သတင်းများ

ရှမ်းပြည်နယ် လုပ်ကွက်စိစစ်ချထားပေးရေးအဖွဲ့ ရှမ်းပြည်နယ်အတွင်း ထုတ်ပေးထားသည့် ခွင့်ပြုမိန့်များစာရင်း

ရှမ်းပြည်နယ် လုပ်ကွက်စိစစ်ချထားပေးရေးအဖွဲ့
ရှမ်းပြည်နယ်အတွင်း
ထုတ်ပေးထားသည့် ခွင့်ပြုမိန့်များစာရင်း

img076img077img078img079img080img081img082img083img084img085img086img087img088img089

ပအိုဝ်းကိုယ်ပိုင်အုပ်ချုပ်ခွင့်ရဒေသ ဟိုပုံးမြို့၊ သီရိမင်္ဂလာရွှေချမ်းသာ မွေတော်ဘုရားကြီး ဗုဒ္ဓပူဇနိယ တန်ဆောင်တိုင်မီးထွန်းပွဲ ကျင်းပ

တောင်ကြီး    နိုဝင်ဘာ   −   ၁၅

276
    မြန်မာသက္ကရာဇ် ၁၃၈၁ခုနှစ်၊ တန်ဆောင်မုန်းလပြည့်ကျော်(၄)ရက် နှစ်စဉ်ကျင်းပမြဲဖြစ်သော ပအိုဝ်းကိုယ်ပိုင်အုပ်ချုပ်ခွင့်ရ ဒေသဟိုပုံးမြို့၊ သီရိမင်္ဂလာရွှေချမ်းသာ မွေတော်ဘုရားကြီး ဗုဒ္ဓပူဇနိယ တန်ဆောင်တိုင်မီးထွန်းပွဲတော်ကို နိုဝင်ဘာ(၁၅)ရက် ညနေ(၆)နာရီက အဆိုပါဘုရားရှေ့ရင်ပြင်၌ ကျင်းပကြောင်းသိရသည်။
တန်ဆောင်တိုင်မီးထွန်းပွဲတော်ကို ရှမ်းပြည်နယ်အစိုးရအဖွဲ့၊ ပြည်နယ်စိုက်ပျိုးရေး မွေးမြူရေးနှင့် ဆည်မြောင်းဝန်ကြီး ဦးစိုင်းလုံကျော်၊ ပြည်နယ်လမ်းပန်းဆက်သွယ်ရေးဝန်ကြီး ဦးခွန်ရဲထွေး၊ ပြည်နယ်စည်ပင်သာယာရေးဝန်ကြီး ဦးစိုင်းစွံဆိုင်း၊ ဗမာ တိုင်းရင်းသားလူမျိုးရေးရာဝန်ကြီး ဒေါက်တာအောင်သန်းမောင်၊ ပအိုဝ်းကိုယ်ပိုင်ဒေသဦးစီးအဖွဲ့ ဦးခွန်မောင်ဖြူနှင့် တာဝန်ရှိသူ တို့ကဖဲကြိုးဖြတ်ဖွင့်လှစ်ပေးကြသည်။
        ဆက်လက်၍ အထက(၁)ဟိုပုံးကျောင်းသူလေးများနှင့် တိုင်းရင်းသူလေးများက ဆီမီးအကဖြင့် ဖျော်ဖြေကြပြီး တန်ဆောင်တိုင် မီးထွန်းပွဲတော် ဖွင့်ပွဲအထိမ်းအမှတ် မီးရှူးမီးပန်းများနှင့် မီးပုံးငယ်များ လွှတ်တင်ခြင်းကို ရှမ်းပြည်နယ် ဝန်ကြီးချုပ် ဒေါက်တာလင်းထွဋ်၊ ရှမ်းပြည်နယ်လွှတ်တော်ဥက္ကဋ္ဌ ဦးစိုင်းလုံးဆိုင်၊ ပြည်နယ်တရားလွှတ်တော် တရားသူကြီးချုပ် ဦးကြွယ်ကြွယ်၊ ပအိုဝ်းကိုယ်ပိုင်အုပ်ချုပ်ခွင့်ရဒေသဦးစီးအဖွဲ့ဥက္ကဋ္ဌ ဦးခွန်စံလွင်၊ ပြည်နယ်ဥပဒေချုပ်ဦးတင်ဦးတို့မှ စက်ခလုတ် နှိပ်ဖွင့်လှစ်ပေး၍ ပြည်နယ်ဝန်ကြီးချုပ်နှင့် တာဝန်ရှိသူတို့သည် သီရိမင်္ဂလာရွှေချမ်းသာ မွေတော်ဘုရားကြီးအတွင်း၌ ရတနာ ဒီပံဆီမီးတိုင် ထွန်းညှိပူဇော်ကာ လှိုဏ်ဂူတော်အတွင်း ဘုရားအားဖူးမျှော်ကြကြောင်း သိရှိရသည်။
    အဆိုပါ ပအိုဝ်းကိုယ်ပိုင်အုပ်ချုပ်ခွင့်ရဒေသ ဟိုပုံးမြို့၊ သီရိမင်္ဂလာရွှေချမ်းသာ မွေတော်ဘုရားကြီး ဗုဒ္ဓပူဇနိယ တန်ဆောင်တိုင်မီးထွန်းပွဲတော်ကို နိုဝင်ဘာ(၁၅)ရက်မှ (၁၉)ရက်နေ့အထိကျင်းပပြီး ညမီးကြီးမီးပုံးပျံ(၈)လုံး လွှတ်တင်ယှဉ်ပြိုင် ခြင်းနှင့်ညစဉ်မီးပဒေသာ လှည့်လည်ပူဇော်ပွဲဖြင့် ကျင်းပသွားမည်ဖြစ်ကြောင်းသိရသည်။
မောင်မောင်သန်း(တောင်ကြီး)
09-250132943

မသိုးသင်္ကန်း ယှဉ်ပြိုင်ရက်လုပ်ဖွင့်ပွဲနှင့် ဆက်ကပ်လှူဒါန်းခြင်း၊ မဟာဘုံကထိန် ရေစက်ချတရားတော်နာကျင်းပ

တောင်ကြီး    နိုဝင်ဘာ   −   ၁၃

271
    မသိုးသင်္ကန်း ယှဉ်ပြိုင်ရက်လုပ်ဖွင့်ပွဲကို နိုဝင်ဘာ(၁၀)ရက် ညနေ(၆)နာရီက တောင်ကြီးမြို့ စူဋ္ဌာမုနိလောကချမ်းသာ စေတီတော်ရင်ပြင်၌ကျင်းပရာ ရှမ်းပြည်နယ်ဝန်ကြီးချုပ် ဒေါက်တာလင်းထွဋ်၏ဇနီး ဒေါ်နန်းရွှေမြင့်၊ ပြည်နယ်တရားလွှတ်တော် တရားသူကြီးချုပ်၏ဇနီး ဒေါ်ဝင်းဝင်းသန်းတို့က မသိုးသင်္ကန်း ယှဉ်ပြိုင်ရက်လုပ်ဖွင့်ပွဲကို ဖဲကြိုးဖြတ်ဖွင့်လှစ်ပေးကာ ပြည်နယ် ဝန်ကြီးချုပ်နှင့်ဇနီး၊ တာဝန်ရှိသူတို့သည် ရက်ကန်းစင်အသီးသီးတို့ လှည့်လည်ကြည့်ရှုကြသည်။
    နိုဝင်ဘာ(၁၁)ရက် နံနက်(၄)နာရီတွင် ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ်နှင့်ဇနီး၊ တာဝန်ရှိသူတို့သည် မသိုးသင်္ကန်းများကို ကိုင်ဆောင်ကာ စူဋ္ဌာမုနိဘုရားရင်ပြင် လက်ယာရစ်(၃)ပတ် လှည့်ပတ်ပြီး စေတီတော်အတွင်း၌ ပြည်နယ် ဝန်ကြီးချုပ်အမှူးပြုသည့် ပြည်နယ်အစိုးရအဖွဲ့ဝင်များက ဗုဒ္ဓရုပ်ပွားတော်များအား မသိုးသင်္ကန်းများကို ဆက်ကပ်လှူဒါန်းပေး ကြပြီး ပြည်နယ်ဝန်ကြီးချုပ်နှင့်ဇနီး၊ တာဝန်ရှိသူတို့သည် မသိုးသင်္ကန်း တရားနာရေစက်ချအခမ်းအနားကို နမောတဿသုံးကြိမ် ရွတ်ဆိုဘုရားကန်တော့ဖွင့်လှစ်၍ တောင်ကြီးမြို့ ပြည်နယ်သံဃနာယကဥက္ကဋ္ဌ မူလမင်းကွန်း ကျောင်းထိုင်ဆရာတော် အဂ္ဂမဟာပဏ္ဍိတ အဂ္ဂမဟာဂန္တဝါစကပဏ္ဍိတ မဟာဂန္တဝါစကပဏ္ဍိတ ဘဒ္ဒန္တပညာသီရိထံမှ ငါးပါးသီလတော်မြတ်ကိုခံယူကာ ဆရာတော်များပွားများအပ်သော ပရိတ်တရားတော်မြတ်ကို နာယူကြသည်။
    ဆက်လက်၍ ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ်နှင့်ဇနီး၊ တာဝန်ရှိသူတို့သည် ဆရာတော်များအား လှူဖွယ် ဝတ္ထုပစ္စည်းများ ဆက်ကပ်လှူဒါန်းကြကာ မသိုးသင်္ကန်း ရက်လုပ်ယှဉ်ပြိုင်ပွဲတွင် ပထမ၊ ဒုတိယ၊ တတိယဆုရရှိသူများကို ပြည်နယ်ဝန်ကြီးချုပ်နှင့်ဇနီး ဒေါ်နန်းရွှေမြင့်မှ ဆုချီးမြှင့်ပေးပြီး လှူဒါန်းမှုအစုစုအတွက် ပြည်နယ်သံဃနာယကဥက္ကဋ္ဌ မူလ မင်းကွန်းကျောင်းထိုင်ဆရာတော် အဂ္ဂမဟာပဏ္ဍိတ အဂ္ဂမဟာဂန္တဝါစကပဏ္ဍိတ မဟာဂန္တဝါစကပဏ္ဍိတ ဘဒ္ဒန္တပညာသီရိ အရှင်သူမြတ်ထံမှ ရေစက်သွန်းချအမျှပေးဝေကာ အခမ်းအနားကို ဗုဒ္ဓသာသနံ စိရံတိဋ္ဌတု သုံးကြိမ်ရွတ်ဆို ဆုတောင်းရုပ်သိမ်း ၍ဆရာတော်များအား အာရုံဆွမ်းဆက်ကပ်လှူဒါန်းကြကြောင်းသိရသည်။
    ထို့နောက် နံနက်(၉)နာရီခွဲတွင် အတုလမာရဇိန် ဆုတောင်းပြည့်မြတ်စွာဘုရား မြို့လယ်ဓမ္မာရုံ၌ (၇၂)ကြိမ်မြောက် မြို့လုံးကျွတ် မဟာဘုံကထိန် ရေစက်ချတရားတော်နာကျင်းပရာ ပြည်နယ်ဝန်ကြီးချုပ် ဒေါက်တာလင်းထွဋ်နှင့်ဇနီး အမှူးပြု သောဧည့်ပရိတ်သတ်တို့က နမောတဿသုံးကြိမ် ရွတ်ဆိုဘုရားကန်တော့ဖွင့်လှစ်ပြီး တောင်ကြီးမြို့ နိုင်ငံတော်သြဝါဒစရိယ အဂ္ဂမဟာပဏ္ဍိတ မဟာကမ္မဌာနစရိယ စွန်းလွန်းကျောင်းတိုက် ပဓာနနာယကဆရာတော် ဘဒ္ဒန္တအဂ္ဂမဟာဘိဝံသ အရှင်သူမြတ် ထံမှငါးပါးသီလ ခံယူဆောက်တည်ကာ ဆရာတော်၊ သံဃာတော် အရှင်သူမြတ်များပွားများအပ်သော မေတ္တာသုတ် ပရိတ်တရား တော်မြတ်ကိုနာယူကြသည်။
    ၎င်းနောက် မြို့လုံးကျွတ် မဟာဘုံကထိန်ပွဲတော် ကျင်းပရေးကော်မတီဥက္ကဋ္ဌ ရှမ်းပြည်နယ်အစိုးရအဖွဲ့ သာသနာရေး တာဝန်ခံ ဗမာတိုင်းရင်းသားလူမျိုးရေးရာဝန်ကြီး ဒေါက်တာအောင်သန်းမောင်က မဟာဘုံကထိန်ပွဲတော် ကျင်းပခြင်းနှင့်ပတ်သက်၍ တင်ပြလျှောက်ထားကာ ပြည်နယ်ဝန်ကြီးချုပ် ဒေါက်တာလင်းထွဋ်နှင့်ဇနီး အမှူးပြုသော အကြီးအကဲများမှ ကထိန်လျာ သင်္ကန်းများ ဆက်ကပ်လှူဒါန်းကြပြီး ရေစက်သွန်းချအမျှပေးဝေ၍ အခမ်းအနားကို ဗုဒ္ဓသာသနံ စိရံတိဋ္ဌတု သုံးကြိမ်ရွတ်ဆို ဆုတောင်း၍ ဆရာတော်များအား နေ့ဆွမ်းဆက်ကပ်လှူဒါန်းကြကြောင်းသိရှိရသည်။
    အဆိုပါ (၇၂)ကြိမ်မြောက် တောင်ကြီးမြို့ မြို့လုံးကျွတ် မဟာဘုံကထိန် ပွဲတော်ကြီးတွင် ပါဝင်လှူဒါန်းကြသည့် ပဒေသာပင်(၂၄၃)ပင်၊ တန်ဖိုးငွေကျပ်( ၈၁၄၉၉၈၅၁ )သိန်း၊ နဝကမ္မအလှူငွေကျပ်( ၂၀၁၂၇၁၁ )သိန်းနှင့် ပရိဘောဂပစ္စည်း မျိုးစုံ(၁၁)ပါဝင်ပြီး တန်ဖိုးငွေကျပ်( ၂၂၉၅၅၀၀ )သိန်းဖြစ်၍ လှူဖွယ်ပစ္စည်းများနှင့် နဝကမ္မအလှူငွေများကို ယခင်နှစ်များ နည်းတူကထိန်ခင်းပြီး ကျောင်း(၈၀)ကျောင်းသို့ (၄၀%)နှင့် ကထိန်မခင်းရသေးကျောင်း (၂၀)ကျောင်းသို့ (၆၀%)လှူဒါန်းပြီး နဝကမ္မအလှူငွေများကို အတုလမာရဇိန် ဆုတောင်းပြည့်မြတ်စွာဘုရာနှင့် ကျောင်းတိုက်ရှိ သံဃာတော်အားလုံး(၃၉၀၆)ပါး တို့အတွက်အချိုးကျ လှူဒါန်းသွားမည်ဖြစ်ကြောင်း၊ ပဒေသာများတွင်ပါရှိသည့် သင်္ကန်း(၂၀၀၀)စုံကို ကထိန်ခင်းပြီး ကျောင်းတိုက် များသို့ကျောင်းအလိုက်(၁)စုံစီနှင့် ကထိန်မခင်းရသေးကျောင်းတိုက်များသို့ ကျောင်းရှိသံဃာတော်အရှိအတိုင်း လှူဒါန်းသွားမည် ဖြစ်ကြောင်း၊ ပရိဘောဂပစ္စည်း (၁၁)မျိုးကိုလည်း ကျောင်းတိုက်ပေါင်းသို့ လှူဒါန်းထားရှိပြီး အကြိမ်အနည်းအများ၊ သံဃာတော် အနည်းအများအလိုက် စာရင်းပြုစုလျက် မဲစနစ်ဖြင့်လှူဒါန်းသွားမည် ဖြစ်ကြောင်းသိရှိရသည်။
မောင်မောင်သန်း(တောင်ကြီး)
09-250132943

ဆေးလိပ်ငွေ့ကင်းစင် ရှမ်းပြည်တစ်ခွင် အကြီးတန်း၊ အငယ်တန်း၊ မသန်စွမ်းသူများ အပျော်တမ်းအပြေးပြိုင်ပွဲ အင်အား(၁၈၉၀)ကျော် ပါဝင်ဆင်နွှဲ

တောင်ကြီး    နိုဝင်ဘာ   −   ၁၈

275
ဆေးလိပ်ငွေ့ကင်းစင် ရှမ်းပြည်တစ်ခွင် အစီအစဉ်ဖြင့် ရှမ်းပြည်နယ်အားကစားနှင့် ကာယပညာဦးစီးဌာန၊ POCARI SWEAT တို့ပူးပေါင်းကျင်းပသည့် အကြီးတန်း၊ အငယ်တန်း၊ မသန်စွမ်းသူများ အပျော်တမ်းအပြေးပြိုင်ပွဲကို နိုဝင်ဘာ(၁၆)ရက် နံနက်(၆)နာရီက တောင်ကြီးမြို့ သစ်တောရပ်ကွက်ရှိ ပြည်နယ်လေ့ကျင့်ရေးအားကစားရုံရှေ့မှ စတင်တာလွှတ်ရာ အကြီးတန်းပြိုင်ပွဲဝင်(၆၀၀)ကျော်၊ အငယ်တန်းပြိုင်ပွဲဝင်(၁၂၀၀)ဦးနှင့် မသန်စွမ်း(၉၀)ဦးတို့ ဝင်ရောက်ယှဉ်ပြိုင်ကြပြီး ပြိုင်ပွဲဝင်များအား ရှမ်းပြည်နယ်အစိုးရအဖွဲ့ ပြည်နယ်လူမှုရေးဝန်ကြီး ဒေါက်တာမျိုးထွန်းနှင့် POCARI SWEAT မှဒါရိုက်တာတို့က သေနတ်ပစ်ဖောက်တာလွှတ်ပေးကြသည်။
ပြိုင်ပွဲတွင် အကြီးတန်းပြိုင်ပွဲဝင်များက ပြည်နယ်လေ့ကျင့်ရေးအားကစားရုံရှေ့ ဗိုလ်ချုပ်လမ်းအတိုင်းထုံးဖို ဂိတ်မှတစ်ပတ်ပတ်၍ ပြည်နယ်လေ့ကျင့်ရေးရုံသို့ ပန်းဝင်၍လည်းကောင်း၊ အငယ်တန်းပြိုင်ပွဲဝင်များက ပြည်နယ် လေ့ကျင့်ရေးအားကစားရုံရှေ့မှ ဗိုလ်ချုပ်လမ်းအတိုင်း စဝ်စံထွန်းရပ်ကွက် ကရင်မရေထွက်မှ ပြည်နယ်လေ့ကျင့်ရေးရုံ သို့ပန်းဝင်၍လည်းကောင်း၊ မသန်စွမ်းပြိုင်ပွဲဝင်များက ပြည်နယ်လေ့ကျင့်ရေးအားကစားရုံမှ ဗိုလ်ချုပ်လမ်းအတိုင်း ကန်ရှေ့ရပ်ကွက်ရှိ အလယ်ဘီအိုစီရှေ့တစ်ပတ်ပတ်၍ ပြည်နယ်လေ့ကျင့်ရေးအားကစားရုံသို့ ပန်းဝင်၍လည်းကောင်း အသီးသီးယှဉ်ပြိုင်ကြရာ ပြိုင်ပွဲတွင်ဆုရရှိသူများကို ပြည်နယ်လူမှုရေးဝန်ကြီး၊ ပြည်နယ်ညွှန်ကြားရေးမှူးများနှင့် တာဝန်ရှိသူတို့က အသီးသီးချီးမြှင့်ပေးအပ်ခဲ့ကြောင်းသိရသည်။
အစရ(ရှမ်း)

စျေးပြိုင်လေလံကြော်ငြာအမှတ်−၁/၂၀၁၉−၂၀၂၀(ဒေသဖွံ့ဖြိုးရေး) (သတ−ဖ) သစ်မာ (သစ်လုံး/တိုင်/ခွဲခြမ်း/သစ်ခွဲသား) များအား ဒေသဖွံ့ဖြိုးရေးသို့ ရောင်းချခြင်း

စျေးပြိုင်လေလံကြော်ငြာအမှတ်−၁/၂၀၁၉−၂၀၂၀(ဒေသဖွံ့ဖြိုးရေး)
(သတ−ဖ) သစ်မာ (သစ်လုံး/တိုင်/ခွဲခြမ်း/သစ်ခွဲသား) များအား ဒေသဖွံ့ဖြိုးရေးသို့ ရောင်းချခြင်း

img031img032img033img034img035

ပထမဆုရရှိခဲ့သော အမျိုးသမီးဘောလုံးအသင်း၊ Myanmar FitnessDance ပြိုင်ပွဲနှင့် လှေလှော်ပြိုင်ပွဲတွင် ဆုရရှိသူများကိုဂုဏ်ပြုဆုငွေချီးမြှင့်

တောင်ကြီး နိုဝင်ဘာ - ၁၅

274

၂၀၁၉ ခုနှစ် တိုင်းဒေသကြီးနှင့်ပြည်နယ် U-19 အမျိုးသမီးဘောလုံးပြိုင်ပွဲတွင် ပထမဆုရရှိခဲ့သော အမျိုးသမီးဘောလုံးအသင်းနှင့် Myanmar Fitness Dance ပြိုင်ပွဲတွင် ဆုရရှိသူများကိုဆုငွေချီးမြှင့်ပွဲနှင့် ဂုဏ်ပြုညစာစားပွဲကို နိုဝင်ဘာ ၁၃ ရက်ည ၇ နာရီက ရှမ်းပြည်နယ်(တောင်ပိုင်း)၊တောင်ကြီးမြို့၊ သစ်တောရပ်ကွက်၊ ပြည်နယ်အားကစားနှင့် ကာယပညာဦးစီးဌာနရုံးရှိလေ့ကျင့်ရေးသုံးထပ်ဆောင် ခန်းမ၌ ကျင်းပခဲ့ကြောင်း သိရသည်။

အခမ်းအနားတွင် ရှမ်းပြည်နယ်အစိုးရအဖွဲ့ ပြည်နယ်လူမှုရေးဝန်ကြီး ရှမ်းပြည်နယ်အားကစားနှင့်ကာယ ပညာကော်မတီဥက္ကဋ္ဌ ဒေါက်တာမျိုးထွန်းက ဂုဏ်ပြုချီးမြှင့်ထိုက်တဲ့သူကိုဂုဏ်ပြုတဲ့ပွဲဖြစ်တာနဲ့အညီ အင်မတန်မှ ကျက်သရေရှိတဲ့ပွဲဖြစ်ပါကြောင်း၊ ရှမ်းပြည်နယ်အသက် ၁၉ နှစ်အောက်အမျိုးသမီးဘောလုံးအသင်းဟာရှမ်းပြည်နယ် အတွက် ၂ နှစ်ဆက်တိုက် ပထမဆုဖလားကိုရရှိအောင်စွမ်းဆောင်ပေးခဲ့တာကို ဂုဏ်ယူဖွယ်တွေ့ရှိရမှာ ဖြစ်ပါကြောင်း၊ ထိုနည်းတူ Myanmar Fitness Dance ပြိုင်ပွဲဟာဆိုရင်လည်း တိုင်းဒေသကြီးနှင့်ပြည်နယ်တွေမှာ ၂၀၁၈ ခုနှစ်မှသာ ထည့်သွင်းကျင်းပခဲ့တာဖြစ်ပြီး ၂၀၁၉ ခုနှစ် ပြိုင်ပွဲနှင့်ဆိုရင် နှစ်ကြိမ်သာကျင်းပသေးတာဖြစ်ပြီး ရှမ်းပြည်နယ်အသင်းက ဒုတိယအကြိမ် ကျင်းပတဲ့ပြိုင်ပွဲမှာဒုတိယရရှိခဲ့တာတွေ့လို့ ရှမ်းပြည်နယ်Myanmar Fitness Dance အသင်းရဲ့ကြိုးပမ်းအားထုတ်မှုကိုလည်း အသိအမှတ်ပြုပါကြောင်း၊ နောင်နှစ်များမှာလည်းဒီထက်သာလွန်တဲ့ အောင်မြင်မှုများရရှိအောင် ကြိုးစားသွားကြရန်တိုက်တွန်းပြောကြားသည်။

ထို့နောက် ရှမ်းပြည်နယ်အမျိုးသမီးအားကစားအဖွဲ့ဆပ်ကော်မတီနာယက ဒေါ်နန်းရွှေမြင့် ထံသို့U-19 အသင်းအုပ်ချုပ်သူများက ပထမတံခွန်စိုက်ဆုဖလားကိုပေးအပ်ပြီး၊ နာယကကြီးမှ ရှမ်းပြည်နယ် အားကစားနှင့် ကာယပညာဦးစီးဌာနဂုဏ်ပြုဆုငွေကျပ် ၁၅ သိန်းကို ချီးမြှင့်ပေးအပ်သည်။ 

ဆက်လက်၍ ရှမ်းပြည်နယ်အစိုးရအဖွဲ့ ပြည်နယ်လူမှုရေးဝန်ကြီး ရှမ်းပြည်နယ် အားကစားနှင့် ကာယပညာကော်မတီဥက္ကဌ ဒေါက်တာမျိုးထွန်းက တိုင်းဒေသကြီးနှင့် ပြည်နယ်လှေလှော်ပြိုင်ပွဲတွင် အမျိုးသား ၁ဝ တက်လှော်ပြိုင်ပွဲတွင် ရွှေတံဆိပ်ဆုရရှိခဲ့သော ရှမ်းပြည်နယ်လှေလှော်အသင်းအား ဂုဏ်ပြုဆုငွေကျပ် ၁၀ သိန်း၊ အသက် ၁၉ နှစ်အောက်အမျိုးသမီး ဘောလုံးပြိုင်ပွဲဝင် အသင်းကို ရှမ်းပြည်နယ်အစိုးရအဖွဲ့မှ ဂုဏ်ပြုဆုငွေ ကျပ်သိန်း၃၀၊ Myanmar Fitness Dance ပြိုင်ပွဲဝင်အသင်းကို ရှမ်းပြည်နယ်အားကစားနှင့် ကာယပညာဦးစီးဌာနမှ ဂုဏ်ပြုချီးမြှင့်ငွေကျပ် ၅ သိန်း တို့ကို အသီးသီးချီးမြှင့်ပေးအပ်ရာ ပြိုင်ပွဲဝင်အားကစားသမားများကိုယ်စား အားကစားသမား တစ်ဦးမှကျေးဇူးတင်စကား ပြန်လည်ပြောကြားကာ ဂုဏ်ပြုညစာအတူသုံးဆောင်ခဲ့ကြောင်း သိရသည်။

အစရ(ရှမ်း)

 

တောင်ကြီးမြို့ တန်ဆောင်တိုင်ပွဲ နေ့လွတ်အရုပ်များ ယှဉ်ပြိုင်လျက်ရှိ

တောင်ကြီး    နိုဝင်ဘာ   -   ၆

270
ရှမ်းပြည်နယ်(တောင်ပိုင်း) တောင်ကြီးမြို့၏ အထင်ကရပွဲတော်တစ်ခုဖြစ်သော တန်ဆောင်တိုင်ပွဲတော်တွင် နိုဝင်ဘာ (၆)ရက် မွန်းလွဲ(၁)နာရီက တတိယနေ့၌ နေ့လွတ်အရုပ်များဖြစ်သည့် ခြေ(၂)ချောင်း၊ ခြေ(၄)ချောင်း၊ အုပ်စုများ ယှဉ်ပြိုင်လျက် ရှိသည်။
တောင်ကြီးမြို့ ရတနာသီရိရပ်ကွက်နေ နေ့လွတ်အရုပ်မီးဆရာကျော်ကြီးက ပြိုင်ပွဲဝင်ရန်အတွက် ပွဲတော်မစမီ(၁၅)ရက်
အကြိုကတည်းက နေ့လွတ်ခိုငှက်ရုပ်ကို စတင်ပြုလုပ်ကြောင်းနှင့် ဆီဆိုင်စက္ကူအရွက်(၄၀၀)နှင့် ကုန်ကျငွေ(၉)သောင်းကျပ် ဖြစ်ပြီး ဒုတိယအကြိမ် ဝင်ရောက်ယှဉ်ပြိုင်ကြောင်း၊ ၂၀၁၈ခုနစ်က ပထမအကြိမ် ဝင်ရောက်ယှဉ်ပြိုင်ကာ ကုန်ကျမှုသက်သာပြီး ၂၀၁၉ခုနစ်တွင် ကုန်ကျမှုများကြောင်း၊ ယခုကျွန်တော်တို့ယှဉ်ပြိုင်မယ့် နေ့လွတ်အရုပ်က ခိုငှက်ရုပ်ဖြစ်ကြောင်း ပြောသည်။
ပြည်နယ်လယ်ယာမြေ စီမံခန့်ခွဲရေးနှင့်စာရင်းအင်းဦးစီးဌာနမှ နေ့လွတ်စီပီကြက်ဖရုပ်ဖြင့် ဝင်ရောက်ယှဉ်ပြိုင်မည့် အဖွဲ့ခေါင်းဆောင်စိုင်းမျိုးအောင်ထက်က ပြီးခဲ့သည့်နှစ်တွင်လည်း ဝင်ရောက်ယှဉ်ပြိုင်ကြောင်း၊ ဒီနှစ်လည်း ဝင်ရောက်ယှဉ်ပြိုင် ပြီးကုန်ကျမှုက(၁)သိန်းခွဲ၊ ဆီဆိုင်စက္ကူအရွက်ရေ(၄၅၀)နှင့် ပွဲတော်မစခင်(၁)လ၌ ကြိုတင်ပြုလုပ်ကြောင်း၊ အပျော်ဝင်ရောက် ယှဉ်ပြိုင်ကာ ဆုကတော့မမျှော်မှန်းပါဘူး ရပါကပျော်ပါကြောင်း ပြောသည်။
အဆိုပါ တောင်ကြီးမြို့ တန်ဆောင်တိုင်ပွဲတော်၌ မီးပုံးပျံညမီးကြီး၊ စိန်နားပန်၊ နေ့လွတ်အရုပ်များ ပါဝင်ယှဉ်ပြိုင်ကြပြီး နေ့လွတ်အရုပ်များကို ဌာနဆိုင်ရာ ဒေသခံပြည်သူများ၊ လူကြီးလူငယ်မရွေး ပျော်ရွှင်စည်ကားသိုက်မြိုက်စွာ ဝင်ရောက်ယှဉ်ပြိုင် ကြပြီး နိုဝင်ဘာ(၆)ရက် ပွဲတော်တတိယနေ့ နေ့လွတ်အရုပ်များကို နိုဝင်ဘာ(၅)ရက်က မလွတ်နိုင်သည့် အရုပ်များနှင့်ပေါင်း၍ (၃၃)လုံးလွှတ်တင်ယှဉ်ပြိုင်ကြကြောင်း သိရှိရသည်။
မောင်မောင်သန်း(တောင်ကြီး)
09250132943

SME အသေးစားစက်မှုလုပ်ငန်း ဆောင်ရွက်နေမှုအား ရှမ်းပြည်နယ်ဝန်ကြီးချုပ် ကွင်းဆင်းကြည့်ရှု

တောင်ကြီး    နိုဝင်ဘာ   −   ၁၅

273
    ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာလင်းထွဋ်၊ ပြည်နယ်စိုက်ပျိုးရေး မွေးမြူရေးနှင့်ဆည်မြောင်း ဝန်ကြီး၊ ပြည်နယ်လျှပ်စစ်နှင့် စွမ်းအင်စက်မှုဝန်ကြီး၊ ပြည်နယ်စည်ပင်သာယာရေးဝန်ကြီး၊ ပြည်နယ်၊ ခရိုင်၊ မြို့နယ်အဆင့်ဌာန ဆိုင်ရာတာဝန်ရှိသူများနှင့်အတူ နိုဝင်ဘာ(၁၅)ရက် နံနက်(၈)နာရီ (၁၅)မိနစ်က တောင်ကြီးမြို့ ဘုရားဖြူရပ်ကွက်ရှိ ငွေစံအိမ်ရိုးရာ အထည်ချုပ်လုပ်ငန်း သွားရောက်ကွင်းဆင်းကြည့်ရှုကြကြောင်းသိရသည်။
    SME အသေးစားစက်မှုလုပ်ငန်း ငွေစံအိမ်ရိုးရာ အထည်ချုပ်လုပ်ငန်းပိုင်ရှင် ဒေါ်နန်းစံလှိုင်မှ အထည်ချုပ်လုပ်ငန်းနှင့် ပတ်သက်၍ရှင်းလင်းရာ မိမိတို့စက်ရုံမှ ထွက်ရှိသောအထည်များကို ပြည်တွင်းစျေးကွက်ဖြစ်သော ရန်ကုန်မြို့နှင့်ပတ်ဝန်းကျင် မြို့နယ်များ၊ မန္တလေး၊ ပြင်ဦးလွင်၊ ရှမ်းပြည်နယ် (အရှေ့ပိုင်း၊ တောင်ပိုင်း၊ မြောက်ပိုင်း)၊ ပုဂံ ညောင်ဦးနှင့် ခရီးသွားဧည့်သည် ရောက်ရှိသည့် မြို့များတို့ကိုဖြန့်ဖြူးလျက်ရှိပြီး အထည်အမျိုးအစားမှာ အမျိုးသားဝတ်(အင်္ကျီ၊ ဘောင်းဘီ၊ ဝမ်းဆက်)၊ အမျိုးသမီး ဝတ်(အနွေးထည်၊ အင်္ကျီ၊ ဝမ်းဆက်၊ လုံချည်၊ ပတ်လုံချည်၊ စကပ်)၊ ကလေးဝတ်(ကျား+မ)၊ လွယ်အိတ်ဒီဇိုင်းမျိုးစုံများ ထုတ်လုပ် ရောင်းချလျက်ရှိကြောင်း ပြောကြားသွားသည်။
    ဆက်လက်၍ ပြည်နယ်ဝန်ကြီးချုပ်နှင့်ပြည်နယ်ဝန်ကြီးများသည် ကလောမြို့နယ် ဟဲဟိုးမြို့ ဝါးရုံပင်ကျေးရွာ၌ တည်ထောင် ထားသော Myanmar Belle အခြောက်ခံသီးနှံစက်ရုံသို့ သွားရောက်ကြည့်ရှုရာ ဒါရိုက်တာအဖွဲ့ဝင် ဒေါ်တင်ရဝေအောင်က သီးနှံ အခြောက်ခံစက်ရုံနှင့်ပတ်သက်၍ ရှင်းလင်းပြောကြားပြီး ပြည်နယ်ဝန်ကြီးချုပ်နှင့်တာဝန်ရှိသူတို့သည် စက်ရုံအတွင်းဂေါ်ဖီထုပ်၊ သီးနှံအခြောက်ခံဆောင်ရွက်နေမှုအား လှည့်လည်ကြည့်ရှုကြသည်။
    အဆိုပါ အခြောက်ခံသီးနှံစက်ရုံတွင် ဂေါ်ဖီထုပ်၊ မုန်လာဥဖြူ၊ မုန်လာအရွက်၊ မုန်လာဥနီအနည်းငယ်နှင့်အခြောက်ခံ၍ ဂျပန်နိုင်ငံသို့တင်ပို့ကာ ဂေါ်ဖီထုပ်မျိုးစေ့များကိုဂျပန်မျိုးစေ့ဖြစ်၍ မြန်မာနိုင်ငံ၏နည်းပညာစနစ်ဖြင့်စိုက်ပျိုးကာ အခြောက်ခံပြီး သောသီးနှံများသည် (၁)လကြာထားခံကြောင်းသိရှိရသည်။
မောင်မောင်သန်း(တောင်ကြီး)
09250132943

တောင်ကြီးတန်ဆောင်တိုင်ပွဲတော် မီးပုံးပျံပြိုင်ပွဲ မီးရှူး၊ မီးပန်းများ ပစ်ဖောက်၍ဖွင့်လှစ်

တောင်ကြီး        နိုဝင်ဘာ   −   ၅

269
တောင်ကြီးတန်ဆောင်တိုင်ပွဲတော် မီးပုံးပျံပြိုင်ပွဲ ဖွင့်ပွဲကို နိုဝင်ဘာ(၄)ရက် ညနေ(၅)နာရီက ရှမ်းပြည်နယ် (တောင်ပိုင်း) တောင်ကြီးမြို့ ကျက်သရေဆောင် စူဠာမုနိလောကချမ်းသာ စေတီတော်မြတ်ကြီးတွင် ပြည်နယ် ဝန်ကြီးချုပ်၊ ပြည်နယ်ဝန်ကြီးများနှင့် တာဝန်ရှိသူတို့က စိန်နားပန်၊ မီးပုံးပျံအား ဦးစွာလွှတ်တင် ပူဇော်ကြသည်။
ဆက်လက်၍ အဝေရာကုန်းသာယာ မီးပုံးပျံကွင်း၌ တန်ဆောင်တိုင်ပွဲတော် မီးပုံးပျံပြိုင်ပွဲ ဖွင့်ပွဲကို တန်ဆောင်တိုင်ပွဲတော်ကျင်းပရေးကော်မတီဥက္ကဌ ရှမ်းပြည်နယ်အစိုးရအဖွဲ့ ပြည်နယ်လူမှုရေးဝန်ကြီး ဒေါက်တာ မျိုးထွန်း၊ ပြည်နယ်ဝန်ကြီးများ၊  တိုင်းရင်းသား လူမျိုးရေးရာဝန်ကြီး၊ ပအိုဝ်းကိုယ်ပိုင်အုပ်ချုပ်ခွင့်ရဒေသဦးစီးအဖွဲ့ ဥက္ကဌတို့မှ ဖဲကြိုးဖြတ်ဖွင့်လှစ်ပေးပြီး၊ ရှမ်းရိုးရာယဉ်ကျေးမှုထိန်းသိမ်းမြှင့်တင်ရေး ရှမ်းလူငယ်အဖွဲ့(SYO)မှ ဓားသိုင်းအက၊ တိုးနယားအကနှင့် ကိန္နရီကိန္နရာအကတို့ဖြင့် ကပြဖျော်ဖြေ၍ ရွှေဥဒေါင်း အက မီးအလှအကဖြင့် ကပြဖျော်ဖြေကာ ရှမ်းပြည်နယ် တိုင်းရင်းသားယဉ်ကျေးမှု အကအဖွဲ့တို့မှ တန်ဆောင်တိုင် တေးသီချင်းပြိုင်ပွဲဆုရ တေးရေး၊ တေးဆို ဟိန်းကို(STH)ရေးစပ်သည့် “တို့ရှမ်းပြည်နယ် တန်ဆောင်တိုင်ပွဲ” သီချင်း ဖြင့်ကပြ ဖျော်ဖြေကြသည်။
ထို့နောက် တန်ဆောင်တိုင်ပွဲတော် ကျင်းပရေးဦးစီးကော်မတီနာယက ရှမ်းပြည်နယ်အစိုးရအဖွဲ့ ပြည်နယ် ဝန်ကြီးချုပ် ဒေါက်တာလင်းထွဋ်က တန်ဆောင်တိုင်ပွဲတော်အား စက်ခလုတ်နှိပ် ဖွင့်လှစ်ပေးပြီး မီးရှူးမီးပန်းများ ပစ်ဖောက်ကာ စိန်နားပန် မီးပုံးပျံအကြီး(၂)လုံးနှင့် မီးပုံးပျံငယ်အလုံး(၂၅ဝဝ)လုံးတို့ကို လွှတ်တင်ကြသည်။
အဆိုပါ တောင်ကြီးတန်ဆောင်ပွဲတော်ကို နိုဝင်ဘာ(၄)ရက်မှ နိုဝင်ဘာ(၁၂)ရက်နေ့အထိ စည်ကား သိုက်မြိုက်စွာ ကျင်းပသွားမည်ဖြစ်ပြီး၊ တန်ဆောင်တိုင်ပွဲတော်တွင် ညလွှတ် ညမီးကြီး(၇၉)လုံး၊ စိန်နားပန်(၃၆)လုံး နှင့်နေ့လွတ်အရုပ် ခြေ(၂)ချောင်း(၁၅၀)လုံး၊ ခြေ(၄)ချောင်း(၉၄)လုံး၊ အုပ်စု(၃၅)လုံး၊ ညလွှတ်မီးပုံးပျံ စုစုပေါင်း (၁၁၅)လုံး၊ နေ့လွှတ်အရုပ် စုစုပေါင်း(၂၇၉)လုံး၊ ညလွှတ်မီးပုံးပျံနှင့် နေ့လွှတ်အရုပ်စုစုပေါင်း(၃၉၄)လုံးကို ယှဉ်ပြိုင် လွှတ်တင်သွားမည်ဖြစ်ကြောင်း သိရှိရသည်။
မောင်မောင်သန်း(တောင်ကြီး)
09250132943

တောင်ကြီး တန်ဆောင်တိုင်ပွဲတော် ပိတ်ပွဲနှင့် ဆုချီးမြှင့်ပွဲကျင်းပ

တောင်ကြီး    နိုဝင်ဘာ   -   ၁၃

272
၂၀၁၉ခုနှစ် တောင်ကြီးတန်ဆောင်တိုင်ပွဲတော် ပိတ်ပွဲနှင့် ဆုချီးမြှင့်ပွဲကို နိုဝင်ဘာ(၁၂)ရက် ညနေ(၅)နာရီက တောင်ကြီးမြို့ ကျောင်းကြီးစုရပ်ကွက်ရှိ အဝေရာကုန်းသာယာမီးပုံးပျံကွင်း၌ ကျင်းပသည်။
အခမ်းအနားတွင် တိုင်းရင်းသားရိုးရာအဖွဲ့များမှ တိုင်းရင်းသားအကများဖြင့် ကပြဖျော်ဖြေဧည့်ခံပြီး ဆုချီးမြှင့်ပွဲကျင်းပရာ တန်ဆောင်တိုင်ပွဲတော် စာပေပြိုင်ပွဲ(ဝတ္ထုတို) ပထမ၊ ဒုတိယ၊ တတိယ၊ နှစ်သိမ့်ဆုရရှိသူများ၊ စာပေပြိုင်ပွဲ(ဆောင်းပါး)ပထမ၊ ဒုတိယ၊ တတိယ၊ နှစ်သိမ့်ဆုရရှိသူများ၊ စာပေပြိုင်ပွဲ(ကဗျာ)ပထမ၊ ဒုတိယ၊ တတိယ၊ နှစ်သိမ့်ဆုရရှိသူများ၊ စာပေပြိုင်ပွဲ(ကာတွန်း)ပထမ၊ ဒုတိယ၊ တတိယ၊ နှစ်သိမ့်ဆုရရှိသူများနှင့် မီးပုံးပျံပြိုင်ပွဲဆုရရှိ သူများအားဆုချီးမြှင့်ရာ ညမီးကြီး၊ စိန်နားပန် စတုတ္ထ၊ ပဉ္စမ၊ ဂုဏ်ပြုဆုနှင့် နှစ်သိမ့်ဆုများ၊ နေ့လွှတ်ခြေ(၂)ချောင်း၊ ခြေ(၄)ချောင်း၊ အုပ်စု၊ မသိုးသင်္ကန်းရက်လုပ်ပြိုင်ပွဲ၊ မြို့လုံးကျွတ် မဟာဘုံကထိန်လှည့်လည်ပွဲ၊ မီးပဒေသာလှည့်လည် ပူဇော်ပွဲ၊ ဓါတ်ပုံပြိုင်ပွဲတွင် ပထမ၊ ဒုတိယ၊ တတိယ၊ စတုတ္ထ၊ ပဉ္စမဆုရရှိသူများနှင့် နှစ်သိမ့်ဆုရရှိသူများ၊ တန်ဆောင်တိုင်ပွဲ ဖွင့်ပွဲ၊ ပိတ်ပွဲသီချင်းပြိုင်ပွဲ ပထမနှင့် နှစ်သိမ့်ဆုရရှိသူများကို ပြည်နယ်ဝန်ကြီးများ၊ ပအိုဝ်း ကိုယ်ပိုင်အုပ်ချုပ်ခွင့်ရဒေသဦးစီးဥက္ကဌ ပြည်နယ်ဝန်ကြီးချုပ်၏ဇနီး၊ ပြည်နယ်အဆင့်တာဝန်ရှိသူများ၊ ပြည်နယ် တရားလွှတ်တော်၊ တရားသူကြီးချုပ်နှင့်ဇနီး၊ အရှေ့ပိုင်းတိုင်းစစ်ဌာနချုပ် တိုင်းမှူးနှင့်ဇနီးတို့မှ အသီးသီးဆုများ ချီးမြှင့်ပေး၍လည်းကောင်း၊ ညမီးကြီးပထမဆုရရှိသော ရေအေးကွင်းရပ်ကွက်မှ တိမ်ယံမီးကို ငွေကျပ်(၇၅)သိန်း၊ ဒုတိယဆုရရှိသော မင်္ဂလာဦးရပ်ကွက်မှ ဓါတ်ခဲ(A)မီးကို ငွေကျပ်(၆၀)သိန်း၊ တတိယဆုရရှိသော မြို့မရပ်ကွက်မှ သွေးသစ်မီးကို ငွေကျပ်(၅၀)သိန်းနှင့် စိန်နားပန်ပထမဆုရရှိသော အေးသာယာရပ်ကွက်မှ ရောင်စုံမီးကို ငွေကျပ် (၃၅)သိန်း၊ ဒုတိယဆုရရှိသော ရွှေတောင်ရပ်ကွက်မှ ဒိန်ချဉ်မီးကို ငွေကျပ်(၂၅)သိန်း၊ တတိယဆုရရှိသော ကံသာ ရပ်ကွက်မှမော့ကြည့်မီးအား ငွေကျပ်(၂၃)သိန်းတို့ကို ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာ လင်းထွဋ်နှင့် ရှမ်းပြည်နယ်လွှတ်တော်ဥက္ကဌ ဦးစိုင်းလုံးဆိုင်းတို့က ဆုများအသီးသီးချီးမြှင့်ပေးကြသည်။
ဆက်လက်၍ ရှမ်းပြည်နယ်ယဉ်ကျေးမှုအဖွဲ့က ကိန္နရီ ကိန္နရာအက၊ လက်သိုင်းအကတို့ဖြင့် ဖျော်ဖြေပြီး၊ တိုင်းရင်းသားယဉ်ကျေးမှုအဖွဲ့တို့က တန်ဆောင်တိုင်ပိတ်ပွဲသီချင်းဖြင့် ကပြဖျော်ဖြေကြကာ ပြည်နယ်ဝန်ကြီးချုပ် ဒေါက်တာလင်းထွဋ်က ၁၃၈၁ခုနှစ် တောင်ကြီးတန်ဆောင်တိုင်ပွဲတော်အား ပိတ်သိမ်းကြောင်းကြေငြာပြီး၊ ပိတ်ပွဲ အထိမ်းအမှတ် မီးရှူးမီးပန်းများပစ်ဖောက်ကာ ညမီးကြီးမီးပုံးပျံ(၁)လုံး၊ စိန်နားပန်မီးပုံးပျံ(၁)လုံးနှင့် မီကိုကော်ဖီမစ် ကုမ္ပဏီမှ မီးပုံးပျံငယ်အလုံး(၁၀၀၀)နှင့် နက်စ်ကော်ဖီမစ်ကုမ္ပဏီမှ မီးပုံးပျံငယ်အလုံး(၁၀၀၀)လုံးတို့ကို လွှတ်တင် ကြသည်။
အဆိုပါ ရှမ်းပြည်နယ် တောင်ကြီးတန်ဆောင်တိုင်ပွဲတော်တွင် မီးပုံးပျံဆုချီးမြှင့်ငွေစုစုပေါင်း (၈၂၂၃၀၀၀၀ိ/) ကျပ် ရှစ်ရာနှစ်ဆယ့်နှစ်သိန်းသုံးသောင်းတိတိနှင့် မီးပဒေသာ လှည့်လည်ပြိုင်ပွဲတွင် ချီးမြှင့်ငွေစုစုပေါင်းမှာ (၁၀၀၀၀၀၀၀ိ/) ကျပ်သိန်းတစ်ရာတိတိဖြစ်ကြောင်းသိရှိရသည်။
မောင်မောင်သန်း(တောင်ကြီး)
09 250132943

ပြည်ထောင်စုတိုင်းရင်းသားလူငယ်များ စွမ်းရည်ဖွံ့ဖြိုးရေး ဒီဂရိကောလိပ် (ရန်ကုန်နှင့်စစ်ကိုင်း) သို့တက်ရောက်မည့် ကျောင်းသား/သူများ သြဝါဒခံယူပွဲကျင်းပ

တောင်ကြီး    နိုဝင်ဘာ   -   ၄

268
ပြည်ထောင်စုတိုင်းရင်းသားလူမျိုးများ ဖွံ့ဖြိုးရေးတက္ကသိုလ် ပညာရေးဘွဲ့(၅)နှစ် သင်တန်းအမှတ်စဉ်(၈)နှင့် ပြည်ထောင်စုတိုင်းရင်းသားလူငယ်များ စွမ်းရည်ဖွံ့ဖြိုးရေး ဒီဂရိကောလိပ် (ရန်ကုန်နှင့်စစ်ကိုင်း) သို့တက်ရောက်မည့် ကျောင်းသား/ကျောင်းသူများ သြဝါဒခံယူပွဲကို နိုဝင်ဘာ(၃)ရက် မွန်းလွဲ(၁)နာရီက တောင်ကြီးမြို့ အမှတ်(၅) အခြေခံပညာအထက်တန်းကျောင်း စိန်မြင်းမိုရ်ခန်းမ၌ ကျင်းပသည်။
ရှမ်းပြည်နယ်အစိုးရအဖွဲ့ ပြည်နယ်လုံခြုံရေးနှင့်နယ်စပ်ရေးရာဝန်ကြီး ဗိုလ်မှူးကြီးလှဦးက ပြည်ထောင်စု တိုင်းရင်းသားလူမျိုးများ ဖွံ့ဖြိုးရေးတက္ကသိုလ်ကို ရည်မှန်းချက်(၇)ရပ်ချမှတ်ပြီး အကောင်အထည်ဖော် ဆောင်ရွက် လျက်ရှိရာ ပြည်ထောင်စုတိုင်းရင်းသားလူမျိုးများသည် တက္ကသိုလ်တွင် ခင်မင်ရင်းနှီးစွာ နေထိုင်လျက် ပညာရှာမှီး ကြရင်းပြည်ထောင်စုစိတ်ဓာတ် ခိုင်မြဲမှုရရှိစေရန်၊ ပြည်ထောင်စုတိုင်းရင်းသားလူမျိုးများ၏ ယဉ်ကျေးမှုနှင့်ဓလေ့ ထုံးစံကောင်းများကို ထိန်းသိမ်းရန်နှင့် နားလည်သဘောပေါက်ရန်၊ ပြည်ထောင်စုတိုင်းရင်းသား လူမျိုးများ၏ စားဝတ်နေရေး အဆင့်အတန်းမြင့်မားရေးအတွက် ဆောင်ရွက်လိုသည့် စိတ်ဓာတ်ထက်သန်စေရန်၊ ပြည်ထောင်စု တိုင်းရင်းသားလူမျိုးများ၏ဖွံ့ဖြိုးရေးကို ဆောင်ရွက်ရာတွင်လိုအပ်သည့် ဦးဆောင်မှုစွမ်းရည်မြှင့်တင်ရန်၊ ပြည်ထောင်စု တိုင်းရင်းသားလူမျိုးများ၏ ဖွံ့ဖြိုးမှုလုပ်ငန်းများ အောင်မြင်မှုကိုရှေးရှု၍ သုတေသနလုပ်ငန်းများ ဆောင်ရွက်လိုသည့် စိတ်ဓာတ်မွေးမြူပေးရန်၊ ပါတီနိုင်ငံရေးကင်းစင်ပြီး စာရိတ္တနှင့် ကိုယ်ကျင့်တရားကောင်းမွန်သော ပညာရေးဝန်ထမ်း ကောင်းများမွေးထုတ်ပေးရန်နှင့် ပြည်ထောင်စုမပြိုကွဲရေး၊ တိုင်းရင်းသားစည်းလုံးညီညွှတ်မှု မပြိုကွဲရေးနှင့် အချုပ်အခြာအာဏာ တည်တံ့ခိုင်မြဲရေးတို့ကို ထိန်းသိမ်းလိုသည့် စိတ်ဓာတ်ရှင်သန်ပွားများစေရန် စသည့်ရည်ရွယ်ချက် များချမှတ်ခဲ့ပါကြောင်း၊ ယခုနှစ်ရှမ်းပြည်နယ်(တောင်ပိုင်း)မှ ဖွံ့ဖြိုးရေး တက္ကသိုလ်တက်ရောက်ရန် သင်တန်းသား(၁၆)ဦး၊ စွမ်းရည်ဒီဂရီကောလိပ်ကို တက်ရောက်ရန်(၁၈)ဦး၊ နယ်စပ်ဒေသတိုင်းရင်းသားလူငယ်များ ဖွံ့ဖြိုးရေးသင်တန်းကျောင်း (ပင်လုံ)မှ(၂၄)ဦး၊ ဓနုကိုယ်ပိုင်အုပ်ချုပ်ခွင့်ရဒေသမှ(၁၆)ဦး၊ ပအိုဝ်းကိုယ်ပိုင်အုပ်ချုပ်ခွင့်ရဒေသမှ(၁၆)ဦးကို ရွေးချယ် စေလွှတ်ခဲ့ပြီး ရွေးချယ်ခံရမှုအပေါ်တန်ဖိုးထား၍ အတတ်ပညာ၊ အသိပညာများကို ထူးချွန်တက်မြောက်အောင် သင်ယူခဲ့ကြရန် ပြောကြားသွားသည်။
ထို့နောက် ပြည်နယ်ကိုယ်စားပြု ကျောင်းသားခေါင်းဆောင်အဖြစ် ရွေးချယ်ခြင်းခံရသော တောင်ကြီးမြို့နယ် မှမောင်အာကာမင်းခန့်က ကျောင်းသား/ကျောင်းသူများကိုယ်စား ကတိပြုစကားပြောကြားပြီး ပြည်နယ်လုံခြုံရေး နှင့်နယ်စပ်ရေးရာဝန်ကြီး ဗိုလ်မှူးကြီးလှဦးမှ ကျောင်းသား/ကျောင်းသူများအား ထောက်ပံ့ငွေပေးအပ်ခဲ့ကြောင်း သိရသည်။
အဆိုပါ ပြည်ထောင်စုတိုင်းရင်းသားလူမျိုးများ ဖွံ့ဖြိုးရေးတက္ကသိုလ်ပညာရေးဘွဲ့(၅)နှစ် သင်တန်းအမှတ်စဉ်(၈) နှင့်ပြည်ထောင်စုတိုင်းရင်းသားလူငယ်များ စွမ်းရည်ဖွံ့ဖြိုးရေးဒီဂရိကောလိပ် (ရန်ကုန်နှင့်စစ်ကိုင်း) သို့တက်ရောက်မည့် ကျောင်းသား/ကျောင်းသူများသည် တက္ကသိုလ်ဝင်တန်း အောင်မြင်ပြီးသူများဖြစ်၍ အမှတ်ဖြင့် ရွေးချယ်ထားသူများ ဖြစ်ကာ ရှမ်းပြည်နယ်(တောင်ပိုင်း) တောင်ကြီး လွိုင်လင် လင်းခေးခရိုင် ကိုယ်ပိုင်အုပ်ချုပ်ခွင့်ရဒေသ ဖြစ်သည့် ပအိုဝ်းနှင့်ဓနုတို့မှ ရွေးချယ်ထားကာ စုစုပေါင်း(၉၀)ဦး တက်ရောက်မည်ဖြစ်ကြောင်းနှင့် သင်တန်းကို ဒီဇင်ဘာလတွင် စတင်တက်ရမည်ဖြစ်ကြောင်း တာဝန်ရှိသူတစ်ဦးထံမှ သိရသည်။
မောင်မောင်သန်း(တောင်ကြီး)
09250132943

More Articles...

  1. မြန်မာနိုင်ငံလိုင်စင်ရကန်ထရိုက်တာများအသင်း(ရှမ်းပြည်နယ်)အသင်းရုံးဖွင့်ပွဲကျင်းပ
  2. ရှမ်းပြည်နယ်ဝန်ကြီးချုပ်နောင်တရားမြို့၌အစားထိုးသီးနှံပေးအပ်ပွဲတက်ရောက်
  3. ရှမ်းပြည်နယ် လယ်ယာမြေနှင့် အခြားမြေများ သိမ်းဆည်းခြင်းခံရမှုများ ပြန်လည်စိစစ်ရေးကော်မတီ လုပ်ငန်းညှိနှိုင်း အစည်းအဝေးကျင်းပ
  4. အပါတ်စဉ်(၄၂) ဆဋ္ဌမအကြိမ် သူနာပြုဒီပလိုမာ အောင်လက်မှတ်ပေးအပ်ပွဲ ကျင်းပ
  5. Wash in School ပြည်နယ်အဆင့် နည်းပြသင်တန်းဖွင့်ပွဲကျင်းပ
  6. ဆေးလိပ်ငွေ့ကင်းစင် ရှမ်းပြည်တစ်ခွင် ကျောင်းအခြေပြု မီနီမာရသွန်ပြိုင်ပွဲ ကျင်းပ
  7. Child’s Dream ကျောင်းဆောင်သစ်ဖွင့်ပွဲ ကျင်းပ
  8. Ooredoo (Myanmar) မှ လှူဒါန်းပြီး UNOPS (Myanmar) မှ တာဝန်ယူကြီးကြပ်ဆောက်လုပ်သော တောင်ကြီးမြို့နယ် ထီဟမ်းဆွေးကျေးလက်ကျန်းမာရေးဌာနခွဲ၊ ဖာမွန်းကျေးလက်ကျန်းမာရေးဌာနခွဲ အဆောက်အဦသစ်နှင့် အထောက်အကူပြုပစ္စည်းများ လွှဲပြောင်းပေးအပ်ခြင်းအခမ်းအနားကျင်းပ
  9. ပအိုဝ်းကိုယ်ပိုင်အုပ်ချုပ်ခွင့်ရဒေသ ဆီဆိုင်မြို့နယ်အတွင်း ပြန်လည်စွန့်လွတ်အပ်နှံလာသည့် မြေဧက(၂၀၀)အနက်မှ (၁၇၂.၃၉)ဧကအား မူလတောင်သူ(၄၄)ဦးထံသို့ ယာယီလုပ်ပိုင်ခွင့်ပြုလက်မှတ် ပုံစံ(၃)များပေးအပ်
  10. ညောင်ရွှေမြို့နယ် နန်းပန်ကျေးရွာတွင် ကျေးရွာမြေငှားဂရန် ပေးအပ်ပွဲကျင်းပ

Subcategories

မူလသို့

အစိုးရအဖွဲ့

သတင်းများ

ဆက်သွယ်ရန်

တိုင်းရင်းသား လူမျိုးများ

tine-liရှမ်းပြည်နယ်(အရှေ့ပိုင်း) ကျိုင်းတုံ၊  မိုင်းယောင်းနှင့် မိုင်းလားမြို့နယ်များတွင် အများဆုံး နေထိုင်ကြသည်။

We have 699 guests and no members online

Latest Updates