သတင်းများ

ရှမ်းပြည်နယ်အစိုးရအဖွဲ့ နှင့် PINE LAND OASIS REGIONAL DEVELOPMENT CO,LTD အဖွဲ့နှင့် တွေ့ဆုံ

တောင်ကြီး    နိုဝင်ဘာ   ၁

720

   ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဦးစဝ်အောင်မြတ်၊ ပြည်နယ်ဝန်ကြီးများ၊ ပြည်နယ်ဥပဒေချုပ်၊ ပြည်နယ်အစိုးရအဖွဲ့ အတွင်းရေးမှူးတို့နှင့်အတူ နိုဝင်ဘာ(၁) နံနက်(၁၀)နာရီက တောင်ကြီးမြို့ ရှမ်းပြည်နယ် အစိုးရအဖွဲ့ရုံး အစည်းအဝေးခန်းမ၌ PINE LAND OASIS REGIONAL DEVELOPMENT CO,LTD အဖွဲ့နှင့် တွေ့ဆုံကြောင်း သိရသည်။

   ပထမဦးစွာ PINE LAND OASIS REGIONAL DEVELOPMENT CO,LTD အဖွဲ့မှ မန်နေဂျင်းဒါရိုက်တာ ဦးသောင်းရွှေမှ ဖော်ထုတ်ရန်ရည်ရွယ်ထားသော PINE WOOD VILLA ခေတ်မီတိုးချဲ့ အိမ်ယာစီမံကိန်းနှင့် ပတ်သက်၍ Projector ဖြင့် ရှင်းလင်းတင်ပြကြောင်း သိရသည်။

   ဆက်လက်၍ ရှမ်းပြည်နယ်အစိုးရအဖွဲ့ ပြည်နယ်ဝန်ကြီးများနှင့် ပြည်နယ်ဥပဒေချုပ်တို့က သိရှိလိုသည်များကို မေးမြန်းဆွေးနွေးကြပြီး၊ ပြည်နယ်ဝန်ကြီးချုပ် ဦးစဝ်အောင်မြတ်က ရှင်းလင်းဆွေးနွေးရာ အချက်(၄)ချက် မှာလိုကြောင်း၊ လုပ်ငန်းဆောင်ရွက်ရာတွင် လုပ်ထုံးလုပ်နည်းဥပဒေများအတိုင်း လုပ်ကိုင်ဆောင်ရွက်ရန်နှင့် Town Plan နှင့် City  Plan ဖြင့်လုပ်ရန်၊ ထင်းရှူးပင်များကို ထိန်းသိမ်းစောင့်ရှောက်ရန်နှင့် လူမှုစီးပွားဖွံ့ဖြိုးတိုးတက်နိုင်ရန် အတွက် ရည်ရွယ်ပါက ထိခိုက်မှုမရှိအောင် ပြင်ဆင်ဆောင်ရွက်ရန်၊ ကုမ္ပဏီအနေဖြင့်ဖွံ့ဖြိုး တိုးတက်ရေးကို ဆောင်ရွက်နေသည့်အချိန်တွင် လုပ်ငန်းကို စနစ်တကျလုပ်ကိုင်ဆောင်ရွက်ရန် လိုအပ်ကြောင်း ဆွေးနွေးပြောကြားသွားကြောင်း သိရသည်။

                                                                                                                                                              မောင်မောင်သန်း(တောင်ကြီး)

ရှမ်းပြည်နယ်ဝန်ကြီးချုပ်၊ ပအိုဝ်းကိုယ်ပိုင်အုပ်ချုပ်ခွင့်ရဒေသ ဟိုပုံးမြို့တွင် လမ်း၊ တံတား၊ ရေရရှိရေး ဖွင့်ပွဲ တက်ရောက်ဖွင့်လှစ်ပေး

တောင်ကြီး   အောက်တိုဘာ   ၃၁

713

   ပအိုဝ်းကိုယ်ပိုင်အုပ်ချုပ်ခွင့်ရဒေသ ဟိုပုံးမြို့တွင် (၂၀၁၃-၂၀၁၄) ဘဏ္ဍာရေးနှစ် နယ်စပ်ရေးရာဝန်ကြီးဌာန၊ ဌာနစပ်ဒေသဖွံ့ဖြိုးရန်ပုံငွေဖြင့် ဆောင်ရွက်သော ဟိုပုံး-ရန်ကင်းလမ်း နှင့် သံကူကွန်ကရစ်တံတား(၂)စင်းဖွင့်ပွဲကို အောက်တိုဘာ(၃၁)ရက် နေ့လည်(၁၂)နာရီခွဲက အဆိုပါ လမ်းဖွင့်ပွဲမုခ်ဦး၌ ကျင်းပကြောင်း သိရသည်။

   ဟိုပုံး-ရန်ကင်းလမ်း သံကူကွန်ကရစ်တံတား(၂)စင်းကို ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဦးစဝ်အောင်မြတ်၊ ပြည်နယ်စည်ပင်သာယာရေးဝန်ကြီး ဦးစိုင်းလှဝင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသဦးစီးအဖွဲ့ဥက္ကဌ ဦးခွန်စံလွင်တို့က ဖဲကြိုးဖြတ်ဖွင့်လှစ်ပေးကြပြီး၊ လမ်းတံတားတို့ကို လှည့်လည်ကြည့်ရှုစစ်ဆေးကြကြောင်း သိရသည်။

714

   ဆက်လက်၍ ပြည်နယ်ဝန်ကြီးချုပ်၊ ပြည်နယ်တရားလွှတ်တော် တရားသူကြီးချုပ်၊ ပြည်နယ်ဝန်ကြီးများနှင့် တာဝန်ရှိသူတို့သည် ဟိုပုံးမြို့၊ ရေရရှိရေးအတွက် ဂျပန်အစိုးရနှင့် ပြည်သူ များ၏ ထောက်ပံ့ငွေဖြင့် မြို့ရေရရှိရေးကော်မတီမှ ဆောင်ရွက်ခဲ့သော မြို့ရေပေးရေးဖွင့်ပွဲသို့ ရောက်ရှိလာရာ ဖွင့်ပွဲကို ရှမ်းပြည်နယ်အစိုးရအဖွဲ့ ပြည်နယ်စည်ပင်သာယာရေးဝန်ကြီး ဦးစိုင်းလှဝင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသဦးစီးအဖွဲ့ဥက္ကဌ ဦးခွန်စံလွင်၊ ဂျပန်သံရုံး ပထမအတွင်းဝန်(Mr.MATSUOKA YUSUKE)တို့က ဖဲကြိုးဖြတ်ဖွင့်လှစ်ပေးပြီး၊ ပြည်နယ်ဝန်ကြီးချုပ် ဦးစဝ်အောင်မြတ်က အထိမ်းအမှတ်ကမ္ဗည်းမော်ကွန်းအား စက်ခလုတ်နှိပ်၍ ဖွင့်လှစ်ပေးကာ ပြည်နယ်ဝန်ကြီးနှင့် တာဝန်ရှိသူတို့က ကမ္ဗည်းမော်ကွန်းကို အမွှေးနံ့သာရေများ ပက်ဖျန်းပေးကြကြောင်း သိရသည်။

715

   ထို့နောက် အခမ်းအနားဒုတိယပိုင်းတွင် ပြည်နယ်ဝန်ကြီးချုပ် ဦးစဝ်အောင်မြတ်နှင့် ပအိုဝ်း ကိုယ်ပိုင်အုပ်ချုပ်ခွင့်ရဒေသဦးစီးအဖွဲ့ဥက္ကဌ ဦးခွန်စံလွင်တို့က အမှာစကားပြောကြားပြီး၊ ဟိုပုံးမြို့ ရေပေးရေးလုပ်ငန်းဆောင်ရွက်မှုများနှင့် ပတ်သက်၍ ဂျပန်သံရုံး ပထမအတွင်းဝန် (Mr.MATSUOKA YUSUKE)မှ ရှင်းလင်းတင်ပြကာ မြို့ရေရရှိခြင်းကြောင့် မြို့လူထုကိုယ်စား ဒေသခံတစ်ဦးမှ ကျေးဇူးတင်စကား ပြန်လည်ပြောကြားကြောင်းသိရသည်။

716

   ၎င်းနောက် ရေပေးရေးဖွင့်ပွဲအထိမ်းအမှတ်လက်ဆောင်ပေးအပ်ရာ ပြည်နယ်စည်ပင်သာယာရေး ညွှန်ကြားရေးမှူး ဦးစိုင်းထွန်းထွန်းမှ ပေးအပ်ရာ ပြည်နယ်ဝန်ကြီးချုပ် ဦးစဝ်အောင်မြတ်နှင့် တာဝန်ရှိသူတို့က အသီးသီးလက်ခံရယူကြပြီး၊ ပြည်နယ်ဝန်ကြီးချုပ်နှင့် တာဝန်ရှိသူတို့သည် လုပ်ငန်းဆောင်ရွက်မှုမှတ်တမ်း ဓါတ်ပုံများအား လှည့်လည်ကြည့်ရှုကြပြီး၊ ဒေသခံပြည်သူများကို နှုတ်ဆက်ကြကြောင်း သိရသည်။

   ယင်းနောက် ပြည်နယ်ဝန်ကြီးချုပ်နှင့် တာဝန်ရှိသူတို့သည် (၂၀၁၄-၂၀၁၅) ဘဏ္ဍာရေးနှစ်၊ မွေးမြူရေးလုပ်ငန်းနှင့် ကျေးလက်ဒေသဖွံ့ဖြိုးရေးဝန်ကြီးဌာန ခွင့်ပြုရန်ပုံငွေဖြင့် ဖောက်လုပ်သည့် ဟိုပုံး-ကုန်းသာ- ချေးပေး၊ ဘန့်ပိန်း-ဟိုနားလမ်းအရှည်(၆)မိုင်(၂)ဖာလုံရှိသည့် မြေသားလမ်းဖွင့်ပွဲသို့ တက်ရောက်ရာ ဖွင့်ပွဲတွင် ရှမ်းပြည်နယ်အစိုးရအဖွဲ့ ပြည်နယ်လမ်းပန်းဆက်သွယ်ရေးဝန်ကြီး ဦးစိုင်းနော်ခမ်း၊ ပြည်နယ်စည်ပင်သာယာရေးဝန်ကြီး ဦးစိုင်းလှဝင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသဦးစီးအဖွဲ့ဥက္ကဌ ဦးခွန်စံလွင်တို့က ဖဲကြိုးဖြတ်ဖွင့်လှစ်ပေးပြီး၊ ဒေသခံများမှ ပြည်နယ်ဝန်ကြီးချုပ်နှင့် တာဝန်ရှိသူတို့ကို အမှတ်တရလက်ဆောင်ပေးအပ်ကြကြောင်း သိရသည်။

717

   ထိုမှတဆင့် ပြည်နယ်ဝန်ကြီးချုပ်နှင့် တာဝန်ရှိသူတို့သည် (၂၀၁၃-၂၀၁၄)ဘဏ္ဍာရေးနှစ်တွင် နယ်စပ်ဒေသနှင့်တိုင်းရင်းသားလူမျိုးများဖွံ့ဖြိုးတိုးတက်ရေးဦးစီးဌာနမှ ခွင့်ပြုရန်ပုံငွေဖြင့် ဖောက်လုပ်သည့် ဟိုပုံး-ကောင်စေတီ- လိုက်ကန်-ရွာသစ် လမ်းအရှည်(၄)မိုင်ရှိသည့် မြေသားလမ်း ဖွင့်ပွဲသို့ ရောက်ရှိလာရာ ဖွင့်ပွဲကို ပြည်နယ်ဝန်ကြီးချုပ် ဦးစဝ်အောင်မြတ်၊ ပအိုဝ်းကိုယ်ပိုင်အုပ်ချုပ်ခွင့်ရဒေသဦးစီးအဖွဲ့ ဥက္ကဌ ဦးခွန်စံလွင်၊ နယ်စပ်ဒေသနှင့် တိုင်းရင်းသား လူမျိုးများဖွံ့ဖြိုးတိုးတက်ရေးဦးစီးဌာနမှ တာဝန်ရှိသူတစ်ဦးတို့က ဖဲကြိုးဖြတ်ဖွင့်လှစ်ပေးကြပြီး၊ ဒေသခံများမှ အမှတ်တရလက်ဆောင်များပေးအပ်၍ ဒေသခံပြည်သူများကို ပြည်နယ်ဝန်ကြီးချုပ်နှင့် တာဝန်ရှိသူတို့က ရင်းရင်းနှီးနှီး မိတ်ဆက်စကားပြောကြားကြောင်း သိရသည်။

718

   ဆက်လက်၍ ပြည်နယ်ဝန်ကြီးချုပ် နှင့် တာဝန်ရှိသူတို့သည် ဟိုပုံးရေထွက်သို့ ရောက်ရှိလာရာ ဟိုပုံးရေထွက်ကြီး သန့်ရှင်းသာယာလှပရေးအတွက် စျေးဆိုင်ခန်းများချထားနိုင်ရေးကို ကြည့်ရှုစစ်ဆေး၍ လိုအပ်သည်များ မှာကြားပြီး၊ ဆက်လက်ထွက်ခွာလာရာ ပအိုဝ်းကိုယ်ပိုင်အုပ်ချုပ်ခွင့်ရဒေသဦးစီးအဖွဲ့ခန်းမ၌ ဒေသဦးစီးအဖွဲ့ ဥက္ကဌနှင့်အဖွဲ့ဝင်များ၊ ဌာနဆိုင်ရာများနှင့် တွေ့ဆုံရာ ပအိုဝ်းကိုယ်ပိုင်အုပ်ချုပ်ခွင့်ရဒေသဦးစီးအဖွဲ့ ဥက္ကဌ ဦးခွန်စံလွင်မှ ဒေသဖွံ့ဖြိုးရေးလုပ်ငန်းများနှင့် ဒေသဦးစီးရုံးမြေနေရာဧက(၇၀)အတွင်း အဆောက်အဦများဆောက်လုပ်မှု အခြေအနေအား ရှင်းလင်းတင်ပြပြီး၊ ပြည်နယ်တရားလွှတ်တော် တရားသူကြီးချုပ် ဦးကြွယ်ကြွယ်မှ တရားရေးဆိုင်ရာကိစ္စရပ်များနှင့် ပြည်နယ်ဥပဒေချုပ် ဦးမောင်မောင်မှ ဥပဒေဆိုင်ရာ ကိစ္စရပ်များ၊ ပြည်နယ်စာရင်းစစ်ချုပ်မှ စာရင်းအင်းဆိုင်ရာကိစ္စရပ်များကို ရှင်းလင်းတင်ပြကြကြောင်း သိရသည်။

719

   ၎င်းနောက်ပြည်နယ်ဝန်ကြီးချုပ် ဦးစဝ်အောင်မြတ်မှ ပအိုဝ်းကိုယ်ပိုင်အုပ်ချုပ်ခွင့်ရဒေသဦးစီးအဖွဲ့၊ မြို့နယ်အဆင့် ဌာနဆိုင်ရာများ၊ ကော်မတီ(၃)ရပ်မှ တာဝန်ရှိသူများအား လမ်းညွှန်အမှာစကားပြောကြားခဲ့ကြောင်း သိရသည်။

                                                                                                                                                           မောင်မောင်သန်း(တောင်ကြီး)

 

ကလေးသူငယ်အခွင့်အရေးများဆိုင်ရာ အသိဖလှယ်ဆွေးနွေးပွဲကျင်းပ

တောင်ကြီး အောက်တိုဘာ - ၂၄

699

   လူမှုဝန်ထမ်းရုံးနှင့် Save The Children ပူးပေါင်းပြုလုပ်သောကလေးသူငယ်အခွင့်အရေးများ ဆိုင်ရာ အသိဖလှယ် ဆွေးနွေးပွဲကို အောက်တိုဘာ(၂၄)ရက် နံနက်(၉)နာရီက တောင်ကြီးမြို့၊ မြန်မာနိုင်ငံ ဆရာဝန်များအသင်းရုံး၌ ကျင်းပကြောင်း သိရသည်။

   ကုလသမဂ္ဂကလေးသူငယ်အခွင့်အရေးများဆိုင်ရာ သဘောတူစာချုပ်ပါ အချက်အလက်များနှင့် ကလေးသူငယ် ဥပဒေ ပါပြဌာန်းချက်များကို လက်ရှိအခြေအနေထက် ပိုမိုလေ့လာသိရှိခွင့် ရရှိရေးအတွက် တိုးမြှင့်ဆောင်ရွက်သွားရန်လိုကြောင်း၊ ကုလသမဂ္ဂသဘောတူညီချက်များနှင့် မြန်မာနိုင်ငံကလေးသူငယ် ဥပဒေပါပြဌာန်းချက်များကို သက်ဆိုင်ရာဌာနဆိုင်ရာများ၊ ရပ်ရွာပြည်သူလူထုအပါအဝင် လူကြီးမိဘများ အားလုံးက သိရှိလိုက်နာဆောင်ရွက်ရန်လိုကြောင်း၊ ပြည်သူ့ကိုယ်စားလှယ်များ ဖြစ်သည့် လွှတ်တော် ကိုယ်စားလှယ်များအနေဖြင့် မိမိတို့ဒေသရှိ ကလေးသူငယ်အခွင့်ရေးဆိုင်ရာ ကိစ္စရပ်၌ ပြည်သူလူထုများ သိရှိပူးပေါင်းဆောင်ရွက်နိုင်အောင် ဦးစီးဆောင်ရွက်သွားရေးအတွက် အသိဖလှယ်ဆွေးနွေးပွဲများကို ပြုလုပ်ဆောင်ရွက်ရခြင်း ဖြစ်ကြောင်း၊ အနာဂတ်ကို ဖန်တီးတည်ဆောက်ကြမည့် ကလေးသူငယ်လူငယ် မျိုးဆက်သစ်များ၏ အကောင်းဆုံးအကျိုး စီးပွားကို ဖော်ဆောင်၍ ကလေးများနှင့် လိုက်ဖက်သည့် ဖွံ့ဖြိုးတိုးတက်ပြီး၊ အေးချမ်းသာယာသော ပတ်ဝန်းကျင်ကောင်း ဖြစ်လာစေရန် ပြည်သူ့ကိုယ်စားလှယ်များ အပါအဝင် အားလုံးလက်တွဲညီညီဆောင်ရွက်ကြရန် ရှမ်းပြည်နယ်အစိုးရအဖွဲ့၊ ရှမ်းပြည်နယ်ကလေးသူငယ် အခွင့်အရေးများဆိုင်ရာကော်မတီဥက္ကဌ၊ ပြည်နယ်လူမှုရေးဝန်ကြီး ဒေါက်တာမျိုးထွန်းကအဖွင့် အမှာစကား၌ ပြောကြားသွားကြောင်းသိရသည်။

   ဆက်လက်၍ Save The Childrenအဖွဲ့၊ ညွှန်ကြားရေးမှူး ဦးမောင်မောင်လွင်က ကလေးသူငယ် အခွင့်အရေးများ ဆိုင်ရာ အဆင့်ဆင့်တာဝန်ရှိသူများနှင့် ကလေးသူငယ်များဆိုင်ရာ ဥပဒေများ၊ နည်းဥပဒေများ၊ လုပ်ငန်းဆိုင်ရာအစီရင်ခံစာ တင်ပြချက် အကြံပြုချက်များနှင့် ဆိုင်သောအချက်အလက် များအကြောင်းဆွေးနွေးသွားမည်ဖြစ်ကြောင်း၊ ရှင်းလင်း ပြောကြားပြီး၊ ကလေးသူငယ်အခွင့်အရေးများ ဆိုင်ရာ အသိဖလှယ်ဆွေးနွေးပွဲကို အောက်တိုဘာ(၂၄)ရက်မှ (၂၅)ရက်နေ့ထိ ဆွေးနွေး သွားမည်ဖြစ်ပြီး၊ ဆွေးနွေးပွဲတွင် သက်ဆိုင်ရာပြည်နယ်အဆင့် ဌာနဆိုင်ရာတာဝန်ရှိသူများ၊ ပြည်နယ်လွှတ်တော် ကိုယ်စားလှယ်များ၊ လူမူရေးအသင်းအဖွဲ့များ တက်ရောက်ကြကြောင်း သိရသည်။

မောင်မောင်သန်း(တောင်ကြီး)

 

မြိုင်မြိုင်ဆိုင်ဆိုင်တောင်ကြီးတန်ဆောင်တိုင်ပွဲတော်ဖွင့်ပွဲကျင်းပ

တောင်ကြီး အောက်တိုဘာ - ၃၀

707

   ၂၀၁၄ ခုနှစ်၊ ရှမ်းပြည်နယ်တောင်ကြီးမြို့ တန်ဆောင်တိုင်ပွဲတော် ဖွင့်ပွဲကို အောက်တိုဘာ(၃၀)ရက် ညနေ(၅)နာရီက ကျင်းပရာ ပထမဦးစွာ ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဦးစဝ်အောင်မြတ်နှင့် ဇနီးဒေါ်ဖြူဖြူညွှန့်၊ အရှေ့ပိုင်းတိုင်းစစ်ဌာနချုပ် တိုင်းမှူးဗိုလ်ချုပ်အေးဝင်း နှင့် ဇနီးဒေါ်ဌေးဌေးဝင်း၊ ပြည်နယ်တရားလွှတ်တော် တရားသူကြီးချုပ်၊ ပြည်နယ်ဝန်ကြီးများ၊ ပြည်နယ် ဥပဒေချုပ်၊ တိုင်းရင်းသားရေးရာ ဝန်ကြီးများ၊ ပြည်နယ်အစိုးရအဖွဲ့ အတွင်းရေးမှူး၊ ပြည်နယ် စာရင်းစစ်ချုပ်၊ ပြည်နယ်၊ ခရိုင်၊ မြို့နယ်အဆင့်ဌာန ဆိုင်ရာများ၊ မိဘပြည်သူများတို့က စူဠာမုနိလောကချမ်းသာ ဘုရားရင်ပြင်တော်ပေါ်တွင် စိန်နားပန်၊ မီးပုံးပျံတစ်လုံး ကို လွှတ်တင်ပူဇော်ပေးကြကြောင်းသိရသည်။

708

   ဆက်လက်၍ ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဦးစဝ်အောင်မြတ်နှင့် ဇနီးဒေါ်ဖြူဖြူညွှန့်၊ အရှေ့ပိုင်းတိုင်းစစ်ဌာနချုပ် တိုင်းမှူးဗိုလ်ချုပ်အေးဝင်းနှင့် ဇနီးဒေါ်ဌေးဌေးဝင်း၊ ပြည်နယ်တရားလွှတ်တော် တရားသူကြီးချုပ်၊ ပြည်နယ်ဝန်ကြီးများ၊ ပြည်နယ်ဥပဒေချုပ်၊ တိုင်းရင်းသားရေးရာဝန်ကြီးများ၊ ပြည်နယ်အစိုးရအဖွဲ့ အတွင်းရေးမှူး၊ ပြည်နယ်စာရင်းစစ်ချုပ်၊ ပြည်နယ်အဆင့်ဌာနဆိုင်ရာများတို့သည်၊ အဝေရာကုန်းသာယာမီးပုံးပျံကွင်းသို့ ရောက်ရှိနေရာယူပြီး၊ တန်ဆောင်တိုင်ပွဲတော်ကျင်းပရေးဦးစီးကော်မတီ ဥက္ကဌ၊ ရှမ်းပြည်နယ်အစိုးရအဖွဲ့ ပြည်နယ်လူမှုရေးဝန်ကြီး၊ ဒေါက်တာမျိုးထွန်းနှင့် မီးပုံးပျံပြိုင်ပွဲ၊ ဖွင့်ပွဲပိတ်ပွဲကျင်းပရေး လုပ်ငန်းကော်မတီဥက္ကဌ ရှမ်းပြည်နယ်အစိုးရအဖွဲ့၊ ပြည်နယ်လျှပ်စစ်နှင့် စက်မှုလက်မှုဝန်ကြီး ဦးစိုင်းထွန်းရင်တို့က မီးပုံးပျံပွဲတော်ကို ဖဲကြိုဖြတ်ဖွင့်လှစ် ပေးကြကြောင်းသိရသည်။

709

   ထို့နောက်ရှမ်းပြည်နယ်ယဉ်ကျေးမှုအဖွဲ့က ကိန္နရီ ကိန္နရာအကနှင့် ဓားသိုင်းအကိတို့ဖြင့် ကပြဖျော်ဖြေပြီး၊ တောင်ကြီး ပညာရေးကောလိပ်ကျောင်းမှ သင်တန်းသူလေးများနှင့် ရှမ်းပြည်နယ်တိုင်းရင်းသားယဉ်ကျေးမှုအဖွဲ့များ က တန်ဆောင်တိုင်ကို လာခဲ့ပါသီချင်းဖြင့် ကပြဖျော်ဖြေကြသည်။ ဆက်လက်၍ ကျောင်းသား၊ ကျောင်းသူလေးများ က မီးပုံးကလေးများဖြင့် ရှမ်းပြည်နယ်ကိုယ်စားပြု ရှမ်းအလံပုံဖော်ခြင်း၊ အင်းသားလေလှော်ပုံဖော်ခြင်း၊ မီးပုံးပျံလွှတ်တင်ပုံဖော်ခြင်းတို့ဖြင့် သရုပ်ဖော် ကပြကြသည်။ 

710

   ၎င်းနောက်တောင်ကြီးမြို့ တန်ဆောင်တိုင်မီးပုံးပျံလွှတ်တင်ပွဲတော်ကို တန်ဆောင်တိုင်ပွဲတော်ကျင်းပရေး ဦးစီးကော်မတီ နာယကရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဦးစဝ်အောင်မြတ်မှ စက်ခလုတ်နှိပ်၍ မီးရှုးမီးပန်းများပစ်လွှတ် ဖွင့်လှစ်ပေးပြီး၊ စိန်နားပန်မီးပုံးပျံအကြီး(၃)လုံးလွှတ်ခြင်းနှင့် မီးပုံးပျံငယ်(၁၅၀၀)လုံး လွှတ်တင် ကြကြောင်းသိရှိရသည်။ 

711

   အဆိုပါအခမ်းအနားသို့ ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဦးစဝ်အောင်မြတ်နှင့် ဇနီးဒေါ်ဖြူဖြူညွှန့်၊ အရှေ့ပိုင်းတိုင်းစစ်ဌာနချုပ် တိုင်းမှူးဗိုလ်ချုပ်အေးဝင်းနှင့် ဇနီးဒေါ်ဌေးဌေးဝင်း၊ ပြည်နယ်တရားလွှတ်တော် တရားသူကြီးချုပ်နှင့် ဇနီး၊ ပြည်နယ်ဝန်ကြီးများနှင့် ဇနီးများ၊ ပြည်နယ်ဥပဒေချုပ်နှင့် ဇနီး၊ တိုင်းရင်းသားရေးရာဝန်ကြီးများ၊ ပြည်နယ်အစိုးရအဖွဲ့ အတွင်းရေးမှူးနှင့် ဇနီး၊ ပြည်နယ်စာရင်းစစ်ချုပ်နှင့် ဇနီး၊ တိုင်းစစ်ဌာနချုပ်မှ ဦးစီးအရာရှိများ၊ ပြည်နယ်၊ ခရိုင်၊ မြို့နယ်အဆင့်ဌာနဆိုင်ရာ များ၊ ရပ်ကွက်အုပ်ချုပ်ရေးမှူးများ၊ ဧည့်သည်တော်များနှင့် ဒေသခံမိဘပြည်သူများ တက်ရောက်ကြကြောင်းသိရသည်။

712

                                                                                                                                                                 မောင်မောင်သန်း(တောင်ကြီး)

 

(၁၆)ကြိမ်မြောက် ကမ္ဗောဇသာမဏေကျော် စာမေးပွဲ စာအောင်ဘွဲ့နှင်းသဘင် ကျင်းပ

တောင်ကြီး   အောက်တိုဘာ   ၂၁

698

   (၁၆)ကြိမ်မြောက် ကမ္ဗောဇသာမဏေကျော် စာမေးပွဲ စာအောင်ဘွဲ့နှင်းသဘင် အခမ်းအနားကို  အောက်တိုဘာ(၂၁)ရက် မွန်းလွှဲ(၁)နာရီက ရှမ်းပြည်နယ် တောင်ကြီးမြို့၊ အတုလမာရဇိန် ဆုတောင်းပြည့် မြတ်စွာဘုရား မြို့လယ် ဓမ္မာရုံ၌ ကျင်းပကြောင်း သိရသည်။

   ပထမဦးစွာ အခမ်းအနားကို ဆရာတော်/သံဃာတော်နှင့် ဧည့်ပရိတ်သတ်အပေါင်းတို့က "နမော တဿ"သုံးကြိမ်ဘုရားကန်တော့၍ ဖွင့်လှစ်ပြီး၊ နိုင်ငံတော် သြဝါဒါစရိယ အဂ္ဂမဟာပဏ္ဍိတ၊ မဟာကမ္မဌာနာစရိယ၊ စွန်းလွန်းကျောင်းတိုက် ဦးစီးပဓာန မဟာနာယက ဘဒ္ဒန္တအဂ္ဂဓမ္မာဘိဝံသ အရှင်သူမြတ်ထံမှ ငါးပါးသီလ ခံယူဆောက်တည်ကြကြောင်း သိရသည်။

   ဆက်လက်၍ မြို့လယ်ဓမ္မာရုံ ဂေါပကအဖွဲ့ ဥက္ကဌ ဦးစွန်ကြိုင်က (၁၆)ကြိမ်မြောက် ကမ္ဗောဇ သာမဏေကျော် စာမေးပွဲ ကျင်းပအောင်မြင်မှုအခြေအနေများကို တင်ပြလျှောက်ထားသည်။

   ထို့နောက် ကမ္ဗောဇ သာမဏေကျော်ဘွဲ့ရ "သာမဏေကျော်များ"ကို ပြည်နယ်တရား လွှတ်တော် တရားသူကြီးချုပ်၊ ရှမ်းပြည်နယ်အစိုးရအဖွဲ့ဝင် ပြည်နယ် စီမံကိန်းနှင့် စီးပွားရေး ဝန်ကြီး၊ ပြည်နယ်လျှပ်စစ်နှင့် စက်မှုလက်မှုဝန်ကြီး၊ ပြည်နယ်ဥပဒေချုပ်၊ ပြည်နယ်စာရင်းစစ်ချုပ်၊ ဓမ္မာရုံဂေါပကအဖွဲ့ဝင်များနှင့် မြို့နယ်အဆင့်ဌာနဆိုင်ရာ တာဝန်ရှိသူတို့က ဘွဲ့ပုံတော်၊ ဘွဲ့တံဆိပ်တော်၊ ဘွဲ့အလံတော်များ၊ စာမေးပွဲအဆင့်အလိုက် အောင်လက်မှတ် စာအောင်ဆုများ တို့ကို အသီးသီးဆက်ကပ်ပေးကြကြောင်း သိရသည်။

   ၎င်းနောက် ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ်၏ ဇနီး ဒေါ်ဖြူဖြူညွှန့်မှ နိုင်ငံတော် သြဝါဒါစရိယ အဂ္ဂမဟာပဏ္ဍိတ၊ မဟာကမ္မဌာနာစရိယ၊ စွန်းလွန်းကျောင်းတိုက် ဦးစီးပဓာန မဟာနာယက ဘဒ္ဒန္တအဂ္ဂဓမ္မာဘိဝံသအား လှူဖွယ်ပစ္စည်းများ ဆက်ကပ်လှူဒါန်းပြီး၊ လှူဒါန်းမှု အစုစုတို့အတွက် ရေစက်သွန်းချအမျှပေးဝေကာ အခမ်းအနားကို "ဗုဒ္ဓသာသနံ စိရံ တိဌတု" သုံးကြိမ်ရွတ်ဆိုဆုတောင်း၍ ရုပ်သိမ်းလိုက်ကြောင်း သိရှိရသည်။

   (၁၆)ကြိမ်မြောက် ကမ္ဗောဇ သာမဏေကျော် စာမေးပွဲတွင် တိုင်းဒေသကြီးနှင့် ပြည်နယ်တို့မှ စာဖြေသည့်သာမဏေ အပါးပေါင်း(၇၃၃)ပါးရှိပြီး၊ ပထမအဆင့် ဝင်ရောက်ဖြေဆိုသော စာရင်းသွင်း သာမဏေအပါး(၅၆၈)ပါး၊ ဖြေဆိုသည့်သာမဏေ(၄၁၈)ပါး၊ အောင်မြင်သည့်သာမဏေ(၉၁)ပါး၊ ဒုတိယအဆင့်ဝင်ရောက်ဖြေဆိုသော စာရင်းသွင်းသာမဏေအပါး(၂၉၁)ပါး၊ ဖြေဆိုသည့် သာမဏေ (၂၄၀)ပါး၊ အောင်မြင်သည့်သာမဏေ(၃၇)ပါး၊ တတိယအဆင့် ဝင်ရောက်ဖြေဆိုသော စာရင်းသွင်း သာမဏေအပါး(၈၆)ပါး၊ ဖြေဆိုသည့်သာမဏေ(၇၅)ပါး၊ အောင်မြင်သည့်သာမဏေ(၁၃)ပါး၊ စုစုပေါင်း(၁၄၁)ပါး အောင်မြင်ကြောင်း၊ မြို့လယ်ဓမ္မာရုံ ဂေါပကအဖွဲ့ဝင်တစ်ဦးမှ ပြောကြားကြောင်း သိရသည်။

   အခမ်းအနားသို့ ရှမ်းပြည်နယ်အစိုးရအဖွဲ့ပြည်နယ်ဝန်ကြီးချုပ်၏ ဇနီး၊ ပြည်နယ် တရား လွှတ်တော် တရားသူကြီးချုပ်၊ ပြည်နယ်ဝန်ကြီးများ၊ ပြည်နယ်ဥပဒေချုပ်၊ ပြည်နယ် စာရင်းစစ်ချုပ်၊ မြို့နယ်အဆင့်ဌာနဆိုင်ရာ တာဝန်ရှိသူများ၊ ဓမ္မာရုံ ဂေါပကအဖွဲ့များ၊ လူမှုရေး အသင်းအဖွဲ့များ၊ ဓမ္မာစင်္ကြာဝတ်အသင်းများ၊ ရပ်ကွက်အုပ်ချုပ်ရေးမှူးများ၊ ဆရာ/ဆရာမများ၊ ကင်းထောက် အဖွဲ့များ၊ ကျောင်းသား/ကျောင်းသူများ၊ ဖိတ်ကြားထားသည့် ဧည့်သည်တော်များ တက်ရောက်ကြ ကြောင်း သိရသည်။

                                                                                                                                                                       မောင်မောင်သန်း(တောင်ကြီး)

 

(၃၄)ကြိမ်မြောက်ရွှေညောင်မြို့၊ မြို့လုံးကျွတ်စုပေါင်းမဟာဘုံကထိန် ပွဲတော်ကျင်းပ

တောင်ကြီး အောက်တိုဘာ - ၂၇

   ရှမ်းပြည်နယ်(တောင်ပိုင်း)ရွှေညောင်မြို့တွင်(၃၄)ကြိမ်မြောက်မြို့လုံးကျွတ် စုပေါင်းမဟာဘုံကထိန်ပွဲ ကို အောက်တိုဘာ (၂၇)ရက် နံနက်(၇)နာရီက ရွှေညောင်မြို့တွင်းနှင့် ပြည်ထောင်စုလမ်းမကြီးတစ်လျှောက် ရပ်ကွက်ပြည်သူများက ပဒေသာပင်ပေါင်း (၇၉)ပင်ဖြင့် တစ်ပျော်တစ်ပါးလှည့်လည်ကြပြီး၊ ရွှေညောင်မြို့ ဒဏ္ခိဏာရာမကျောင်းတိုက်သို့ ပို့ဆောင် ကြကြောင်းသိရသည်။

704

   (၃၄)ကြိမ်မြောက်ရွှေညောင်မြို့၊ မြို့လုံးကျွတ်စုပေါင်းမဟာဘုံကထိန်ပွဲတွင် တောင်ကြီး၊ ညောင်ရွှေ၊ ရွှေညောင်၊ ဟဲဟိုး၊ ရပ်စောက်မြို့နယ်အတွင်းရှိ သံဃာပေါင်း (၁၄၈)ပါး၊ ကျောင်းပေါင်း(၈၈)ကျောင်းတို့မှ ဆရာတော်သံဃာတော်များ တက်ရောက် ကြည်ညိုကြပြီး၊ ပဒေသာပင်ပေါင်း(၇၉)ပင် ပစ္စည်းတန်းဖိုး ငွေကျပ်သိန်း(၅၀)ခန့် ငွေတန်းဖိုးကျပ်သိန်း(၁၁၀) ကျော်ရရှိကြောင်းသိရပြီး၊ မြို့လုံးကျွတ်စုပေါင်းမဟာ ဘုံကထိန်းပွဲတော်ဖြစ်မြောက်ရေးဦးစီးကော်မတီမှ ငွေကျပ်သိန်း(၆၀)ခန့် အကုန်ကျခံ၍ ဆရာတော် သံဃာတော်များကို နေ့ဆွမ်း၊ ခဲဖွယ်များ၊ လှူဖွယ်ဝတ္တုပစ္စည်းများ ဆက်ကပ်လှူဒါန်းကြပြီး၊ လူဧည့် ပရိတ်သတ်အပေါင်း(၅၀၀၀)ကျော်ကို ထမင်း၊ ဟင်းလျားများဖြင့် ဧည့်ခံကျွေးမွေးကြကာ၊ ရွှေညောင်မြို့၊ မြို့လုံးကျွတ် စုပေါင်းမဟာဘုံကထိန်ဖြစ်ပေါ်လာပုံ သမိုင်းအကျဉ်းကို မြို့လုံးကျွတ်စုပေါင်းမဟာဘုံကထိန်ပွဲ ဦးစီးကော်မတီနာယက ရွှေညောင်မြို့ ရပ်ကွက်အုပ်ချုပ်ရေးမှူး ဥက္ကဌ ဦးဇော်ဇော်မှ ပြောကြားသွားကြောင်း သိရသည်။

705

   အဆိုပါ(၃၄)ကြိမ်မြောက်ရွှေညောင်မြို့၊ မြို့လုံးကျွတ်စုပေါင်းမဟာဘုံကထိန်ပွဲကို (၂၅.၁၀.၂၀၁၄) ရက်နေ့ ညနေ (၆)နာရီက မီးပဒေသာပင်ပေါင်း(၃၄)ပင်ကို ပြည်သူများက စုရပ်မှ မြို့တွင်းလမ်းနှင့် ပြည်ထောင်စုလမ်းမကြီး တစ်လျှောက် တစ်ပျော်တစ်ပါးလှည့်လည်၍ မီးရှုးမီးပန်းများ လွှတ်တင်ပူဇော် ကြကြောင်းသိရှိရသည်။

706

   ထို့နောက် မြို့လုံးကျွတ်မဟာဘုံကထိန်းရေစက်ချ တရားတော်နာယူကြရာ ပထမဦးစွာ ဆရာတော်၊ သံဃာတော်များ ဧည့်ပရိတ်သတ်တို့က နမောတဿသုံးကြိမ် ဘုရားကန်တော့၍ ဖွင့်လှစ်ပြီး၊ ဒဏ္ခိဏာရာဆရာတော် ဦးသုန္ဒရထံမှ ငါးပါးသီလခံယူဆောက်တည်ကြ၍ သံဃာတော်အရှင်သူမြတ်များမှ ရွတ်ဖတ် တရဇ္စျာယ်တော်မူသော ပရိတ်တရားတော်ကို နာယူကြကြောင်း သိရသည်။

   ဆက်လက်၍ ဓနသိဒ္စိရပ်ကွက်အုပ်ချုပ်ရေးမှူး ဦးဝင်းရွှေမှ ဒဏ္ခိဏာရာဆရာတော်ကြီးထံသို့ ကထိန်လျာသင်္ကန်းကို ဆက်ကပ်လှူဒါန်းကြပြီး၊ ပင့်သံဃာတော်များအားလှူဖွယ် ဝတ္တုအစုစုတို့ကို ဆက်ကပ်လှူဒါန်း၍ ညမီးပဒေသာပင် လှည့်လည်ပူဇော်ကြသည့် ရပ်ကွက်အလိုက်ပြည်သူများကို စာချဆရာတော်ဦးပညာသာမိမှ ဂုဏ်ပြုမှတ်တမ်းလွှာများပေးအပ် ကာ လှူဒါန်းမှုအစုစုအတွက် အနုမောဒနာတရားနာယူ၍ ရေစက်သွန်းချအမျှပေးဝေကြကြောင်းသိရသည်။

မောင်မောင်သန်း(တောင်ကြီး)

 

ရှမ်းပြည်နယ်ရှိ အစိုးရဝန်ထမ်းများအတွက် လူ့အခွင့်အရေးဆိုင်ရာ အလုပ်ရုံသင်တန်းဖွင့်

တောင်ကြီး   အောက်တိုဘာ - ၂၀

696

   မြန်မာနိုင်ငံ အမျိုးသားလူ့အခွင့်အရေးကော်မရှင်၊ ရှမ်းပြည်နယ်ရှိ အစိုးရဝန်ထမ်းများ အတွက် လူ့အခွင့်အရေးဆိုင်ရာ အလုပ်ရုံသင်တန်းကို အောက်တိုဘာ(၂၀)ရက် နံနက်(၉)နာရီက တောင်ကြီးမြို့၊ မြန်မာနိုင်ငံဆရာဝန်များအသင်းရုံး၌ ကျင်းပကြောင်း သိရသည်။

697

   အခမ်းအနားတွင် ရှမ်းပြည်နယ်အစိုးရအဖွဲ့ဝင် ပြည်နယ်ဥပဒေချုပ် ဦးမောင်မောင်က အဖွင့် အမှာစကားပြောကြားပြီး၊ မြန်မာနိုင်ငံအမျိုးသား လူ့အခွင့်အရေးကော်မရှင် ဒုတိယဥက္ကဌ ဦးစစ်မြိုင်က အလုပ်ရုံသင်တန်းနှင့် ပတ်သက်၍ အမှာစကားပြောကြားကြောင်း သိရသည်။

   ဆက်လက်၍ အဖွဲ့ဝင် ဒေါ်မြမြမှ အဓိကလူ့အခွင့်အရေးစာချုပ် (၉)ခု+ ကုလသမဂ္ဂ လူ့အခွင့် အရေး ယန္တရားအကြောင်းကို သင်ကြားပို့ချ၍လည်းကောင်း၊ ကမ္ဘာ့လူ့အခွင့်အရေး ကြေညာစာတမ်း အကြောင်းကို အဖွဲ့ဝင် ဒေါက်တာဒေါ်သန်းနွဲ့မှ သင်ကြားပို့ချလျက်ရှိပြီး၊ အဖွဲ့လိုက် ဆွေးနွေး ဆောင်ရွက်ကြကြောင်း သိရှိရသည်။

   လူ့အခွင့်အရေးဆိုင်ရာ အသိပညာ ဗဟုတုသများအား ပြည်နယ်အတွင်း တာဝန်ထမ်းဆောင် နေကြသော ဌာနဆိုင်ရာတာဝန်ရှိသူများမှ တစ်ဆင့် ပြန့်ပွားစေရန်၊ လူ့အခွင့်အရေးဆိုင်ရာ အယူအဆများ၊ ယန္တရားစနစ်များ သိရှိစေရန်၊ မြန်မာနိုင်ငံက အတည်ပြု လက်မှတ်ရေးထိုး ထားသော လူ့အခွင့်အရေးဆိုင်ရာ သဘောတူစာချုပ်(၃)ခုအား ရှင်းလင်းစွာ သိရှိနာလည် စေရန်၊ မြန်မာနိုင်ငံအမျိုးသားလူ့အခွင့်အရေးကော်မရှင် ဖွဲ့စည်းမှုနှင့် ဆောင်ရွက်ချက်များ သိရှိစေရန် စသည့် ရည်ရွယ်ချက်များနှင့် သင်တန်းဖွင့်လှစ်ရခြင်းဖြစ်ကြောင်း သိရသည်။

   ရှမ်းပြည်နယ်ရှိ အစိုးရအရာထမ်းများအတွက် လူ့အခွင့်အရေးဆိုင်ရာ အလုပ်ရုံသင်တန်းကို (၂၀.၁၀.၂၀၁၄)မှ(၂၂.၁၀.၂၀၁၄)ရက်နေ့အထိ (၃)ရက်ကြာ သင်တန်းဖွင့်လှစ်ပြီး၊ သင်တန်းကို မြန်မာနိုင်ငံအမျိုးသားလူ့အခွင့်အရေးကော်မရှင်မှ ဒုတိယဥက္ကဌ ဦးစစ်မြိုင်၊ အဖွဲ့ဝင် ဒေါက်တာ ဒေါ်သန်းနွဲ့၊ အဖွဲ့ဝင်ဒေါ်မြမြတို့က သင်ကြားပို့ချပြီး၊ သင်တန်းကို လူဝင်မှုကြီးကြပ်ရေး နှင့် အမျိုးသားမှတ်ပုံတင်ဦးစီးဌာန၊ အကျဉ်းဦးစီးဌာန၊ တရားရေးဦးစီးဌာန၊ အထွေထွေ အုပ်ချုပ်ရေး ဦးစီးဌာန၊ လူမှုဝန်ထမ်းဦးစီးဌာန၊ ရဲတပ်ဖွဲ့ဝင်များ၊ အမျိုးသမီးရေးရာအဖွဲ့၊ လူကုန်ကူးနှင့် တားဆီးနှိမ်နှင်းရေးအဖွဲ့၊ စည်ပင်သာယာရေးအဖွဲ့တို့မှ ဝန်ထမ်းများ အသီးသီးတက်ရောက်ကြ ကြောင်း သိရှိရသည်။

   အဆိုပါအခမ်းအနားသို့ ပြည်နယ်တရားလွှတ်တော် တရားသူကြီးချုပ်၊ ပြည်နယ်ဝန်ကြီးများ၊ ပြည်နယ်ဥပဒေချုပ်၊ ပြည်နယ်အစိုးရအဖွဲ့အတွင်းရေးမှူး၊ ပြည်နယ်/ ခရိုင်/ မြို့နယ် အဆင့်ဌာန ဆိုင်ရာများ လူမှုရေးအသင်းအဖွဲ့ဝင်များ၊ ဖိတ်ကြားထားသည့် ဧည့်သည်တော်များ တက်ရောက်ကြ ကြောင်းသိရသည်။

                                                                                                                                                                      မောင်မောင်သန်း(တောင်ကြီး)

အပြည်ပြည်ဆိုင်ရာ ဗုဒ္ဓတက္ကသိုလ်ကျောင်းတိုက်မြေသန့် မင်္ဂလာ ကျင်းပ

တောင်ကြီး   အောက်တိုဘာ - ၂၅

702

   ရှမ်းပြည်နယ်၊ အပြည်ပြည်ဆိုင်ရာ ဗုဒ္ဓတက္ကသိုလ်ကျောင်းတိုက် မြေသန့် မင်္ဂလာ အခမ်းအနားကို အောက်တိုဘာ(၂၅)ရက် နံနက်(၈)နာရီ(၁၀)မိနစ်က တောင်ကြီးမြို့၊ ဘုရားဖြူရပ်ကွက်ရှိ ပညာဗောဓိ ကုန်း၌ ကျင်းပသည်။

703

   အခမ်းအနားကို ဆရာတော်/ သံဃာတော်များနှင့် ပြည်နယ်ဝန်ကြီးချုပ်၊ ပြည်နယ်ဝန်ကြီးများ၊ ဧည့်ပရိတ်သတ်တို့က "နမောတဿ" (၃)ကြိမ်ရွတ်ဆို ဘုရားကန်တော့၍ ဖွင့်လှစ်ပြီး၊ ရှမ်းပြည်နယ် သံဃနာယက အဖွဲ့ ဥက္ကဌ ဘဒ္ဒန္တပညာသီရိ(အဂ္ဂမဟာပဏ္ဍိတ) မင်းကွန်းကျောင်းတိုက်ဆရာတော်ဘုရားထံမှ (၉)ပါး သီလခံယူဆောက်တည်ကြကြောင်း သိရသည်။

   ဆက်လက်၍ ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဦးစဝ်အောင်မြတ် အမှူးပြုသော ပြည်နယ်ဝန်ကြီးများက ပရိတ်ရေ၊ ပရိတ်သဲ၊ ပရိတ်ချည်တို့ကို သံဃာတော်အရှင်မြတ်တို့အား ဆက်ကပ် ကြသည်။

   ထို့နောက် သံဃာတော်အရှင်မြတ်တို့က အနန္တရာယိကကမ္မဝါစာများ၊ အန္တရာယ်ကင်းပရိတ်တရား တော်များ ရွတ်ဖတ်သရဇ္စျာယ်တော်မူပြီး၊ ဥပါသကာများက ပရိတ်ရေ၊ ပရိတ်သဲ၊ ပရိတ်ချာတို့ကို သာသနာမြေ အနှံအပြားပက်ဖျန်းချည်နှောင်ကြဲဖြန်းကြကြောင်း သိရသည်။

   ၎င်းနောက် ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဦးစဝ်အောင်မြတ် အမှူးပြုသော ပြည်နယ် ဝန်ကြီးများက ဆရာတော်သံဃာတော်များအား လှူဖွယ်ဝတ္ထုပစ္စည်းများဆက်ကပ်လှူဒါန်းကြပြီး၊ ပြည်နယ် သံဃနာယကအဖွဲ့ဥက္ကဌ ဘဒ္ဒန္တ ပညာသီရိ(အဂ္ဂမဟာပဏ္ဍိတ) မင်းကွန်းကျောင်းတိုက်ဆရာတော် ဘရားက လှူဒါန်းမှုအစုစုတို့အတွက် ရေစက်သွန်းချချီးမြှင့်ပေး၍ အခမ်းအနားကို "ဗုဒ္ဓသာသနံ စိရံ တိဌတု" (၃)ကြိမ် ရွတ်ဆိုဆုတောင်း၍ ရုပ်သိမ်းလိုက်ကြောင်း သိရသည်။

                                                                                                                                                        မောင်မောင်သန်း(တောင်ကြီး)

 

တောင်ကြီးမြို့၌ မိုးသည်းထန်စွာရွာသွန်း၍ မြေပြိုမှုကြောင့်သေဆုံးသွားသူများနှင့် ဒဏ်ရာရရှိသူများအား အလှူငွေထောက်ပံ့

တောင်ကြီး အောက်တိုဘာ - ၁၉

692

ရှမ်းပြည်နယ်၊ တောင်ကြီးမြို့၊ ကျောင်းကြီးစုရပ်ကွက်၊ ဂန္ဓမာလမ်း၊ နယ်မြေ(၁၀)၊ အိမ်အမှတ်(ရပ/၄၃၂)ရှိ နာပြုလုပ်လျက်ရှိသော ဒေါ်နှောင်းပိနေအိမ်တွင် အောက်တိုဘာ(၁၉)ရက် နံနက်(၁၀)နာရီခွဲ အချိန်က မိုးသည်းထန်စွာ ရွာသွန်းမှုကြောင့် မြေပြိုပြီးသေဆုံးသွာသူများ၏ မိသားစုဝင်များနှင့် ဒဏ်ရာရရှိသူများကို အလှူငွေထောက်ပံ့ပေးခြင်းနှင့် ကယ်ဆယ်ရေးပစ္စည်းများ ထောက်ပံ့ပေးအပ်သည်။

အလှူငွေထောက်ပံ့ပေးအပ်မှုတွင် ရှမ်းပြည်နယ်အစိုးရအဖွဲ့မှ လှူဒါန်းထောက်ပံ့သောအလှူငွေကို ရှမ်းပြည်နယ်အစိုးရ အဖွဲ့ ပြည်နယ်လူမှုရေးဝန်ကြီးဒေါက်တာမျိုးထွန်း၊ ပြည်နယ်ဘဏ္ဍာရေးဝန်ကြီး ဦးခွန်သိန်းမောင်နှင့် ပြည်နယ်အစိုးရအဖွဲ့ အတွင်းရေးမှူး ဦးမြင့်အောင်တို့မှ မြေပြိုမှုကြောင့် သေဆုံးသွားသူ တစ်ဦးလျှင်ကျပ်(၁)သိန်း၊ (၅)ဦးအတွက် ကျပ်(၅)သိန်း ကိုလည်းကောင်း ရှမ်းပြည်နယ်ကယ်ဆယ်ရေးနှင့် ပြန်လည်နေရာချထားရေးဦးစီးဌာန ညွှန်ကြားရေးမှူး ဦးစိုးနိုင်က မြေပြိုမှုကြောင့်သေဆုံးသွားသူ တစ်ဦးလျှင်ကျပ်(၁)သိန်း၊ (၅)ဦးအတွက် ကျပ်(၅)သိန်းနှင့် ကယ်ဆယ်ရေးပစ္စည်းများကို လည်းကောင်း အသီးသီးထောက်ပံ့ပေးအပ်ရာ မိသားစုဝင်(၁)ဦးဖြစ်သူ ဦးစိုင်းပန်ဖ(ခ)ဦးစိုင်းကူး ကလက်ခံရယူပြီး ပြည်နယ်ဝန်ကြီးများနှင့် တာဝန်ရှိသူတို့က မိသားစုဝင်များကိုအားပေးစကားပြောကြားသည်။

ဆက်လက်၍ ရှမ်းပြည်နယ်အစိုးရအဖွဲ့ ပြည်နယ်လူမှုရေးဝန်ကြီးဒေါက်တာမျိုးထွန်း၊ ပြည်နယ်ဘဏ္ဍာရေးဝန်ကြီး ဦးခွန်သိန်းမောင်နှင့် ပြည်နယ်အစိုးရအဖွဲ့ အတွင်းရေးမှူး ဦးမြင့်အောင်နှင့် တာဝန်ရှိသူတို့သည် တောင်ကြီးမြို့ စဝ်စံထွန်းဆေးရုံးကြီး အရိုးကုသဆောင်တွင် မြေပြိုမှုကြောင့် ဒဏ်ရာရရှိဆေးကုသခံနေသော လူနာများကို တစ်ဦးလျှင် ငွေကျပ်(၅)သောင်း၊ (၄)ဦးအတွက် ကျပ်(၂)သိန်းကို ထောက်ပံ့ပေးအပ်ပြီး၊ လူနာများကို ကြည့်ရှုအားပေးစကားပြောကြား ခဲ့ကြောင်းသိရသည်။

                                                                                                        မောင်မျိုးမင်း(တောင်ကြီး)

 

ရှမ်းပြည်နယ်အစိုးရအဖွဲ့နှင့် အိန္ဒိယနိုင်ငံ သံရုံး သံအမတ်ကြီး(H.E.MR. Gautam Mukhopadhaya) တွေ့ဆုံ

တောင်ကြီး   အောက်တိုဘာ   ၂၄

700

ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဦးစဝ်အောင်မြတ်၊ ပြည်နယ်ဝန်ကြီးများ၊ ပြည်နယ် အစိုးရအဖွဲ့ ညွှန်ကြားရေးမှူးနှင့်အတူ အောက်တိုဘာ(၂၄)ရက် မွန်းလွဲ(၁)နာရီက တောင်ကြီးမြို့၊ ရှမ်းပြည်နယ် အစိုးရရုံး အစည်းအဝေးခန်းမ၌ အိန္ဒိယနိုင်ငံ သံရုံး သံအမတ်ကြီး (H.E. MR. Gautam Mukhopadhaya) နှင့် တွေ့ဆုံကြောင်း သိရသည်။

701

ပထမဦးစွာ ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဦးစဝ်အောင်မြတ်က သံအမတ်ကြီးအား ရှမ်းပြည်နယ်အစိုးရအဖွဲ့နှင့် တွေ့ဆုံမှုတွင် ပွင့်ပွင့်လင်းလင်းမေးမြန်းနိုင်ကြောင်း ဆွေးနွေးပြီး၊ အိန္ဒိယနိုင်ငံ သံရုံး သံအမတ်ကြီး(H.E.MR. Gautam Mukhopadhaya) မှ ရှမ်းပြည်နယ်(မြောက်ပိုင်း) မူဆယ်/လားရှိုးမြို့များသို့ရောက်ရှိပြီး ကျိုင်းတုံ/တာချီလိတ်မြို့များကို ဆက်လက်သွားရောက်လိုကြောင်း၊ ယခု ကယားပြည်နယ်မှ တောင်ကြီးမြို့ကို ရောက်ရှိကြောင်း၊ ယဉ်ကျေးမှုအနေအထား၊ တောတောင်ပတ်ဝန်းကျင် အလှပများကိုလည်းတွေ့ရှိရကြောင်း၊ လမ်းပန်း ဆက်သွယ်ရေးကိစ္စရပ်များ၊ ရင်းနှီးမြုပ်နှံများ ပြုလုပ်လို ကြောင်း၊ ဖွံ့ဖြိုးတိုးတက်မှုအတွက် (၂)နိုင်ငံ ယဉ်ကျေးမှုအတွက် ဆောင်ရွက်လိုကြောင်း၊ ကားပြိုင်ပွဲကိုလည်း အိန္ဒိယနိုင်ငံအဖွဲ့အစည်းနှင့် ဆောင်ရွက်ပြီး တောင်ကြီးမြို့ကိုဖြတ်ကာ တာချီလိတ်၊ ကျိုင်းတုံတို့တွင် ပြုလုပ် လိုကြောင်း၊ ကားပြိုင်ပွဲပြုလုပ်ရခြင်းကြောင့် တောင်ကြီး၊ မူဆယ်ဒေသရှိ ပြည်သူများ စိတ်ဝင်စားပြီး၊  ကုန်သွယ်မှု စီးပွားရေး ကောင်းမွန်ရေး ဖြစ်နိုင်ကြောင်း၊ ရှမ်းပြည်နယ်တွင် ယဉ်ကျေးမှုပစ္စည်းများ၊ စိုက်ပျိုးရေး ကဏ္ဍများ စိတ်ဝင်စားကြောင်း၊ တာတာကုမ္ပဏီအနေဖြင့် လ္ဘက်ခြောက်စက်ရုံ တည်ဆောက်ရန်အတွက် မြေနေရာများရှာဖွေလို့ မတွေ့ရှိသေးကြောင်း၊ စီးပွားရေး လုပ်ငန်းအနေ ဖြင့် စစ်ကိုင်းတိုင်း၊ မန္တလေးတိုင်း ဒေသကြီးတွင် ဆောင်ရွက်ပြီးမှ ရှမ်းပြည်နယ်တွင် လုပ်ကိုင်လို ကြောင်း၊  အောက်တိုဘာလတွင် မန္တလေး၊ ရန်ကုန်မြို့များတွင် ကုန်စည်ပြပွဲများရှိပါကြောင်း၊ မူဆယ်၊ လားရှိုးတို့တွင် ကုန်စည်ပြပွဲများပြုလုပ်လိုကြောင်း ဆွေးနွေးသွားကြောင်း သိရသည်။

ဆက်လက်၍ ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဦးစဝ်အောင်မြတ်က မော်တော်ကား ပြိုင်ပွဲအတွက် ကလေး၊တမူးရှိလမ်းများကို ဘယ်လမ်းရွေးချယ်ထားကြောင်း၊ မော်တော်ကားပြိုင်ပွဲကို အထက်မှခွင့်ပြုချက်ရပါက ရှမ်းပြည်နယ်အစိုးရအဖွဲ့မှ ကူညီသွားမည် ဖြစ်ကြောင်း၊ ရှမ်းပြည်နယ်အနေဖြင့် အိန္ဒိယနိုင်ငံနှင့် ဗုဒ္ဓဂါယာဘုရားဖူးခရီးသွားလုပ်ငန်းများ ဆောင်ရွက်ပေးစေလိုကြောင်း၊ အိန္ဒိယနိုင်ငံနှင့် မြန်မာနိုင်ငံသည် ရှေးနှစ်ပေါင်းများစွာက ဆက်ဆံမှု ရှိခဲ့ကြောင်း၊ ရှမ်းပြည်နယ်ရှိယဉ်ကျေးမှုကိစ္စရပ်များနှင့် ပတ်သက်၍ အာဒံလူမျိုးများ မြန်မာနိုင်ငံကို လာရောက်လည်ပတ်နိုင်ကြောင်း၊ လ္ဘက်ခြောက်စက်ရုံ တည်ဆောက်မည့်ကိစ္စရပ်နှင့် ပတ်သက်၍ ဆွေးနွေးရာတွင် ပင်လောင်း၊ ပင်းတယ၊ နမ့်ဆန် ဒေသများတွင် ပို၍ကောင်းကြောင်း၊ လ္ဘက်ခြောက် စီးပွားရေးလုပ်ငန်းနှင့် ပတ်သက်၍ တွဲဖက်လုပ်ကိုင်မှု ရှိ/မရှိ နှင့် စက်ရုံတစ်မျိုးတည်းသာ တည်ဆောက်မှာလား သိရှိလိုကြောင်း၊ မော်တော်ကားအနေဖြင့် လှည့်လည်ပြိုင်ပွဲကို ကူညီဆောင်ရွက်ပေးမှာဖြစ်ကြောင်း၊ ရှမ်းပြည်နယ်ရှိ တိုင်းရင်းသားများသည် ဗုဒ္ဓဂါယာကို  အလေးထား ဆောင်ရွက်ကြောင်း၊ ရှမ်းပြည်နယ်မှ တိုင်းရင်းသားများနှင့် နိုင်ငံခြားသားများသည် ဗုဒ္ဓဂါယာသွားရောက်ပါက အလေးအနက်ထားဆောင်ရွက်ပေးစေလိုကြောင်း ဆွေးနွေးသွားကြောင်း သိရသည်။

                                                               မောင်မောင်သန်း(တောင်ကြီး)

 

အားကစားနှင့်ကာယပညာသိပ္ပံ(တောင်ကြီး) ၂၀၁၄-၂၀၁၅ ပညာသင်နှစ် အားကစားနှင့် ပညာရေးပေါင်းစပ် သင်တန်းဖွင့်ပွဲနှင့် ကျောင်းဆောင်သစ်လွှဲပြောင်း အပ်နှံခြင်း အခမ်းအနားကျင်းပ၊ ပြည်ထောင်စုဝန်ကြီး ဦးတင့်ဆန်း တက်ရောက်ဖွင့်လှစ် အမှာစကားပြောကြား

တောင်ကြီး အောက်တိုဘာ - ၁၇

693

   အားကစားသည် နိုင်ငံတစ်နိုင်ငံဂုဏ်၊ လူမျိုးတစ်မျိုး၏ သိက္ခာဖြစ်ရာ နိုင်ငံတကာအလယ်၌ နိုင်ငံတော်၏ ဂုဏ်သိက္ခာကို အားကစားနည်းဖြင့် မြှင့်တင်နိုင်မည့် ထူးချွန်ထက်မြက်သော နိုင်ငံ့ဂုဏ်ဆောင်အားကစားသမား လူရည်ချွန်များ မွေးထုတ်ပေးနိုင်ရေးနှင့် မြန်မာ့အားကစားအောင်မြင်မှု ရေရှည်တည်တံ့နိုင်ရေးအတွက် အထောက် အကူပြုနိုင်ရန် အားကစားနှင့် ပညာရေးပေါင်းစပ် အကောင်အထည်ဖော်မှု လုပ်ငန်းသည်လည်း အားကစားဝန်ကြီးဌာန၏ အဓိကတာဝန်တစ်ရပ်အဖြစ် ပါရှိနေရာ ၂၀၁၄-၂၀၁၅ ပညာသင်နှစ် အားကစားနှင့် ကာယပညာသိပ္ပံ(တောင်ကြီး)၏ အားကစားနှင့်ပညာရေးပေါင်းစပ် သင်တန်းဖွင့်ပွဲနှင့် ကျောင်းဆောင်သစ်လွှဲပြောင်း အပ်နှံခြင်း အခမ်းအနားကို ယနေ့နံနက်(၁၀)နာရီခွဲက ရှမ်းပြည်နယ်၊ တောင်ကြီးမြို့(အေးသာယာ)တွင် ကျင်းပရာ မြန်မာနိုင်ငံ အမျိုးသားအားကစားကော်မတီဥက္ကဌ၊ အားကစားဝန်ကြီးဌာန၊ ပြည်ထောင်စုဝန်ကြီး ဦးတင့်ဆန်း တက်ရောက်ဖွင့်လှစ်သည်။

694

   အဆိုပါအခမ်းအနားသို့ ပြည်ထောင်စုဝန်ကြီးနှင့်အတူ ရှမ်းပြည်နယ်ဝန်ကြီးချုပ် ဦးစဝ်အောင်မြတ်၊ ရှမ်းပြည်နယ်လွှတ်တော် ဥက္ကဌ၊ အရှေ့ပိုင်းတိုင်းစစ်ဌာနချုပ်တိုင်းမှူး ဗိုလ်မှူးချုပ် အေးဝင်း၊ ရှမ်းပြည်နယ် တရားလွှတ်တော် တရားသူကြီးချုပ်၊ ဒုတိယဝန်ကြီး ဦးဇော်ဝင်းနှင့် ရှမ်းပြည်နယ်အစိုးရအဖွဲ့ဝင် ဝန်ကြီးများ၊ ပြည်နယ်အဆင့်ဌာနဆိုင်ရာများနှင့် ဖိတ်ကြားထားသည့် ဧည့်သည်တော်များ တက်ရောက်ခဲ့ကြသည်။

   ရှေ့ဦးစွာ ရှမ်းပြည်နယ်လွှတ်တော်ဥက္ကဌ ဦးစိုင်းလုံဆိုင်၊ အရှေ့ပိုင်းတိုင်းစစ်ဌာနချုပ်တိုင်းမှူး ဗိုလ်မှူးချုပ် အေးဝင်း၊ အားကစားဝန်ကြီးဌာန၊ ဒုတိယဝန်ကြီး ဦးဇော်ဝင်း၊ ရှမ်းပြည်နယ် လူမှုရေးဝန်ကြီး ဒေါက်တာမျိုးထွန်းနှင် အားကစားနှင့် ကာယပညာဦးစီးဌာန ညွှန်ကြားရေးမှူးချုပ် ဦးမျိုးလှိုင်တို့က ဖဲကြိုးဖြတ်ဖွင့်လှစ်ပေးပြီး၊ ပြည်ထောင်စုဝန်ကြီး ဦးတင့်ဆန်းနှင့် ရှမ်းပြည်နယ်ဝန်ကြီးချုပ် ဦးစဝ်အောင်မြတ်က မော်ကွန်းကမ္ဗည်းကျောက်စာ ကို လျှပ်စစ်ဘောလုံးနှိပ်၍ ဖွင့်လှစ်ပေးကာ အမွှေးနံ့သာဖြင့် ပက်ဖျန်းပေးခဲ့ကြသည်။

   ပြည်ထောင်စုဝန်ကြီး ဦးတင့်ဆန်း၊ ရှမ်းပြည်နယ်ဝန်ကြီးချုပ် ဦးစဝ်အောင်မြတ်၊ ဒုတိယဝန်ကြီး ဦးဇော်ဝင်း၊ ရှမ်းပြည်နယ်လွှတ်တော် ဥက္ကဌ ဦးစိုင်းလုံဆိုင်၊ ရှမ်းပြည်နယ်လူမှုရေးဝန်ကြီး ဒေါက်တာမျိုးထွန်းနှင့် ညွှန်ကြားရေးမှူးချုပ် ဦးမျိုးလှိုင်တို့က ကျောင်းဆောင်သစ်ဖွင့်ပွဲ အထိမ်းအမှတ်အဖြစ် အမှတ်တရ သစ်ပင်စိုက်ပေး ခဲ့ကြသည်။

   ထို့နောက် ပြည်ထောင်စုဝန်ကြီး၊ ရှမ်းပြည်နယ်ဝန်ကြီးချုပ်နှင့် တာဝန်ရှိသူများသည် အားကစားနှင့်ကာယ ပညာသိပ္ပံ(တောင်ကြီး)ရှိ မီတာ(၄၀၀)ပြေးလမ်းပါ ဘောလုံးကွင်း ဖောက်လုပ်ပြီးစီးမှု၊ မြက်စိုက်ပျိုးပြီးစီးမှု အခြေအနေများအား ကြည့်ရှု့စစ်ဆေးရာ တာဝန်ရှိသူများက ရှင်းလင်းတင်ပြခဲ့ကြပြီး ပြည်ထောင်စုဝန်ကြီးက လိုအပ်သည်များ မှာကြားပါသည်။

695

   ဆက်လက်၍ အားကစားနှင့် ကာယပညာသိပ္ပံ(တောင်ကြီး)၏ ၂၀၁၄-၂၀၁၅ပညာသင်နှစ် အားကစားနှင့် ပညာရေးပေါင်းစပ် သင်တန်းဖွင့်ပွဲနှင့် ကျောင်းဆောင်သစ်လွှဲပြောင်း အပ်နှံခြင်းအခမ်းအနားကို အားကစားနှင့် ကာယပညာသိပ္ပံ(တောင်ကြီး) အားကစားခန်းမ၌ ကျင်းပခဲ့ပြီး ပြည်ထောင်စုဝန်ကြီးက အမှာစကားပြောကြားရာ တွင် ယနေ့အားကစားနှင့် ကာယပညာသိပ္ပံ(တောင်ကြီး)ကို အောင်မြင်စွာဖွင့်လှစ်နိုင်ပြီးဖြစ်လို့ မြန်မာ့အားကစား လောကနှင့် ရှမ်းပြည်နယ်အတွက် မင်္ဂလာရှိတဲ့နေ့တစ်နေ့ဖြစ်ကြောင်း အားကစားနှင့်ကာယပညာသိပ္ပံများဟာ အားကစားဖြင့် နိုင်ငံဂုဏ်ဆောင်နိုင်မည့် အားကစားခေါင်းဆောင်များ၊ နည်းပြများနှင့် အလားအလာရှိသည့် မျိုးဆက်သစ် အားကစားသမားများ မွေးထုတ်ပေးရာ အောင်မြေဖြစ်ကြောင်း၊ အားကစားနှင့်ကာယပညာသိပ္ပံ (ရန်ကုန်)ကို ၁၉၉၂ခုနှစ်၊ ဇူလိုင်လ(၂)ရက်၊ အားကစားနှင့်ကာယပညာသိပ္ပံ(မန္တလေး)ကို ၂၀၀၂ခုနှစ်၊ ဇွန်လ(၁)ရက်နေ့မှာ မြန်မာ့အားကစားလောကအဆင့်အတန်းတိုးတက်မြင့်မားရေးအတွက် နည်းစနစ်မှူးများ၊ နည်းပြဆရာကောင်းများ အလုံအလောက်မွေးထုတ်ပေးရန် တစ်မျိုးသားလုံးကျန်းမာကြံ့ခိုင်မှုအတွက် အားကစားနှင့် ကာယပညာလုပ်ငန်းများဖြင့် အကောင်အထည်ဖော်ဆောင်ရွက်ရာတွင် အထောက်အကူပြုနိုင်စေရန် မြန်မာ့ အားကစားမှ ကမ္ဘာ့အားကစားသို့ ဟူသော နိုင်ငံတော်၏ရည်မှန်းချက်များကို အကောင်အထည်ဖော် ဆောင်ရွက်ရာ တွင် အထောက်အကူပြုစေရန်၊ သွေးသစ်လောင်းနိုင်မည့် ထူးချွန်သော လူငယ်အားကစားသမားများ စဉ်ဆက်မပြတ်ပေါ်ထွက်လာစေရေးအတွက် အထောက်အကူပြုစေရန် အားကစားနှင့် ကာယပညာလုပ်ငန်းများတွင် အစဉ်အမြဲ တိုးတက်မှုရရှိစေရန်အတွက် အားကစားနှင့်ကာယပညာနှင့်ပတ်သက်သော သုတေသနလုပ်ငန်များကို အကောင်အထည်ဖော်ဆောင်ရွက်သွားရန် ရည်ရွယ်ချက်များနှင့် ဖွင့်လှစ်ခဲ့ပါကြောင်း၊ ဖွင့်လှစ်ခဲ့ပြီးဖြစ်တဲ့ အားကစားနှင့် ကာယပညာသိပ္ပံများမှ တာ၀န်ရှိသူများက အိမ်ရှင်အဖြစ် လက်ခံကျင်းပခဲ့တဲ့(၂၇)ကြိမ်မြောက် အရှေ့တောင်အာရှ အားကစားပြိုင်ပွဲနှင့် အခြားနိုင်ငံတကာပြိုင်ပွဲတွေမှာ နိုင်ငံတော်အတွက် ဆုတံဆိပ်ဆွတ်ခူးပေး ခဲ့တဲ့ အားကစားသမားများကို မွေးထုတ်ပေးနိုင်ခဲ့ကြောင်း၊ ဒီလိုအောင်မြင်မှုတွေကြောင့် အားကစားနှင့်ကာယပညာ သိပ္ပံ(မော်လမြိုင်)ကို ၂၀၁၄ခုနှစ်၊ ဇွန်လ(၉)ရက်နေ့မှာ ထပ်မံဖွင့်လှစ်ခဲ့တဲ့အပြင် အားကစားနှင့်ကာယပညာသိပ္ပံ (တောင်ကြီး)ကို ယနေ့ထပ်မံဖွင့်လှစ်နိုင်ခဲ့တာဖြစ်ကြောင်း၊ အားကစားနှင့်ကာယပညာသိပ္ပံ(ရန်ကုန်)နှင့် မန္တလေးကို (က)အဆင့် သတ်မှတ်ကာ ကျောင်းသား၊ ကျောင်းသူ(၆၀၀)ဦး အားကစားနည်း(၂၅)မျိုး၊ မော်လမြိုင်နှင့် တောင်ကြီး ကို(ခ)အဆင့်သတ်မှတ်ကာ ကျောင်းသား၊ ကျောင်းသူ(၁၅၀)ဦး၊ အားကစားနည်း(၁၀)နည်း လက်ခံသင်ကြားပေးပြီး နောက်စာသင်နှစ်များမှာ တိုးချဲ့လက်ခံသွားမှာဖြစ်ကြောင်း၊ အားကစားနည်းအလိုက် တိုးတက်မှုရှိပြီး ကျန်းမာရေး ပြည့်စုံသူများကို တက္ကသိုလ်ဝန်တန်းအောင်မြင်တဲ့အထိ နိုင်ငံတော်ကဆက်လက် တာဝန်ယူ သင်ကြားလေ့ကျင့်ပေး မည်အပြင် တက္ကသိုလ်ဝင်တန်း အောင်မြင်ပါက နေပြည်တော်မှာ ဖွင့်လှစ်မည့် အားကစားတက္ကသိုလ် တက်ရောက်စေမှာဖြစ်ပြီး ပညာရေးမထူးချွန်သော်လည်း အားကစားထူးချွန်တဲ့ ကျောင်းသား၊ ကျောင်းသူများကို အားကစားဝန်ကြီးဌာနမှာ သင့်တော်တဲ့ ရာထူးတာဝန်များ စီစစ်ခန့်အပ်သွားမှာဖြစ်လို့ ကျောင်းသား/ကျောင်းသူများ အားလုံး ပညာထူးချွန်ပြီး အားကစားဖြင့် နိုင်ငံဂုဏ်မြှင့်တင်နိုင်သူများဖြစ်အောင် ကြိုးစားကြစေလိုကြောင်း ပြောကြားပါသည်။

   ယင်းနောက် ရှမ်းပြည်နယ်ဝန်ကြီးချုပ် ဦးစဝ်အောင်မြတ်က သင်တန်းဖွင့်အမှာစကားပြောကြားခဲ့ပြီး၊ လူမှုရေးဝန်ကြီး ဒေါက်တာမျိုးထွန်းက အားကစားနှင့် ကာယပညာသိပ္ပံ(တောင်ကြီး) ဖွင့်လှစ်ခြင်းနှင့် ပတ်သက်၍ ရှင်းလင်းတင်ပြပါသည်။

   ထို့နောက် အားကစားနှင့်ကာယပညာသိပ္ပံ(တောင်ကြီး) ကျောင်းဆောင်သစ်အတွက် စာရွက်စာတမ်းများ အား တာဝန်ယူဆောက်လုပ်ခဲ့ကြသည့် ကုမ္ပဏီများကိုယ်စား Grand Glory ဆောက်လုပ်ရေးကုမ္ပဏီမှ ဒါရိုက်တာ ဦးနေလင်းမှ ပေးအပ်ရာ လူမှုရေးဝန်ကြီးဒေါက်တာမျိုးထွန်း ကလက်ခံရယူပါသည်။

   ဆက်လက်၍ အားကစားနှင့်ကာယပညာသိပ္ပံ(တောင်ကြီး)အတွက် Grand Glory ဆောက်လုပ်ရေးကုမ္ပဏီ မှ ကျပ်သိန်း(၅၀)၊ အောင်ချမ်းသားဆောက်လုပ်ရေးကုမ္ပဏီမှ ကျပ်သိန်း(၅၀)၊ လပ်ကီးမြန်မာဆောက်လုပ်ရေး ကုမ္ပဏီမှ ကျပ်သိန်း(၅၀)ပေးအပ်လှူဒါန်းရာ လူမှုရေး၀န်ကြီး ဒေါက်တာမျိုးထွန်းက လက်ခံရယူပါသည်။

   ထို့နောက် ပြည်ထောင်စုဝန်ကြီးနှင့် အားကစားဝန်ကြီးဌာနမှ တာဝန်ရှိသူများက ရှမ်းပြည်နယ်ဝန်ကြီးချုပ်၊ အရှေ့ပိုင်းတိုင်းစစ်ဌာနချုပ် တိုင်းမှူး၊ ရှမ်းပြည်နယ်လွှတ်တော် ဥက္ကဌ၊ တရားသူကြီးချုပ်နှင့် ပြည်နယ်ဝန်ကြီးများ အား ကျောင်းဖွင့်ပွဲအထိမ်းအမှတ် အမှတ်တရ လက်ဆောင်များ ပေးအပ်ပါသည်။

   ယင်းနောက် ပြည်ထောင်စုဝန်ကြီး၊ ရှမ်းပြည်နယ်ဝန်ကြီးချုပ်နှင့် တာဝန်ရှိသူများသည် အမျိုးသား(၃)ထပ် အိပ်ဆောင်၊ စာသင်ဆောင်၊ ထမင်းစားရိပ်သာ၊ ဆေးပေးခန်းတို့ကို လှည့်လည်ကြည့်ရှုစစ်ဆေးခဲ့ရာ တာဝန်ရှိသူများ က လိုက်လံရှင်းလင်းတင်ပြခဲ့ပြီး ပြည်ထောင်စုဝန်ကြီးက လိုအပ်သည်များ လမ်းညွှန်မှာကြား ခဲ့ကြောင်း သတင်း ရရှိသည်။

More Articles...

  1. ရှမ်းပြည်နယ်အစိုးရအဖွဲ့နှင့် HOLY FLYING TIGER HERITAGE COMPANY LIMITED အဖွဲ့နှင့် တွေ့ဆုံ
  2. ၂၀၁၄ခုနှစ် တောင်ကြီးတန်ဆောင်တိုင်ပွဲတော်ကျင်းပရေးလုပ်ငန်းညှိနှိုင်းအစည်းအဝေးကျင်းပ
  3. အစီရင်ခံစာအပိုင်း(၆)ပါ စိစစ်ဖြေရှင်း တင်ပြရမည့် မြေယာမှုများအား ခရိုင်အုပ်ချုပ်ရေးမှူးများသို့ တာဝန်ပေးအပ်ပွဲကျင်းပ
  4. ၂၀၁၄ - ၂၀၁၅ ခုနှစ် ပထမ(၆)လပတ် ပြည်နယ်အဆင့် ဌာနဆိုင်ရာများနှင့် လုပ်ငန်းညှိနှိုင်း အစည်းအဝေးကျင်းပ
  5. ရှမ်းပြည်နယ်အစိုးရအဖွဲ့နှင့် Muse Development Public Company အဖွဲ့ စီမံကိန်း လုပ်ငန်းဆိုင်ရာများရှင်းလင်း
  6. ရှမ်းပြည်နယ်အစိုးရအဖွဲ့နှင့် Mr.Keith W.Rabin အဖွဲ့နှင့် တွေ့ဆုံ
  7. ရှမ်းပြည်နယ် မြေအသုံးချမှုစီမံခန့်ခွဲရေးကော်မတီ အစည်းအဝေး အမှတ်စဉ်(၁၁/၂၀၁၄)၊ လယ်ယာမြေ စီမံခန့်ခွဲမှုအဖွဲ့ အစည်းအဝေး အမှတ်စဉ်(၁၂/၂၀၁၄)နှင့် မြေလွတ်၊ မြေလပ်နှင့် မြေရိုင်းများစီမံခန့်ခွဲရေးလုပ်ငန်းအဖွဲ့ အစည်းအဝေးအမှတ်စဉ် (၁၁/၂၀၁၄)ကျင်းပ
  8. (၂၀၁၄−၂၀၁၅) ပညာသင်နှစ် ဆရာ/ဆရာမများ အရည်အသွေးမြှင့်သင်တန်းဆင်းပွဲ အခမ်းအနား ကျင်းပ
  9. (၂၀၁၄−၂၀၁၅) ပညာသင်နှစ် ဆရာ/ဆရာမများ အရည်အသွေးမြှင့်သင်တန်းဆင်းပွဲ အခမ်းအနား ကျင်းပ
  10. (၂၁)ကြိမ်မြောက်မြန်မာတိုင်းရင်းသားတို့၏ ရိုးရာယဉ်ကျေးမှု အဆို၊ အက၊ အရေး၊ အတီးပြိုင်ပွဲနှင့် တတိယအကြိမ်မြောက် တိုင်းရင်းသားရိုးရာ ယဉ်ကျေးမှု အဆို၊ အက၊ အရေး၊ အတီးပြိုင်ပွဲ ဆုချီးမြှင့်ပွဲကျင်းပ

Subcategories

မူလသို့

အစိုးရအဖွဲ့

သတင်းများ

ဆက်သွယ်ရန်

တိုင်းရင်းသား လူမျိုးများ

ရှမ်းပြည်နယ်(အရှေ့ပိုင်း)တွင် နေထိုင်ကြပါသည်။ ကျိုင်းတုံ၊ မိုင်းပြင်း၊ မိုင်းဖြတ်၊ မိုင်းယောင်း၊ မိုင်းဆတ်၊ တာချီလိတ်မြို့နယ်များတွင် အများဆုံး နေထိုင်ကြသည်။

 

We have 83 guests and no members online