ စုစုပေါင်းမှာ ကျပ်သိန်းပေါင်း (၃၃ဝဝဝ)ကျော်ထုတ်ချေးထားပြီးဖြစ်ပါသည်။

လားရှိုးမြို့မဈေး တစ်ဝိုက်လမ်းပိတ်ဆို့မှု ရှင်းလင်းဆောင်ရွက်

တောင်ကြီး   မေ  ၀၅

   ရှမ်းပြည်နယ်စည်ပင်သာယာရေးအဖွဲ့ရုံးခွဲ(လားရှိုး)မှ ဒုတိယညွှန်ကြားရေးမှူး၊ လားရှိုးမြို့နယ်စည်ပင်သာယာရေးအဖွဲ့ ခေတ္တအမှုဆောင်အရာရှိ၊ အင်ဂျင်နီယာမှူး၊ မြန်မာနိုင်ငံရဲတပ်ဖွဲ့၊ ယာဉ်စည်းကမ်းလမ်းစည်းကမ်းထိန်းသိမ်းရေးအဖွဲ့နှင့် မြို့မဈေး အကျိုးတော်ဆောင်အဖွဲ့တို့ ပါဝင်သောအဖွဲ့သည် (၂၉-၄-၂၀၁၃)ရက်နေ့တွင် လားရှိုးမြို့မဈေးသို့ ကွင်းဆင်း၍ မြို့မဈေးပတ်လည်ရှိ သိန်းနီလမ်းနှင့် ဗိုလ်ချုပ်လမ်း တို့တွင် မော်တော်ယာဉ်နှင့် ဆိုင်ကယ်များ နှစ်ထပ်ရပ်တန့်မှု မရှိစေရေး၊ မြို့မဈေး ပတ်လည်ရှိ လမ်းဘေး၊ ပလက်ဖောင်းများပေါ်တွင်ကျူးကျော်မှုဈေးသည်များ ရောင်းချမှု မရှိစေရေး အောက်ပါအတိုင်း ဆောင်ရွက်ခဲ့ပါသည်-

    (က)    မြို့မဈေး သိန်းနီလမ်းရှိ ဆိုင်ကယ်ရပ်နားစခန်းတွင် ရပ်နားလျက်ရှိသော မော်တော်ယဉ်များအား ယာဉ်ကြောပိတ်ဆို့မှုမရှိစေရေးအတွက် လမ်းဘေး တွင် ရောင်းချလျက်ရှိသော ခေါင်းရွက်ဗျက်ထိုးဈေးသည်များအား ရှင်းလင်းခြင်း၊

    ( ခ)    မြို့မဈေး သိန်းနီလမ်းနှင့် ဗိုလ်ချုပ်လမ်းထောင့်ရှိ သစ်သီးအရောင်းဆိုင်  (၄)ဆိုင်မှ မူလလမ်းပေါ်သို့ ကျူးကျော်ခင်းကျင်း ရောင်းချခြင်းအား ရှင်းလင်းခြင်း၊

    ( ဂ)    မြို့မဈေး ဗိုလ်ချုပ်လမ်းရှိ မြို့မဈေးဘယ်ဘက်ခြမ်းတွင် ဆိုင်ကယ်(၂)ထပ် ရပ်နားသည့် နေရာအား (၁)ထပ်သာရပ်တန့်ရေးရှင်းလင်းခြင်း၊

    ယာဉ်ကြောပိတ်ဆို့မှုများဖြစ်ပွားရာ မြို့မဈေးပတ်လည်ရှိ လမ်းများဖြစ်သည့် သိန်းနီလမ်း၊ ဗိုလ်ချုပ်လမ်း၊ ဟံသာဝတီလမ်း၊ လမ်းမတော်လမ်းတို့အား ရေစီး ရေလာကောင်းမွန်ရေးနှင့် သန့်ရှင်းသာယာလှပရေးအတွက် (၁-၅-၂၀၁၃)ရက်နေ့ တွင် ရေမြောင်းများ ဆယ်ယူခြင်း၊ သန့်ရှင်းရေးများ ပြုလုပ်ခြင်းများ ဆောင်ရွက်ပါသည်။

     အဆိုပါ လမ်းများပေါ်တွင် ကျူးကျော်ရောင်းချနေသော သစ်သီးသည်များအား မြို့မဈေး ရွှေကံ့ကော်ရုံအပေါ်ထပ်သို့ ပြောင်းရွှေ့ရောင်းချရန် လားရှိုးမြို့နယ်စည်ပင် သာယာရေးအဖွဲ့ အမှုဆောင်အရာရှိ ဦးသက်ပိုင်နှင့် တာဝန်ခံအင်ဂျင်နီယာ ဦးဝင်းမင်းလတ်တို့မှ ဈေးမိ/ဈေးဖများ၊ ဈေးကော်မတီ၊ ဈေးသူ/ဈေးသားများနှင့် ညှိနှိုင်းထားရှိပြီး စည်းကမ်းတကျ ရှင်းလင်းဆောင်ရွက်ကြပါသည်။

ပြည်နယ်မိခင်နှင့်ကလေး စောင့်ရှောက်မှုကြီးကြပ်ရေးအဖွဲ့ နာယက ဒေါ်ဖြူဖြူညွန့် ခြေလေးချောင်းနှင့် ထူးဆန်းစွာ မွေးဖွားလာသည့် ကလေးငယ်အား သွားရောက်ကြည့်ရှုအားပေး

တောင်ကြီး    မေ    ၁၀

   ရှမ်းပြည်နယ် မိခင်နှင့်ကလေးစောင့်ရှောက်မှု ကြီးကြပ်ရေးအဖွဲ့နာယက ပြည်နယ်ဝန်ကြီးချုပ်၏ ဇနီး ဒေါ်ဖြူဖြူညွန့်သည် မေ(၁၀)ရက် ညနေ(၄)နာရီတွင် တောင်ကြီးမြို့ အမျိုးသမီးနှင့် ကလေးဆေးရုံကြီး၌ ကုသမှုခံယူရန်အတွက် ရောက်ရှိနေသော ခြေလေးချောင်းနှင့် ထူးဆန်းစွာမွေးဖွားလာသည့် ကလေးငယ်နှင့် မိဘတို့အား သွားရောက်ကြည့်ရှုအားပေးစကားပြောကြားပြီး ထောက်ပံ့ငွေများပေးအပ်ခဲ့သည်။

  ဆက်လက်ပြီး ပြည်နယ်မိခင်နှင့် ကလေးစောင့်ရှောက်မှုကြီးကြပ်ရေးအဖွဲ့ နာယကဒေါ်ဖြူဖြူညွန့် နှင့်အဖွဲ့ဝင်များသည် ဆေးရုံအတွင်း တက်ရောက်ကုသမှုခံယူနေသော မိခင်များနှင့်မွေးကင်းစကလေးများကို လိုက်လံကြည့်ရှုအားပေးစကားပြောကြားပြီး ထောက်ပံ့ငွေပေးအပ်ရာ ဆေးရုံတာဝန်ရှိသူတစ်ဦးမှ လက်ခံရယူ ခဲ့သည်။

    အဆိုပါ ခြေလေးချောင်းနှင့် မအင်္ဂါနှစ်ခုဖြင့် ထူးဆန်းစွာမွေးဖွားလာသော ကလေးငယ်အား ရှမ်း တိုင်းရင်းသား မိဘများဖြစ်ကြသော ဖခင် ခွန်စံတွေး အသက်(၄၀)နှစ်၊ မိခင် နန်းနောင့်နောင့် အသက်(၂၆)နှစ် တို့မှ (၂.၂.၂၀၁၃) ရက်နေ့ နံနက်(၃)နာရီအချိန်တွင် လွိုင်လင်ခရိုင်၊ ပင်လုံမြို့နယ်၊ စလောင်းကျေးရွာအုပ်စု၊ လွယ်မွတ် ကျေးရွာနေအိမ်၌ မွေးဖွားခဲ့ခြင်းဖြစ်ပြီး ယခုတောင်ကြီးမြို့ အမျိုးသမီးနှင့် ကလေးဆေးရုံကြီးသို့ (၉.၅.၂၀၁၃) ရက်နေ့ည ( ၉ )နာရီအချိန်တွင် ရောက်ရှိလာခြင်းဖြစ်သည်။

   ဆေးရုံသို့ရောက်ရှိလာသည့် အချိန်မှစတင်၍ ဆေးရုံအုပ်ကြီး ဒေါက်တာ ဒေါ်သိင်္ဂီညွန့်၏ ကြီးကြပ်မှုဖြင့် ကလေးအထူးကုဆရာဝန်ကြီး ဒေါက်တာခင်မို့မို့ မှ လိုအပ်သည့် ပြုစုစောင့်ရှောက်ကုသမှု များကို ဆောင်ရွက်ပေးထားလျှက်ရှိပြီး ကျန်းမာရေးဝန်ကြီးဌာန၊ ပြည်ထောင်စုဝန်ကြီးနှင့် ရှမ်းပြည်နယ် ဝန်ကြီးချုပ်တို့၏ လမ်းညွှန်မှုဖြင့် လိုအပ်သည်များကို ဆက်လက်ဆောင်ရွက်သွားမည်ဖြစ်ကြောင်း သတင်း ရရှိသည်။

လားရှိုးမြို့တွင် သောက်သုံးရေ ပြတ်လပ်မှု မရှိစေရေး ရေပေးဝေလျက်ရှိ

တောင်ကြီး   မေ   ၀၅

လားရှိုးမြို့ပေါ်ရှိ ရပ်ကွက်များတွင် ရေတွင်းရေကန်များခမ်းခြောက်လာ သဖြင့် လားရှိုးမြို့ ပြည်သူများ သောက်သုံးရေ ရှားပါးမှု အခက်အခဲများဖြင့် ကြုံတွေ့လျက်ရှိကြောင်း “(၂၄-၄-၂၀၁၃) ရက်နေ့ Shan New သတင်းနှင့် (၂၅-၄-၂၀၁၃) ရက်နေ့ DVB ရုပ်သံသတင်း”တွင် ဖော်ပြထားကြောင်း တွေ့ရှိရပါသည်။

လားရှိုးမြို့နယ်စည်ပင်သာယာရေးအဖွဲ့မှ     လားရှိုးမြို့နေ ပြည်သူလူထုအတွက် အောက်ဖော်ပြပါအတိုင်း ရေပေးဝေဆောင်ရွက်လျက်ရှိပါသည်-

     (က)    ရေကန်တောင်ရေပေးဝေရေးတွင် ရေသိုလှောင်မှု ပမာဏမှာ ရေဂါလန်(၈၄၆)သိန်းတွင် လက်ရှိရေသိုလှောင်မှုမှာ (၄၂)သိန်းခန့် သိုလှောင်ထားရှိ။

    ( ခ)    နမ့်ကျန်ဆည်ရေပေးဝေရေးတွင် ရေသိုလှောင်မှု ပမာဏမှာ ရေဂါလန်(၉၅၆)သိန်းတွင်လက်ရှိရေသိုလှောင်မှုမှာ (၉၆.၂၂)သိန်း ခန့် သိုလှောင်ထားရှိပြီး၊ ၎င်းဆည်မှ နေ့စဉ် နံနက်(၈)နာရီမှ (၁၁)နာရီအထိ ရေဂါလန်(၈)သောင်းခန့် ဂိတ်ဘားထိန်းသိမ်း သည့် စနစ်ဖြင့် ရပ်ကွက်(၁၊ ၂၊ ၃၊ ၄၊ ၅)ရှိ စည်ပင်သာယာရေးအဖွဲ့ ပိုင် ရေတိုင်များသို့ အလိုအလျောက် စီးဆင်းသည့်စနစ်ဖြင့် ဖြန့်ဝေ ပေးလျှက်ရှိ ။

    ( ဂ)    နမ့်ဟူးဆည်ရေပေးရေးတွင် ရေသိုလှောင်မှု ပမာဏမှာ ရေဂါလန်(၅၅၀၄)သိန်းတွင် လက်ရှိရေသိုလှောင်မှုမှာ (၂၈၄၃.၂၅)သိန်းခန့် သိုလှောင်ထားရှိပြီး ရပ်ကွက်(၁၂)ရှိ မိုးလုံလေလုံအားကစားကွင်းရှိ ဈေးဆိုင်ခန်းများ၊ အိမ်တွင်းမှု သင်တန်းကျောင်း အရှေ့မြောက်တိုင်းစစ်ဌာနချုပ်သို့ (၁)ရက်လျှင် ရေဂါလန်(၃)သောင်းခန့် နေ့စဉ် အလိုအလျောက် စီးဆင်းသည့် စနစ်ဖြင့် ဖြန့်ဝေ ပေးလျှက်ရှိ ။

    (ဃ)    ကောက်ကွေ့ဆည်ရေပေးရေးတွင် ရေသိုလှောင်မှု ပမာဏမှာ ရေဂါလန်(၁၃၆၈၂)သိန်းတွင် လက်ရှိရေသိုလှောင်မှုမှာ (၁၀၆၇၉)သိန်းခန့် သိုလှောင်ထားရှိပြီး ရပ်ကွက်(၁)ရှိ အမြင့်ပိုင်း နေရာများနှင့် ရေကန်တောင်/နမ့်ကျန်ဆည်များမှ ပေးဝေသော ရေမရောက်ရှိသည့် နေရာများသို့ နေ့စဉ် ရေဂါလန်(၁)သောင်းခွဲ ခန့် တွန်းပို့ပေးလျှက်ရှိ ။

    ( င)    မြို့ဝမ်ရေပေးရေး လုပ်ငန်းသည် မြို့ဝမ်ရေထွက်မှရေများကို မော်တာနှင့်ပန့်ဖြင့် ရေဂါလန်(၁)သိန်းဆံ့ ရေစုကန်သို့ တွန်းပို့ပြီး အဆိုပါရေကန်မှတဆင့် ရပ်ကွက်(၁)ပါရမီလမ်းသွယ်များသို့ အလိုအလျောက်စီးဆင်းသည့် စနစ်ဖြင့်လည်းကောင်း၊ ရပ်ကွက်(၁၀)နယ်မြေ(၃၊ ၄၊ ၅၊ ၆၊၇)များသို့ နေ့စဉ် ရေဂါလန် (၁)သိန်းခန့် ဖြန့်ဝေပေးလျှက်ရှိ ။

    (စ)    အလှူရှင် စက်ရေတွင်း(၁၄)တွင်းမှာ ရေပေးဝေမှုတွင် နွေရာသီ ရေရှားပါးမှု မဖြစ်စေရေးအတွက် မြို့ပေါ် ရေရှားပါးသော ရပ်ကွက်၊ အများပြည်သူ ရေသုံးစွဲမှုများသော နေရာနှင့်ရေထွက် နှုန်းများရှိသော နေရာများတွင် စေတနာရှင်ပြည်သူများ၏ လှူဒါန်းမှုဖြင့် ရပ်ကွက်(၁)စက်ရေတွင်း(၄)တွင်း၊ ရပ်ကွက်(၂) စက်ရေတွင်း(၁)တွင်း၊ ရပ်ကွက်(၄) စက်ရေတွင်း(၁)တွင်း၊ ရပ်ကွက်(၉) စက်ရေတွင်း(၁)တွင်း၊ ရပ်ကွက်(၁၀) စက်ရေတွင်း (၁)တွင်း၊ ရပ်ကွက်(၁၁) စက်ရေတွင်း(၂)တွင်း၊ ရပ်ကွက်(၁၂) စက်ရေတွင်း(၁)တွင်း၊ မြို့မဈေးတွင် စက်ရေတွင်း(၁)တွင်း၊ ပြည်သူ့ဆေးရုံတွင် စက်ရေတွင်း(၁)တွင်း၊ ကုတင်(၁၀၀)ဆံ့ တပ်မတော်စစ်ဆေးရုံတွင် စက်ရေတွင်း(၁)တွင်း စုစုပေါင်း(၁၄) တွင်းမှ (၁)နာရီလျှင် ရေဂါလန်(၂၇၀၀၀)နှုန်းဖြင့် နေ့စဉ် ရေရယူ သုံးစွဲလျက်ရှိ။

    (ဆ)    နားမခေါ်ရပ်ကွက်တွင် မြို့နယ်စည်ပင်သာယာရေးအဖွဲ့အစီအစဉ် ဖြင့် နမ့်ကျန်းရေပေးဝေရေး ပိုက်လိုင်းဖြင့် တိုက်ရိုက်ပေးဝေပြီး နတ်ရေကန်ဘုန်းကြီးကျောင်းမှ ရေပေးဝေနေကြောင်း၊ သောက်သုံးရေ အခက်အခဲမရှိသော်လည်း ကျေးလက်ဒေသဖွံ့ဖြိုး တိုးတက်ရေးဦးစီးဌာနပိုင် တွင်းတူးစက်ဖြင့် ထပ်မံတူးဖော်  ဆောင်ရွက်လျက်ရှိ။

ထို့အပြင် နွေရာသီ သောက်သုံးရေခက်ခဲမှုမရှိစေရေး မြို့နယ်စည်ပင်  သာယာရေးအဖွဲ့ပိုင် ရေကားများဖြင့် ဖြန့်ဝေပေးလျှက်ရှိပြီး မြို့ပေါ်ရှိ ပြည်သူများ သောက်သုံးရေ ခက်ခဲမှုမရှိစေရေး ဌာနဆိုင်ရာများ  ပူးပေါင်းပြီး ဖြန့်ဝေ ပေးလျှက်ရှိကြောင်းနှင့် “လားရှိုးမြို့တွင် သောက်သုံးရေရှားပါးမှု အခက်အခဲနှင့် ကြုံတွေ့နေရ”သည်မှာ မဟုတ်မမှန်ပါကြောင်း အများပြည်သူသိရှိနိုင်ရန် ဖော်ပြအပ်ပါသည်။

အင်းလေးကန်ပတ်ဝန်းကျင်ရှိ ဟိုတယ်များနှင့် စပ်လျဉ်းသည့် တွေ့ဆုံပွဲကျင်းပ

တောင်ကြီး   မေ   ၀၈

   ရှမ်းပြည်နယ်၊ ညောင်ရွှေမြို့နယ်၊ အင်းလေးကန်ပတ်ဝန်းကျင်ရှိ ဟိုတယ်များနှင့် စပ်လျဉ်းသည့် တွေ့ဆုံပွဲတစ်ရပ်ကို ၂၀၁၃ ခုနှစ်၊ မေလ ၈ ရက်၊ နေ့လည် ၁ နာရီ၌ ညောင်ရွှေမြို့နယ်၊ မိုင်းသောက် ကျေးရွာအနီးရှိ Aureum Palace ဟိုတယ်တွင်ကျင်းပရာ ပတ်ဝန်းကျင်ထိန်းသိမ်းရေးနှင့် သစ်တောရေးရာဝန်ကြီးဌာန ပြည်ထောင်စုဝန်ကြီး ဦးဝင်းထွန်း၊ ဟိုတယ်နှင့် ခရီးသွားလာရေးလုပ်ငန်းဝန်ကြီး ဌာန ပြည်ထောင်စုဝန်ကြီး ဦးဌေးအောင်နှင့် ရှမ်းပြည်နယ်အစိုးအဖွဲ့ ပြည်နယ်ဝန်ကြီးချုပ် ဦးစဝ်အောင်မြတ်တို့က ဦးဆောင်ဆွေးနွေးပြီး အခမ်းအနားသို့တက်ရောက်လာသည့် သတင်းမီဒီယာများနှင့် အသင်းအဖွဲ့များက မေးမြန်းသည့် မေးခွန်းများကို ပြည်ထောင်စုဝန်ကြီးများ၊ ပြည်နယ်ဝန်ကြီးချုပ်နှင့် ဌာနဆိုင်ရာတာဝန်ရှိသူများက ပွင့်လင်းမြင်သာစွာ ပြန်လည်ရှင်းလင်းဖြေကြားသည်။

   အခမ်းအနားသို့ ရှမ်းပြည်နယ်အစိုးရအဖွဲ့ဝင်များ၊ ညောင်ရွှေမြို့နယ်မှ ပြည်သူ့လွှတ်တော်နှင့် ပြည်နယ်လွှတ်တော်ကိုယ်စားလှယ်များ၊ ပြည်နယ်အဆင့် ဌာနဆိုင်ရာများ၊ ပြည်တွင်းပြည်ပသတင်း မီဒီယာများ၊ ညောင်ရွှေမြို့နယ်ရှိ ဟိုတယ်လုပ်ငန်းရှင်များ၊ လူမှုရေးအသင်းအဖွဲ့များ၊ ဒေသခံပြည်သူ လူထုများ အင်အား(၁၅၀)ခန့်တက်ရောက်သည်။

      အခမ်းအနားအပြီးတွင် ပြည်ထောင်စုဝန်ကြီးများ၊ ပြည်နယ်ဝန်ကြီးချုပ်တို့သည် အခမ်းအနား တက်ရောက်လာသူများအား ရင်းနှီးခင်မင်စွာလိုက်လံနှုတ်ဆက်သည်။

တောင်ကြီးမြို့၊ ကုန်ခြောက်သားငါးစျေး အဆင့်မြင့်စျေးသစ်တည်ဆောက်ရေး တင်ဒါရွေးချယ်ပွဲ ကျင်းပ

တောင်ကြီး  မေ  ၀၃

   တောင်ကြီးမြို့၊ ကုန်ခြောက်သားငါးစျေး အဆင့်မြင့်စျေး သစ်တည်ဆောက်ရေး တင်ဒါရွေးချယ်ပွဲကို မေလ(၃)ရက် နံနက်(၉)နာရီက တောင်ကြီးမြို့တော်ခန်းမ၌ ကျင်းပရာ ရှမ်းပြည်နယ်အစိုးရ အဖွဲ့ဝင်၊ ပြည်နယ်ဘဏ္ဍာရေးနှင့် အခွန်ဝန်ကြီး ဦးခွန်သိန်းမောင်၊ ပြည်နယ်လမ်းပန်းဆက်သွယ်ရေးဝန်ကြီး ဦးစိုင်းနော်ခမ်း၊ ပြည်နယ်အဆင့် ဌာနဆိုင်ရာများ၊ တင်ဒါတင်သွင်းထားသည့် ကုမ္ပဏီများမှ တာဝန်ရှိသူများ၊ ဖိတ်ကြားထားသော ဧည့်သည်တော်များ တက်ရောက်ခဲ့ကြသည်။

    ရှေးဦးစွာ ပြည်နယ်ဘဏ္ဍာရေးနှင့် အခွန်ဝန်ကြီး ဦးခွန်သိန်းမောင်က အဖွင့်အမှာစကားပြောကြားပြီး၊ ပြည်နယ်စည်ပင်သာယာရေးအဖွဲ့ ညွှန်ကြားရေးမှူး ဦးစိုင်းထွန်းထွန်းက တင်ဒါရွေးချယ်ပွဲနှင့် စပ်လျဉ်း၍ ရှင်းလင်းတင်ပြသည်။

   ၎င်းနောက် တင်ဒါတင်သွင်းထားသည့် ကုမ္ပဏီ(၇)ခုကို စျေးတည်ဆောက်ရန်ကိစ္စ ရှင်းလင်းတင်ပြရန်အတွက် အစီအစဉ်နံပါတ်ရွေးချယ်မှုအား မဲစနစ်ဖြင့် ရွေးချယ်ပြီး ကုမ္ပဏီများမှ အဆင့်မြင့်စျေးတည်ဆောက်မည့် အစီအစဉ်များကို ရှင်းလင်းတင်ပြခဲ့ကြသည်။