သတင်းများ

ညောင်ရွှေမြို့နယ် နန်းပန်ကျေးရွာတွင် ကျေးရွာမြေငှားဂရန် ပေးအပ်ပွဲကျင်းပ

ညောင်ရွှေ အောက်တိုဘာ   −   ၂၅

259
 ရှမ်းပြည်နယ်(တောင်ပိုင်း) တောင်ကြီးခရိုင် ညောင်ရွှေမြို့နယ် နန်းပန်ကျေးရွာတွင် ကျေးရွာမြေငှားဂရန် ပေးအပ်ပွဲကို အောက်တိုဘာ(၂၅)ရက် နံနက်(၉)နာရီခွဲက နန်းပန်စျေးကုန်းကျေးရွာ ဇေယျသုခ ပရဟိတကျောင်း၌ ကျင်းပသည်။
 ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာလင်းထွဋ်က နန်းပန်စျေးကုန်းရွာနေ ပြည်သူများ၏ စိတ်ပိုင်း ဆိုင်ရာလုံခြုံမှုနှင့် ပိုင်ဆိုင်မှုအထောက်အထား ခိုင်မာတည်တံ့စေရန် ရှမ်းပြည်နယ်အစိုးရအဖွဲ့၏ ကြီးကြပ်မှုဖြင့် ပြည်နယ်/ခရိုင်/ မြို့နယ် အထွေထွေအုပ်ချုပ်ရေးဦးစီးဌာန၏ အကောင်အထည်ဖော်ဆောင်ရွက်ခြင်းဖြင့် ခိုင်မာသည့်ပိုင်ဆိုင်မှု အထောက်အထား ကျေးရွာမြေငှားဂရန်အား ကျေးရွာသူ ကျေးရွာသားများလက်ဝယ်အရောက် ပေးအပ်ပွဲအခမ်းအနားဖြစ်ပါကြောင်း၊ နန်းပန်စျေးကုန်း ကျေးရွာအတွင်း သတ်မှတ်ချက်နှင့်ကိုက်ညီသည့် အိမ်ခြေ(၁၁၃)အိမ်အား ကျေးရွာမြေငှားဂရန်ထုတ်ပေးခဲ့ပြီး မြေငှားဂရန်ထုတ် ပေးရန်ကျန်ရှိအိမ်ခြေ(၄၅)အိမ်အနက်မှ အိမ်ခြေ(၂၇)အိမ်ရှိ ပြည်သူများမှ ကျေးရွာမြေငှားဂရန်ထုတ်ပေးနိုင်ရေး ထပ်မံတင်ပြ လျှောက်ထားလာမှုအပေါ် ကျေးရွာမြေငှားဂရန်ချထားပေးနိုင်ရေး၊ သက်ဆိုင်ရာဌာနများ၏ ဥပဒေ၊ လုပ်ထုံးလုပ်နည်းနှင့်အညီ စိစစ်ဆောင်ရွက်စေခဲ့ပြီး သတ်မှတ်ချက်များနှင့်ကိုက်ညီသည့် အိမ်ခြေ(၂၂)အိမ်အတွက် ကျေးရွာသူ ကျေးရွာသားများ၏ လက်ဝယ် အရောက်ကျေးရွာမြေငှားဂရန်အား ယနေ့ပေးအပ်သွားမည်ဖြစ်ကြောင်း၊ ရှမ်းပြည်နယ်အစိုးရအဖွဲ့အနေဖြင့် ကျေးရွာမြေငှားဂရန် ဆက်လက်ထုတ်ပေးနိုင်ရေးနှင့်ပတ်သက်၍ မြို့နယ်(၁)မြို့နယ်လျှင် ကျေးရွာ(၃)ရွာစီရွေးချယ်၍ ဦးစားပေးအဆင့်(၁/၂/၃)အလိုက် သတ်မှတ်ရွေးချယ်ပြီး ကျေးရွာမြေငှားဂရန်များအား စိစစ်ထုတ်ပေးနိုင်ရေးကို စီမံချက်နှင့်အညီ ဆက်လက်ဆောင်ရွက်ပေးသွား မည်ဖြစ်ကြောင်းပြောကြားသွားသည်။
 ဆက်လက်၍ ကျေးရွာမြေငှားဂရန် စာချုပ်များအားပေးအပ်ရာ ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာ လင်းထွဋ်မှ ကျေးရွာမြေငှားဂရန်စာချုပ်အားပေးအပ်ရာ ကျေးရွာနေပြည်သူတစ်ဦးမှ လက်ခံရယူ၍လည်းကောင်း၊ ရှမ်းပြည်နယ် ဝန်ကြီးချုပ်ဒေါက်တာလင်းထွဋ်၊ ပြည်နယ်ဝန်ကြီးများ၊ ဗမာတိုင်းရင်းသားလူမျိုးရေးရာဝန်ကြီး၊ အင်းတိုင်းရင်းသားလူမျိုးရေးရာ ဝန်ကြီး၊ ရှမ်းပြည်နယ်အစိုးရအဖွဲ့အတွင်းရေးမှူး၊ ပြည်သူ့လွှတ်တော်ကိုယ်စားလှယ်၊ ပြည်နယ်လွှတ်တော်ကိုယ်စားလှယ်များတို့က အသီးသီးကျေးရွာမြေငှားဂရန် စာချုပ်အားပေးအပ်ရာ ကျေးရွာနေပြည်သူတို့မှ အသီးသီးလက်ခံရယူကြပြီး၊ ကျေးရွာမြေငှားဂရန် စာချုပ်များလက်ခံရရှိသည့် ကျေးရွာနေပြည်သူများကိုယ်စား ဦးညွှန့်ဝင်းမှကျေးဇူးတင်စကား ပြန်လည်ပြောကြားကြောင်းသိရ သည်။
 ထို့နောက် ပြည်နယ်ဝန်ကြီးချုပ်နှင့် တာဝန်ရှိသူများသည် ညောင်ရွှေမြို့နယ် နောင်တောကျေးရွာအုပ်စု လွယ်ခေါ့ကျေးရွာ တွင်ဌာနဆိုင်ရာ(၁၅)ခုမှ ရွေ့လျားဝန်ဆောင်မှုစနစ်ဖြင့် ဆောင်ရွက်နေမှုအား ကြည့်ရှုအားပေး၍ ဒေသခံပြည်သူများနှင့် တွေ့ဆုံကာ ဒေသ၏လိုအပ်ချက်များ တင်ပြလာသော အချက်အလက်များကို ပြည်နယ်ဝန်ကြီးချုပ်၊ ပြည်နယ်ဝန်ကြီးများနှင့် တာဝန်ရှိသူ အသီးသီးတို့မှ ပြန်လည်ဖြည့်ဆည်းဖြေကြားပေးကြကြောင်းသိရှိရသည်။
မောင်မောင်သန်း(တောင်ကြီး)
09-250132943

လုံခြုံဘေးကင်းပြီး ကလေးပျော်စံပြစာသင်ကျောင်း ဆောက်လုပ်ရေးလမ်းညွှန်စာအုပ် ပြည်နယ်အဆင့်မိတ်ဆက်ခြင်းကျင်းပ

တောင်ကြီး အောက်တိုဘာ   −   ၂၄

257
 ပညာရေးဝန်ကြီးဌာန အခြေခံပညာဦးစီးဌာနနှင့် မြန်မာနိုင်ငံဆိုင်ရာ ဆွစ်ဇာလန်နိုင်ငံသံရုံး၊ ဆွစ်ဖွံ့ဖြိုးရေးနှင့် ပူးပေါင်း ဆောင်ရွက်ရေးအဖွဲ့ SDC တို့ပူးပေါင်းကျင်းပသော လုံခြုံဘေးကင်းပြီး ကလေးပျော်စံပြစာသင်ကျောင်း ဆောက်လုပ်ရေးလမ်းညွှန် စာအုပ် ပြည်နယ်အဆင့်မိတ်ဆက်ခြင်းကို အောက်တိုဘာ(၂၂)ရက် မွန်းလွဲ(၁)နာရီက တောင်ကြီးမြို့ Taunggyi City Hotel ၌ကျင်းပကြောင်းသိရသည်။
 ရှမ်းပြည်နယ်အစိုးရအဖွဲ့ ပြည်နယ်လူမှုရေးဝန်ကြီး ဒေါက်တာမျိုးထွန်းက ပညာရေးဝန်ကြီးဌာန၊ အခြေခံပညာဦးစီးဌာန နှင့်အခြေခံပညာစာသင်ကျောင်း ဆောက်လုပ်ရေးနယ်ပယ်မှ ကျွမ်းကျင်ပညာရှင်များ ရေးသားပြုစုထားသည့် လုံခြုံဘေးကင်းပြီး ကလေးပျော်စံပြစာသင်ကျောင်း ဆောက်လုပ်ရေးလမ်းညွှန်စာအုပ်ဆိုင်ရာ ပြည်နယ်အဆင့်မိတ်ဆက်ပွဲနှင့် နည်းပြသင်တန်း အစီအစဉ်ဖြစ်ပါကြောင်း၊ မြန်မာနိုင်ငံအတွင်း စာသင်ကျောင်းအသစ်ဆောက်လုပ်ခြင်းအတွက် “လုံခြုံဘေးကင်းပြီး ကလေးပျော် စံပြစာသင်ကျောင်း ဆောက်လုပ်ရေးလမ်းညွှန်စာအုပ်” သည်စီမံကိန်းအကောင်အထည်ဖော် ဆောင်ရွက်ရာတွင် တစ်စိတ်တစ်ပိုင်း ဖြစ်ပြီး ၂၀၁၉ခုနှစ် ဇန်နဝါရီလ(၃၀)ရက်နေ့တွင် အခြေခံပညာဦးစီးဌာနရှိ စာသင်ကျောင်းများဆောက်လုပ်ရာ၌ စာချုပ်ချုပ်ဆို ရာတွင် လုံခြုံဘေးကင်းပြီး ကလေးပျော်စံပြစာသင်ကျောင်း ဆောက်လုပ်ရေးလမ်းညွှန်ချက်များအတိုင်း ထည့်သွင်းချုပ်ဆိုရန် အကြောင်းကြားပြီးဖြစ်ကြောင်း၊ ရှမ်းပြည်နယ်အစိုးရအဖွဲ့အနေဖြင့် တည်ဆောက်ရေးလုပ်ငန်း စိစစ်ရေးကော်မတီကိုဖွဲ့စည်း၍ အခြေခံပညာဦးစီးဌာန၏ စာသင်ကျောင်းများ ဆောက်လုပ်ရေးလုပ်ငန်းများကို သတ်မှတ်အရည်အသွေးပြည့်မှီစေရန် စည်းမျဉ်း စည်းကမ်းများ၊ လုပ်ထုံးလုပ်နည်းများနှင့်အညီ ဆောင်ရွက်လျက်ရှိပါကြောင်း၊ လုံခြုံဘေးကင်းပြီး ကလေးပျော်စံပြစာသင်ကျောင်း ဆောက်လုပ်ရေး လမ်းညွှန်ချက်များ၊ အသိပညာနှင့်အတွေ့အကြုံများကို ပြန်လည်ဆင့်ပွားမျှဝေကြရန်နှင့် မိမိတို့၏စာသင်ကျောင်း ဆောက်လုပ်ရေးလုပ်ငန်းများတွင် လက်တွေ့ပြန်လည်အသုံးပြုကြရန် ပြောကြားသွားသည်။
 ဆက်လက်၍ ဆွစ်ဇာလန်သံရုံးမှ တာဝန်ခံအကြီးအကဲတစ်ဦး၊ ပြည်နယ်ပညာရေးမှူး၊ SCSCG Task Force အဖွဲ့ ခေါင်းဆောင်တစ်ဦးတို့မှ အသီးသီးအဖွင့်အမှာစကား ပြောကြားကြပြီး လုံခြုံဘေးကင်းပြီး ကလေးပျော်စံပြစာသင်ကျောင်း ဆောက်လုပ်ရေးလမ်းညွှန်စာအုပ် နည်းပြသင်တန်း SCSCG Traning Trainers (SCSCG TOT) သင်တန်းကို ၂၀၁၉ခုနှစ် အောက်တိုဘာလ (၂၃)ရက်နှင့် (၂၄)ရက်များတွင် အထက(၁) တောင်ကြီးမြို့၌ ဆက်လက်ကျင်းပသွားမည်ဖြစ်ပြီး၊ အဆိုပါ အခမ်းအနားသို့ SCSCG Task Force အဖွဲ့ဝင်များ၊ ဆွစ်ဇာလန်သံရုံးမှ တာဝန်ရှိသူများ၊ ပြည်နယ်အဆင့်ဌာနဆိုင်ရာများ၊ ခရိုင်/ မြို့နယ်ပညာရေးမှူးများ၊ မိတ်ဖက်အဖွဲ့အစည်းများ၊ ဆောက်လုပ်ရေးကုမ္ပဏီများမှ တာဝန်ရှိသူများ တက်ရောက်ကြကြောင်း သိရှိရသည်။
မောင်မောင်သန်း(တောင်ကြီး)
09-250132943

ရှမ်းပြည်နယ်အစိုးရအဖွဲ့နှင့် UNHCR ၏မြန်မာနိုင်ငံဆိုင်ရာ ဌာနေကိုယ်စားလှယ် Mr.Johan Cels လက်ခံတွေ့ဆုံ

တောင်ကြီး အောက်တိုဘာ   −   ၂၁

252
 ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာလင်းထွဋ်၊ ပြည်နယ်လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးလှဦး၊ ဗမာတိုင်းရင်းသား လူမျိုးရေးရာဝန်ကြီး ဒေါက်တာအောင်သန်းမောင်၊ အစိုးရအဖွဲ့အတွင်းရေးမှူး ဦးစိုးစိုးဇော်တို့ နှင့်အတူ အောက်တိုဘာ(၂၁)ရက် မွန်းလွဲ(၂)နာရီက တောင်ကြီးမြို့ ရှမ်းပြည်နယ်အစိုးရရုံး ပြည်နယ်ဝန်ကြီးချုပ် (Call)ခန်းမ၌ ကုလသမဂ္ဂ ဒုက္ခသည်များဆိုင်ရာမဟာမင်းကြီးရုံး UNHCR ၏မြန်မာနိုင်ငံဆိုင်ရာ ဌာနေကိုယ်စားလှယ် Mr.Johan Cels အား လက်ခံတွေ့ဆုံကြောင်းသိရသည်။
 ထိုသို့လက်ခံတွေ့ဆုံရာတွင် Mr.Johan Cels သည် ရှမ်းပြည်နယ်(မြောက်ပိုင်း)ရှိ UNHCR ၏လုပ်ငန်းများနှင့်ပတ်သက်၍ တွေ့ဆုံရှင်းလင်းရာ မိမိတို့အဖွဲ့အား ကူညီပေးသည့်အတွက် ရှမ်းပြည်နယ်အစိုးရအဖွဲ့အား အထူးကျေးဇူးတင်ရှိပါကြောင်း၊ ပြီးခဲ့သည့်လက တိုက်ပွဲရှောင်ပြည်သူများကို သွားရောက်ကြည့်ရှုခဲ့ပြီး ဇူလိုင်လတွင် လားရှိုးမြို့ကို သွားရောက်သည့်နေရာတိုင်း၌ ကူညီပေးခဲ့သည့် ဌာနဆိုင်ရာများကို ကျေးဇူးတင်ရှိပါကြောင်း၊ ရှမ်းပြည်နယ်(မြောက်ပိုင်း)တွင် အစိုးရအဖွဲ့နှင့် ပါဝင်ပူးပေါင်းမှု လုပ်ကိုင်နိုင်ရန် စိတ်ဝင်စားပါကြောင်းပြောကြားသွားသည်။
 ဆက်လက်၍ ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာလင်းထွဋ်က ယခုလို Mr.Johan Cels လာရောက် တွေ့ဆုံသည့်အတွက် ဝမ်းသာပါကြောင်း၊ ရှမ်းပြည်နယ်(မြောက်ပိုင်း)တွင် တိုက်ပွဲရှောင်စခန်းအများဆုံးရှိပြီး လူဦးရေမှာ(၈၀၀၀) နှင့်(၉၀၀၀)ကြားရှိပါကြောင်း၊ ပျံ့နှံ့နေထိုင်မှုကို နောင်ချို၊ ကျောက်မဲ၊ ကွတ်ခိုင်၊ သိန္နီတို့တွင် တိုက်ပွဲရှောင်စခန်းများဖွင့်လှစ်ထားရှိ ပါကြောင်း၊ စခန်းများကို မူဝါဒနှင့်အညီ အစိုးရအဖွဲ့နှင့် သက်ဆိုင်ရာဌာနများမှ တာဝန်ယူဆောင်ရွက်လျက်ရှိပါကြောင်း ဆွေးနွေး ပြောကြားပြီး၊ ပြည်နယ်လုံခြုံရေးနှင့်နယ်စပ်ရေးရာဝန်ကြီး၊ ဗမာတိုင်းရင်းသားလူမျိုးရေးရာဝန်ကြီး၊ အစိုးရအဖွဲ့အတွင်းရေးမှူးတို့မှ အသီးသီးဆွေးနွေးကြ၍ အမှတ်တရမှတ်တမ်းတင် ဓာတ်ပုံရိုက်ကူးကြကြောင်းသိရှိရသည်။
မောင်မောင်သန်း(တောင်ကြီး)
09250132943

တောင်ကြီးမြို့ ရေစီးရေလာကောင်းမွန်ရေး လုပ်ငန်းညှိနှိုင်းအစည်းအဝေးကျင်းပ

တောင်ကြီး အောက်တိုဘာ   −   ၂၃

256
 တောင်ကြီးမြို့ ရေကြီးရေလျှံမှုနှင့်စပ်လျဉ်းပြီး ဆွေးနွေးအဖြေရှာနိုင်ရန်နှင့် ရာသီဥတုဖောက်ပြန်ပြောင်းလဲမှုကြောင့် အကျိုးဆက်ဖြစ်သည့် ဘေးအန္တရာယ်ကျရောက်မှုဖြစ်စဉ်ကို နေရာအသီးသီးတွင် သိသိသာသာတွေ့မြင်ခံစားနေရပြီး တောင်ကြီးမြို့ သည်လည်း ရာသီဥတုဖောက်ပြန်မှုကြောင့် ဖြစ်ပေါ်လာသော ရေကြီးရေလျှံမှုဒဏ်ကို မကြာခဏ ကြုံတွေ့နေရသည့်အတွက် တောင်ကြီးမြို့ ရေစီးရေလာကောင်းမွန်ရန် အောက်တိုဘာ(၂၃)ရက် မွန်းလွဲ(၂)နာရီက ရှမ်းပြည်နယ်အစိုးရရုံး အစည်းအဝေး ခန်းမ၌ လုပ်ငန်းညှိနှိုင်းအစည်းအဝေး ကျင်းပကြောင်းသိရသည်။
 ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာလင်းထွဋ်က ယခုနှစ်အတွင်း မိုးသည်းထန်စွာရွာသွန်းမှု ကြောင့်တောင်ကြီးမြို့ပေါ်တွင် ရေကြီးရေလျှံမှုဒဏ်ကို (၅)ကြိမ်ထက်မနည်းခံစားရပြီး အိုးအိမ်ပျက်စီးဆုံးရှုံးမှုနှင့် အသက် ဆုံးရှုံးရမှုများကို ရင်ဆိုင်ကြုံတွေ့ခဲ့ရပါကြောင်း၊ ယခင်ကရေကြီးရေလျှံမှုဖြစ်စဉ်များ မရှိသလောက် ရှားပါးခဲ့သော်လည်း ယခုအခါလူဦးရေ တိုးတက်များပြားလာခြင်း၊ မြို့ပြတိုးချဲ့လာပြီး မြို့ပြဖွံ့ဖြိုးမှုစနစ်တကျမရှိခြင်း၊ စည်းကမ်းမဲ့အမှိုက် စွန့်ပစ်ခြင်း၊ အိမ်ရှင်များမှ ရေမြောင်းဧရိယာများအတွင်း မိမိကိုယ်ကျိုးအလို့ငှာ နည်းမျိုးစုံဖြင့်ကျူးကျော်ချဲ့ထွင်ခြင်း၊ ရေလမ်းကြောင်း အားပြုပြင်စီမံခြင်းတို့ကြောင့် ယခင်ကကောင်းမွန်စွာ စီးဆင်းခဲ့သော ချောင်း၊ မြောင်းများမှာ ကျဉ်းမြောင်းလာပြီး ရေလက်ခံ နိုင်မှုပမာဏနည်းလာခြင်း၊ အမှိုက်ပိတ်ဆို့မှုကြောင့် ချောင်း၊ မြောင်းများတိမ်ကောလာခြင်း၊ ရေစီးဆင်းမှုကို အနှောင့်အယှက် ဖြစ်စေကာရေလမ်းကြောင်း ပြောင်းလဲစီးဆင်းခြင်းတို့ကြောင့် ရေကြီးရေလျှံမှုကို ဖြစ်ပေါ်စေပါကြောင်း၊ မိုးရွာသွန်းမှုပုံစံသည် လည်းယခင်ကနှင့်မတူဘဲ ပြောင်းလဲလာခြင်း၊ ယခင်ကရေစီးဆင်းမှုပုံစံသည် မြို့ပေါ်သို့ရွာချသောမိုးရေများသည် ရေဝပ်ဧရိယာ များအတွင်းသို့ စီးဝင်ကာ ယာယီခိုအောင်းပြီးမှ ရေနုတ်မြောင်းကြီးများမှတစ်ဆင့် တောင်စောင်း၊ ဆင်ခြေလျှောဘက်သို့ စီးဆင်း၍ ယခုအခါ ရေဝပ်ဧရိယာအဖြစ်တည်ရှိခဲ့သော အနိမ့်ပိုင်းဧရိယာများသည် လူဦးရေများပြားလာသည်နှင့်အညီလူများ ဝင်ရောက်နေထိုင်လာမှုကြောင့် ရေဝပ်ဧရိယာများပျောက်ဆုံးကာ ရေနုတ်မြောင်းအတွင်းသို့ တိုက်ရိုက်စီးဝင်ပြီး ရေမြောင်း၏ လက်ခံနိုင်မှုပမာဏထက် ကျော်လွန်ကာရေကြီးရေလျှံမှုကို ဖြစ်ပေါ်စေကြောင်း၊ တောင်ကြီးမြို့ ရေကြီးရေလျှံမှုဖြစ်ပေါ်သည့် အကြောင်းရင်းကိုရှာဖွေ၍ ဖြေရှင်းနိုင်မည့်နည်းလမ်းများကို ပေါင်းစပ်ညှိနှိုင်းဖော်ထုတ်ပေးကြရန် ပြောကြားသွားသည်။
 ဆက်လက်၍ ရှမ်းပြည်နယ် စည်ပင်သာယာရေးညွှန်ကြားရေးမှူး ဦးစိုင်းထွန်းထွန်းမှ တောင်ကြီးမြို့ ရေကြီးရေလျှံ ဖြစ်ပေါ်မှုနှင့်ပတ်သက်၍ မြေပုံကားချပ်ဖြင့်ရှင်းလင်းပြီး သီဟဖွံ့ဖြိုးဆောက်လုပ်ရေးကုမ္ပဏီမှ မန်နေဂျင်းဒါရိုက်တာ ဦးဇော်လင်းအောင်က တောင်ကြီးမြို့အတွင်း ရေစီးဆင်းသည့် ရေမြောင်းများနှင့်ပတ်သက်၍ ရှင်းလင်းခြင်း၊ မြို့နယ် စည်ပင်သာယာရေး အမှုဆောင်အရာရှိဦးအေးကိုမှ မိုးသည်းထန်စွာရွာသွန်းမှုကြောင့် တောင်ကြီးမြို့တွင် ရေကြီးရေလျှံမှုနှင့် ပျက်စီးဆုံးရှုံးမှုများနှင့် ပတ်သက်၍ရှင်းလင်းခြင်း၊ မြို့မိမြို့ဖများ၊ ရပ်ကွက်ပြည်သူများမှ အထွေထွေဆွေးနွေးကြကြောင်း သိရသည်။
 ထို့နောက် ရှမ်းပြည်နယ်အစိုးရအဖွဲ့ ပြည်နယ်စီမံကိန်းနှင့်ဘဏ္ဍာရေးဝန်ကြီး ဦးစိုးညွန့်လွင်မှ တောင်ကြီးမြို့ပေါ် ရေကြီးရေလျှံမှုနှင့်ပတ်သက်၍ မိမိတို့တာဝန်ယူနေစဉ်အတွင်း ယခုလိုမျိုးနောက်ထပ် မဖြစ်ပွားနိုင်ရန် ပညာရှင်များခေါ်ယူ၍ ဆောင်ရွက်သွားမည်ဖြစ်ကြောင်းနှင့် တက်ရောက်လာကြသည့် ပြည်နယ်အဆင့်ဌာနဆိုင်ရာများ၊ မြို့မိမြို့ဖများ၊ ဒေသခံပြည်သူ များကမည်ကဲ့သို့ဆောင်ရွက်ရမည်ကို အကြံဉာဏ်များပေး၍ ဒုတိယအကြိမ် လုပ်ငန်းညှိနှိုင်းအစည်းအဝေး၌ ဆွေးနွေးသွားမည် ဖြစ်ကြောင်းပြောကြားပြီး ရှမ်းပြည်နယ်ဝန်ကြီးချုပ်ဒေါက်တာလင်းထွဋ်မှ နိဂုံးချုပ်အမှာစကား ပြောကြားခဲ့ကြောင်းသိရှိရသည်။
မောင်မောင်သန်း(တောင်ကြီး)
09250132943

၂၀၁၉-၂၀၂၀ ခု ဘဏ္ဍာရေးနှစ်၊ ပြည်ထောင်စု/ ပြည်နယ်ခွင့်ပြုရန်ပုံငွေဖြင့် ဆောင်ရွက်မည့်လုပ်ငန်းများအတွက် အိတ်ဖွင့်တင်ဒါခေါ်ယူခြင်း

တောင်ကြီး  အောက်တိုဘာ -  ၂၁

251
 ရှမ်းပြည်နယ်အစိုးရအဖွဲ့၊ ရှမ်းပြည်နယ်ကျေးလက်ဒေသဖွံ့ဖြိုးတိုးတက်ရေးဦးစီးဌာန ၂၀၁၉-၂၀၂၀ ခု ဘဏ္ဍာရေးနှစ်၊ ပြည်ထောင်စု/ ပြည်နယ်ခွင့်ပြုရန်ပုံငွေဖြင့် ဆောင်ရွက်မည့်လုပ်ငန်းများအတွက် အိတ်ဖွင့်တင်ဒါခေါ်ယူခြင်းကို အောက်တိုဘာ ၂၁ ရက် နံနက် ၉ နာရီခွဲက တောင်ကြီးမြို့၊ ပြည်နယ်ကျေးလက်ဒေသဖွံ့ဖြိုးရေးဦးစီးဌာန၌ ကျင်းပသည်။
 ပြည်နယ်စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီး ဦးစိုင်းလုံကျော်က ယနေ့ကျင်းပပြုလုပ်သည့် ရှမ်းပြည်နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ ၂၀၁၉−၂၀၂၀ခု ဘဏ္ဍာရေးနှစ် ပြည်ထောင်စု/ပြည်နယ်ခွင့်ပြုရန်ပုံငွေဖြင့် ရှမ်းပြည်နယ်အတွင်း (ကိုယ်ပိုင်အုပ်ချုပ်ခွင့်ရဒေသ/တိုင်းအပါအဝင်) ဆောင်ရွက်မည့် အဆောက်အဦလုပ်ငန်းများ၊ ကုန်ထုတ်လမ်း/ တံတားလုပ်ငန်း၊ ရေရှိရေးလုပ်ငန်းများအတွက် အိတ်ဖွင့်တင်ဒါတင်သွင်းသူများအနေဖြင့် လိုက်နာဆောင်ရွက်ရမည့်အချက် များနှင့်ပတ်သက်ပြီး ရှင်းလင်းသည့်အခမ်းအနားဖြစ်ပါကြောင်း၊ ရှမ်းပြည်နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာန၏ ၂၀၁၉−၂၀၂၀ခု ဘဏ္ဍာရေးနှစ် ပြည်ထောင်စု/ပြည်နယ်ခွင့်ပြုရန်ပုံငွေဖြင့် ငွေလုံးငွေရင်းလုပ်ငန်းများဖြစ်သည့် အဆောက်အဦ လုပ်ငန်းများ၊ ကုန်ထုတ်လမ်း/ တံတားလုပ်ငန်း၊ ရေရှိရေးလုပ်ငန်းများအတွက် Lot စုစုပေါင်း(၂၈၁)ခုတို့အား အိတ်ဖွင့်တင်ဒါ ခေါ်ယူရခြင်းဖြစ်ကြောင်း၊ တင်ဒါစနစ်ဆိုသည်မှာ အစိုးရဌာနများနှင့် အဖွဲ့အစည်းအသီးသီးတို့တွင် ဆောင်ရွက်ရန်ရှိသော အဆောက်အဦများ တည်ဆောက်ခြင်း၊ ပစ္စည်းများဝယ်ယူခြင်း၊ ဝန်ဆောင်မှုရယူခြင်း၊ ငှားရမ်းခြင်းနှင့် ရောင်းချခြင်းစသည့် လုပ်ငန်းများကို စံချိန်စံညွှန်းပြည့်မီစွာ ဆောင်ရွက်နိုင်ရန် စည်းကမ်းသတ်မှတ်ချက်များနှင့်အညီ ပွင့်လင်းမြင်သာစွာခေါ်ယူ၍ တရားမျှတစွာ ရောင်းချသည့်စနစ်ဖြစ်ပါကြောင်း ပြောကြားသည်။
 ရှမ်းပြည်နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာနအနေဖြင့် ကျပ်သန်း(၁၀၀)အထက်လုပ်ငန်းများဖြစ်သည့် အဆောက်အဦလုပ်ငန်း(၁)ခု၊ ကုန်ထုတ်လမ်း/တံတားလုပ်ငန်း(၁၈)ခု၊ ရေရရှိရေးလုပ်ငန်း(၅)ခုတို့အား ၂၀၁၉ခုနှစ် အောက်တိုဘာလ (၇)ရက်နေ့မှ စတင်ရောင်းချခဲ့ပြီး ရောင်းချမှုကို ၂၀၁၉ခုနှစ် နိုဝင်ဘာလ(၇)ရက်နေ့တွင် ပိတ်သိမ်းမှာဖြစ်ပြီး တင်ဒါနောက်ဆုံး တင်သွင်းရမည့်ရက်မှာ ၂၀၁၉ခုနှစ် နိုဝင်ဘာလ(၈)ရက်နေ့ဖြစ်၍ နိုဝင်ဘာလ(၁၃)ရက်နေ့တွင် တင်ဒါဖွင့်လှစ်သွားမည်ဖြစ် ကြောင်း၊ ကျပ်သန်း(၁၀၀)အောက်လုပ်ငန်းများဖြစ်သည့် အဆောက်အဦလုပ်ငန်း(၇)ခု၊ ကုန်ထုတ်လမ်း/တံတားလုပ်ငန်း(၁၂၃)ခု၊ ရေရရှိရေးလုပ်ငန်း(၂၆၉)ခုတို့အား ၂၀၁၉ခုနှစ် အောက်တိုဘာလ (၄)ရက်နေ့မှ စတင်ရောင်းချခဲ့ပြီး ရောင်းချမှုကို ၂၀၁၉ခုနှစ် အောက်တိုဘာလ(၂၉)ရက်နေ့တွင် ပိတ်သိမ်းမှာဖြစ်ပြီး တင်ဒါနောက်ဆုံး တင်သွင်းရမည့်ရက်မှာ ၂၀၁၉ခုနှစ် အောက်တိုဘာလ (၃၀)ရက်နေ့ဖြစ်၍ အောက်တိုဘာလ(၃၁)ရက်နေ့တွင် တင်ဒါဖွင့်လှစ်သွားမည်ဖြစ်ကြောင်း ၎င်းကပြောကြားသည်။
ဆက်လက်၍ ရှမ်းပြည်နယ် ကျေးလက်ဒေသဖွံ့ဖြိုးရေးဦးစီးဌာန ပြည်နယ်ဦးစီးမှူးဦးမောင်မောင်ဝင်းမှ တင်ဒါခေါ်ယူ ခြင်းနှင့်ပတ်သက်ပြီး ရှင်းလင်းပြောကြား၍ တက်ရောက်လာကြသောကုမ္ပဏီများမှ သိရှိလိုသည်များ မေးမြန်းခြင်းနှင့် တာဝန် ရှိသူများမှ ပြန်လည်ဖြေကြားကြောင်းသိရှိရသည်။
မောင်မောင်သန်း(တောင်ကြီး)
09250132943

ထိုင်ဝမ်နိုင်ငံသို့ ပြိုင်ပွဲဝင်မည့် ကျောင်းသားများအား ထောက်ပံ့ငွေပေးအပ်

တောင်ကြီး အောက်တိုဘာ   −   ၂၃

255
 ၂၀၁၉ခုနှစ် စက်တင်ဘာလ(၅)ရက်နေ့ တောင်ကြီးတက္ကသိုလ်ဘက်စုံခန်းမ၌ ကျင်းပခဲ့သော မြန်မာ့စွန့်ဦးတီထွင် ပွဲတော်တွင် ပါဝင်ပြသခဲ့သည့် ကွန်ပျူတာတက္ကသိုလ်မှ Green House Project ကိုထိုင်ဝမ်နိုင်ငံ International ICT Innovative Service Awards ၂၀၁၉ ပြိုင်ပွဲတွင် ပါဝင်ယှဉ်ပြိုင်နိုင်ရန် ဖိတ်ကြားခြင်းခံရသောကြောင့် ပြိုင်ပွဲကိုကွန်ပျူတာ တက္ကသိုလ်မှ ကျောင်းသားနှစ်ဦးတွင် တစ်ဦးကိုနေစရိတ်၊ စားစရိတ်များအား International ICT Innovative Service Awards ၂၀၁၉ ကျင်းပရေးကော်မတီမှ ထောက်ပံ့ပေးသွားမည်ဖြစ်ပြီး ကျန်ရှိနေသည့် ကျောင်းသားတစ်ဦးအတွက် ခရီးစရိတ်လိုအပ် လျက်ရှိရာ လိုအပ်နေသောခရီးစရိတ်ကို(US $800)ကို YESS Foundation မှထောက်ပံ့ကူညီပေး၍ ၎င်းFoundationသည် မြန်မာ့စွန့်ဦးတီထွင်ပွဲတော်ကို ဦးစီးကျင်းပဆောင်ရွက်ခဲ့သော လူငယ်အများစုဖြင့်ဖွဲ့စည်းထားကြောင်းသိရသည်။
 အဆိုပါ ပြိုင်ပသို့သွားရောက်ယှဉ်ပြိုင်မည့် ကျောင်းသားနှစ်ဦးအား အောက်တိုဘာ(၂၃)ရက် နံနက်(၁၁)နာရီက တောင်ကြီးမြို့ ရှမ်းပြည်နယ်အစိုးရရုံး ပြည်နယ်လူမှုရေးဝန်ကြီးရုံးခန်း၌ ထောက်ပံ့ငွေများပေးအပ်ရာ ရှမ်းပြည်နယ်အစိုးရအဖွဲ့ ပြည်နယ်လူမှုရေးဝန်ကြီးမှ ကျောင်းသားတစ်ဦးစီလျှင် ငွေကျပ်(၁၅၀၀၀၀)၊ ရှမ်းပြည်နယ်စွန့်ဦးတီထွင်အဖွဲ့ဥက္ကဋ္ဌ ဦးစိုင်းမြင့်ဌေး၊ ဒုတိယဥက္ကဋ္ဌဒေါ်အေးဖြူ၊ စာရင်းစစ်ကိုနေမျိုးတို့မှ(US $800)ပေးအပ်ရာ ကွန်ပျူတာတက္ကသိုလ် ကျောင်းအုပ်ဆရာမကြီး ဒေါက်တာသင်းသုနိုင်မှ လက်ခံရယူပြီး ဂုဏ်ပြုမှတ်တမ်းလွှာများ ပြန်လည်ပေးအပ်ခဲ့ကြောင်းသိရှိရသည်။
မောင်မောင်သန်း(တောင်ကြီး)
09250132943

မသန်စွမ်းမှုဆိုင်ရာ ဆွေးနွေးပွဲနှင့် အသိပညာပေးသင်တန်းများ ဖွင့်ပွဲကျင်းပ

တောင်ကြီး အောက်တိုဘာ   −   ၂၁

250
 လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ ပြန်လည်ထူထောင်ရေးဦးစီးဌာနနှင့် ရွှေမင်းသား ဖောင်ဒေးရှင်း(မြန်မာ) တို့ပူးပေါင်းကျင်းပသော တိုင်းဒေသကြီးနှင့်ပြည်နယ်တို့တွင် ကောက်ယူထားရှိသော မသန်စွမ်းသူများ ဆိုင်ရာသတင်းအချက်အလက်ကို ကွင်းဆင်းလေ့လာ၍ ပြန်လည်မှတ်တမ်းတင်ခြင်း၊ အစီရင်ခံစာများပြုစုတင်ပြခြင်း၊ လုပ်ငန်း များဆောင်ရွက်ရန်ဆွေးနွေးပွဲ၊ မသန်စွမ်းမှုဆိုင်ရာ ဆွေးနွေးပွဲနှင့် အသိပညာပေးပြိုင်ပွဲများဖွင့်ပွဲကို အောက်တိုဘာ(၂၁)ရက် နံနက်(၈)နာရီခွဲက တောင်ကြီးမြို့ စိန်ဂျိုးဇက် အောက်မေ့ဘွယ်ဓမ္မာရုံ၌ကျင်းပသည်။
 ပြည်နယ်ဝန်ကြီးချုပ် ဒေါက်တာလင်းထွဋ်က မသန်စွမ်းသူများ ဖွံ့ဖြိုးတိုးတက်ရေးနှင့် မသန်စွမ်းအခွင့်အရေးများကို ဖြည့်ဆည်းဆောင်ရွက်ပေးနိုင်ရန်အတွက် မသန်စွမ်းသူအခွင့်အရေးများဆိုင်ရာ အမျိုးသားကော်မတီကို ဒုတိယသမ္မတ ဟင်နရီ ဗန်ထီးယူက ဥက္ကဋ္ဌအဖြစ်ဆောင်ရွက်ပြီး စုစုပေါင်းအဖွဲ့ဝင်(၅၅)ဦးဖြင့် ၂၀၁၇ခုနှစ် ဒီဇင်ဘာလတွင် ဖွဲ့စည်းခဲ့ပါကြောင်း၊ တိုင်းဒေသ ကြီးနှင့်ပြည်နယ်များတွင်လည်း မသန်စွမ်းသူများ၏ အခွင့်အရေးများဆိုင်ရာ ကော်မတီများကို သက်ဆိုင်ရာတိုင်းဒေသကြီး ပြည်နယ်အစိုးရအဖွဲ့ ဝန်ကြီးချုပ်များက ဥက္ကဋ္ဌအဖြစ်တာဝန်ယူလျက် ၂၀၁၈ခုနှစ် စက်တင်ဘာလတွင် ဖွဲ့စည်းခဲ့ပြီး ရှမ်းပြည်နယ် မသန်စွမ်းသူများ အခွင့်အရေးဆိုင်ရာကော်မတီအား အဖွဲ့ဝင်(၁၉)ဦးဖြင့် ဖွဲ့စည်းခဲ့ပြီးဖြစ်ကြောင်း၊ မသန်စွမ်းသူများကလည်း မသန်စွမ်းသူအသင်းအဖွဲ့များတွင် ဦးဆောင်ပါဝင်လျက် မြန်မာနိုင်ငံ မသန်စွမ်းသူများအသင်းချုပ်အား ၂၀၁၆ခုနှစ် မတ်လတွင် ရွေးကောက်ဖွဲ့စည်းခဲ့ပါကြောင်း၊ ၂၀၁၉ခုနှစ် သြဂုတ်လ(၉)ရက်နေ့တွင် ရှမ်းပြည်နယ် မသန်စွမ်းသူများအသင်းအား မဲစနစ်ဖြင့် ရွေးချယ်ကာ အဖွဲ့ဝင်(၁၈)ဦးဖြင့် ဖွဲ့စည်းခဲ့ပြီး ကော်မတီများကတစ်ဆင့် လူတိုင်းအကျုံးဝင်ဖွံ့ဖြိုးတိုးတက်မှု မသန်စွမ်းသူများ၏ ပညာရေး၊ ကျန်းမာရေး၊ အလုပ်အကိုင်၊ နိုင်ငံရေး၊ စီးပွားရေး၊ လူမှုရေးစသည့် အခွင့်အရေးများကို ပြည့်မီလာစေရန် ဆောင်ရွက် ပေးနိုင်မှာဖြစ်ပြီး စဉ်ဆက်မပြတ်ဖွံ့ဖြိုးမှုပန်းတိုင်များဆိုင်ရာ ၂၀၃၀ အစီအစဉ်၏ ကတိပြုထားရှိသော မည်သူမှနောက်ကျမကျန်ရစ် စေရေးမူနှင့်အညီ တိုင်းရင်းသားလူမျိုးမသန်စွမ်းသူများ လူနည်းစုမသန်စွမ်းသူများအတွက်ပါ ထည့်သွင်းစဉ်းစားဆောင်ရွက်သွား ရမှာဖြစ်ကြောင်း ပြောကြားသွားသည်။
 ဆက်လက်၍ ရွှေမင်းသားဖောင်ဒေးရှင်း(မြန်မာ)ဥက္ကဋ္ဌ ဦးမြတ်သူဝင်းမှ မသန်စွမ်းမှုဆိုင်ရာ အသိပညာပေးသင်တန်းများ ဖွင့်လှစ်ရခြင်း ရည်ရွယ်ချက်အားပြောကြားပြီး၊ ရွှေမင်းသားဖောင်ဒေးရှင်း(မြန်မာ)၏ လုပ်ငန်းဆောင်ရွက်နေမှုအား အဖွဲ့ဝင် တစ်ဦးဖြစ်သူ ကောင်းထက်သာမှ ရှင်းလင်းတင်ပြကာ “နှလုံးသားထက်မြက်သူ” မှတ်တမ်းတင်ဗီဒီယိုခွေပြသ၍ ရွှေမင်းသား ဖောင်ဒေးရှင်း(မြန်မာ)ဥက္ကဋ္ဌ ဦးမြတ်သူဝင်းမှ ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာလင်းထွဋ်အား အမှတ်တရ လက်ဆောင်ပစ္စည်း ပေးအပ်ခဲ့ကြောင်း သိရှိရသည်။
မောင်မောင်သန်း(တောင်ကြီး)
09250132943

တောင်ကြီးမြို့၊ ဘုရားဖြူရပ်ကွက်ရှိ ပန်းတင်လမ်းအဆင့်မြှင့်တင်ဆောင်ရွက်မည့်နေရာနှင့် ရှမ်းပြည်နယ် ဗုဒ္ဓတက္ကသိုလ် သွားလမ်း ကွန်ကရစ်ခင်းနေမှုအား ပြည်နယ်ဝန်ကြီးချုပ်ကြည့်ရှု

တောင်ကြီး အောက်တိုဘာ - ၂၃

254

၂၀၁၉-၂၀၂၀ ခု ဘဏ္ဍာရေးနှစ် ငွေလုံးငွေရင်းလုပ်ငန်းဖြင့် ပန်းတင်လမ်းအဆင့်မြှင့်တင်ဆောင်ရွက်မည့်နေရာသို့ အောက်တိုဘာ ၂၂ ရက် ညနေ ၃ နာရီက ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဒေါက်တာလင်းထွဋ်၊ ပြည်နယ် လမ်းပန်းဆက်သွယ်ရေးဝန်ကြီး၊ ပြည်နယ်စည်ပင်သာယာရေးဝန်ကြီး၊ အစိုးရအဖွဲ့အတွင်းရေးမှူး၊ သက်ဆိုင်ရာ ပြည်နယ်အဆင့်ဌာနဆိုင်ရာများတို့နှင့်အတူ သွားရောက်ကွင်းဆင်းကြည့်ရှုခဲ့ကြောင်းသိရပြီး၊ ၎င်းလမ်းအဆင့်မြှင့်တင်ခြင်းတွင် မူလလမ်းအား ကတ္တရာထပ်ပိုးလွှာခင်းခြင်းလုပ်ငန်း ၄၀၀ ပေx ၁၂ ပေ၊ မူလလမ်းအား ကျောက်ထက်ကတ္တရာခင်းခြင်းလုပ်ငန်း ၁၂၅၀ ပေx ၁၂ ပေ၊ ကျောက်စီလမ်းပုခုံးပြုလုပ်ခြင်းလုပ်ငန်း ၂ x ၁၂၅၀ ပေ x ၃ ပေ၊ အုတ်စီရေမြောင်းပြုလုပ်ခြင်းလုပ်ငန်း ၂ x ၉၀၀ ပေ ၂ ပေ x ၂ ပေ၊ လမ်းဖြတ်တံတားပြုလုပ်ခြင်းလုပ်ငန်း သံကူကွန်ကရစ် ၆ စင်း ၊ ၃ ပေ x ၃ ပေ၊ အိမ်ဝင်တံတား ဆောင်ရွက်ခြင်းလုပ်ငန်း ၂၄၀ ပေ ၂ ပေ x ၂ ပေဖြင့်တည်ဆောက်သွားမည်ဖြစ်ပြီး လျာထားငွေကျပ်သိန်း (၁၁၆၂)သိန်း ကုန်ကျမည်ဖြစ်ကြောင်းသိရသည်။

ဆက်လက်၍ ပြည်နယ်ဝန်ကြီးချုပ်နှင့် တာဝန်ရှိသူများသည် ပန်းတင်လမ်းမှ ဗုဒ္ဓတက္ကသိုလ်အဝင်လမ်းခွဲ နေရာမှစ၍ ဗုဒ္ဓတက္ကသိုလ်အထိ အလှူရှင်များမှလှူဒါန်းရရှိသောငွေကျပ် (၃၀၅၂၂၅၄၀၀)ဖြင့် ကွန်ကရစ်လမ်းအရှည် (၇၅၀၀)ပေ၊ အကျယ် (၈)ပေ၊ ထု (၈)လက်မ လမ်းခင်းဆောင်ရွက်နေမှုကို ကြည့်ရှုပြီး၊ ဗုဒ္ဓတက္ကသိုလ်၌ပြုလုပ်သော နိုဝင်ဘာလ(၉)ရက် နေ့တွင် ကျရောက်မည့် အောက်စဖို့ဒ်ဆရာတော် ပါမောက္ခ ဒေါက်တာအရှင်သာမိ၏မွေးနေ့ပွဲအတွက် အကြိုညှိနှိုင်းဆွေးနွေးရာ ဖွင့်ပွဲအခမ်းအနားကို နိုဝင်ဘာ(၉)ရက်နေ့တွင်ကျင်းပမည်ဖြစ်၍ နိုဝင်ဘာ(၈)ရက်နေ့ နံနက်တွင် ဗုဒ္ဓတက္ကသိုလ်အဝင်လမ်းမှ စ၍ ရေစက်ချအမျှပေးဝေကြမည်ဖြစ်ပြီး၊ ၎င်းလမ်းသည် ဆရာတော်၏မွေးနေ့အမှီဆောင်ရွက်သော်လည်း မပြီးစီး နိုင်သောကြောင့် မေတ္တာပို့ အမျှပေးဝေကာ နိုဝင်ဘာ(၈)ရက်ညတွင် ဗီယက်နမ်နိုင်ငံမှဆရာတော်များက အင်္ဂလိပ်ဘာသာဖြင့် တရား ဟောကြား၍ နိုဝင်ဘာ(၉)ရက်ညတွင် ထိုင်းနိုင်ငံမှဆရာတော်များက ရှမ်းဘာသာဖြင့် တရားဟောကြားကာ နိုဝင်ဘာ(၁၀)ရက်နေ့ နံနက်တွင် အောက်စဖို့ဒ်ဆရာတော် ပါမောက္ခ ဒေါက်တာအရှင်သာမိမှ ကထိန်တရားနာ ရေစက်ချပြီး၊ နိုဝင်ဘာ(၁၁)ရက်နေ့ညတွင် ဆရာတော်၏တပည့် (၆)ပါးမှ ဂုဏ်ပြုပွဲကျင်းပပြုလုပ်သွားမည်ဖြစ်ကြောင်း သိရှိရသည်။

မောင်မောင်သန်း(တောင်ကြီး)

 ၀၉၂၅၀၁၃၂၉၄၃

 

(၂၁)ကြိမ်မြောက် ကမ္ဗောဇသာမဏေ‌ကျော်စာမေးပွဲကျင်းပ

တောင်ကြီး အောက်တိုဘာ   -   ၂၀

249

ရှမ်းပြည်နယ်(တောင်ပိုင်း) တောင်ကြီးမြို့ အတုလမာရဇိန် ဆုတောင်းပြည့်မြတ်စွာဘုရား မြို့လယ်ဓမ္မာရုံ၌ အောက်တိုဘာ (၂၀)ရက် နံနက်(၉)နာရီက (၂၁)ကြိမ်မြောက် ကမ္ဗောဇသာမဏေကျော်စာမေးပွဲ ကျင်းပကြောင်းသိရသည်။

အခမ်းအနားကို ဆရာတော်သံဃာတော်၊ ရှမ်းပြည်နယ်ဝန်ကြီးချုပ်၊ အရှေ့ပိုင်းတိုင်းစစ်ဌာနချုပ်တိုင်းမှူး၊ ပြည်နယ် ဝန်ကြီးများနှင့် ဧည့်ပရိတ်သတ်တို့မှ နမောတဿ သုံးကြိမ်ရွတ်ဆိုဘုရား ကန်တော့ဖွင့်လှစ်ပြီး နိုင်ငံတော်ဩဝါဒစရိယ ကမ္ဗောဇသာမဏေကျော်စာမေးပွဲ ကျင်းပရေးအဖွဲ့၏ ဩဝါဒစရိယအဂ္ဂမဟာပဏ္ဍိတမဟာကမ္မဌာနစရိယ စွန်းလွန်းကျောင်းတိုက် ဦးစီးပဓာန မဟာနာယကဘဒ္ဒန္တအဂ္ဂဓမ္မဘိဝံသအရှင်သူမြတ်ထံမှ ငါးပါးသီလ ဆောက်တည်ကြသည်။

ဆက်လက်၍ မြို့လယ်ဓမ္မာရုံဂေါပကအဖွဲ့ဥက္ကဋ္ဌ ဦးစွန်ကြိုင်က (၂၁)ကြိမ်မြောက် ကမ္ဗောဇသာမဏေကျော်စာမေးပွဲ ကျင်းပရခြင်းနှင့်ပတ်သက်၍ တင်ပြလျှောက်ထားပြီး အာဂုံနှုတ်ဖြေစာမေးပွဲကျင်းပနိုင်ရန် အာဂုံနှုတ်ဖြေရှင်သာမဏေများနှင့် ကပ္ပိယကာရကလူကြီးများမှ နေရာယူပြီး ပုစ္ဆကဆရာတော်ကြီးများက ဓမ္မသနပလ္လင်နေရာသို့ ကြွရောက်သီတင်းသုံးတော်မူ၍ မြို့လယ်ဓမ္မာရုံဂေါပကအဖွဲ့ဝင်ဦးသိန်းစိုးက အောင်ပလ္လင်ဖွင့်ဂါထာတော်ဖြင့် အာဂုံ‌ဖြေရှင်သာမဏေများကို ဓမ္မသနပလ္လင် ပေါ်သို့ပင့်ဆောင်ကာ တောင်ကြီးမြို့ သိမ်တောင်ပရိယတ္တိစာသင်တိုက် စာချဆရာတော်ဘဒ္ဒန္တဉာဏဝံသလင်္ကာရက သာမဏေ ကျော်လောင်းလျာများအား ထီးဖြူတော်ဖွင့်ဂါထာတော်ဖြင့် ပူဇော်ပြီး ပြည်နယ်ဝန်ကြီးချုပ်ဒေါက်တာလင်းထွဋ်၊ အရှေ့ပိုင်းတိုင်း စစ်ဌာနချုပ်တိုင်းမှူးနှင့် ပြည်နယ်ဝန်ကြီးများက ကနက္တဒဏ်ထီးဖြူတော်များဖွင့်လှစ်ကာ အမွှေးနံ့သာဖြင့် ပက်ဖြန်းပူဇော်ပေး ကြသည်။

ထို့နောက် အလှူငွေများ ပေးအပ်လှူဒါန်းရန် ရှမ်းပြည်နယ်အစိုးရအဖွဲ့မှ လှူဒါန်းသော အလှူငွေကျပ်သိန်း(၁၀၀)ကို ပြည်နယ်ဝန်ကြီးချုပ်ဒေါက်တာလင်းထွဋ် ပေးအပ်၍လည်းကောင်း၊ အရှေ့ပိုင်းတိုင်းစစ်ဌာနချုပ်မှလှူဒါန်းသော အလှူငွေကျပ် (၁၀)သိန်းကို တိုင်းမှူးမှပေးအပ်လှူဒါန်းပေးရာ မြို့လယ်ဓမ္မာရုံဂေါပကအဖွဲ့ဥက္ကဋ္ဌ ဦးစွန်ကြိုင်မှလက်ခံရယူပြီး အာဂုံနှုတ်မေးခွန်းများ ဖြေဆိုတော်မူ၍ အခမ်းအနားကို ဗုဒ္ဓသာသနံ စိရံတိဋ္ဌတု သုံးကြိမ်ရွတ်ဆိုဆုတောင်း၍ ရုပ်သိမ်းလိုက်သည်။

အဆိုပါ (၂၁)ကြိမ်မြောက် ကမ္ဗောဇသာမဏေကျော်စာမေးပွဲတွင် ပထမအဆင့်(၅၃၄)ပါး၊ ဒုတိယအဆင့်(၂၈၀)ပါး၊ တတိယအဆင့်(၁၅၂)ပါး၊ စုစုပေါင်း(၉၆၆)ပါးသည် တိုင်းဒေသကြီးနှင့် ပြည်နယ်များမှလာရောက်ဖြေဆိုကြပြီး ပြည်နယ်ဝန်ကြီးချုပ် နှင့်တာဝန်ရှိသူများက နေ့ဆွမ်းဆက်ကပ်ပေးကြကြောင်းသိရှိရသည်။

မောင်မောင်သန်း(တောင်ကြီး)

09250132943

 

မရှိမဖြစ် ကျန်းမာရေးစောင့် ရှောက်မှု လက်လှမ်းမီရေးစီမံချက်အား ထပ်ဆောင်းပံ့ပိုးရန် စီမံချက် လူထုတိုင်ပင်ဆွေးနွေး

တောင်ကြီး အောက်တိုဘာ - ၂၂

253

ကျန်းမာရေးနှင့် အားကစားဝန်ကြီးဌာနနှင့် ကမ္ဘာ့ဘဏ်တို့ ပူးပေါင်း၍ Public Consultations for Additional Financing for Essential Health Services Access Project “မရှိမဖြစ် ကျန်းမာရေးစောင့် ရှောက်မှု လက်လှမ်းမီရေးစီမံချက်အား ထပ်ဆောင်းပံ့ပိုးရန် စီမံချက်” လူထုတိုင်ပင်ဆွေးနွေးပွဲကို အောက်တိုဘာ ၂၂ ရက် နံနက် ၈ နာရီက တောင်ကြီးမြို့၊ Royal Taunggyi ဟိုတယ်တွင် ကျင်းပပြုလုပ်ခဲ့သည်။

အဆိုပါအခမ်းအနားတွင် ရှမ်းပြည်နယ်အစိုးရအဖွဲ့ ပြည်နယ်လူမှုရေးဝန်ကြီး ဒေါက်တာမျိုးထွန်းက အေးချမ်း သာယာပြီး ချမ်းသာကြွယ်ဝသော မြန်မာနိုင်ငံဖြစ်လာရန်၊ နိုင်ငံဖွံ့ဖြိုးပြီး ဆင်းရဲမွဲတေမှုလျော့ကျရန် ပြည်သူများအနေဖြင့် ကျန်းမာကြံ့ခိုင်ရန်လိုအပ်ကြောင်း၊ လူတိုင်းလက်လှမ်းမီလွှမ်းခြုံနိုင်သော ကျန်းမာရေးစောင့်ရှောက်မှုသည် ကျန်းမာရေးအဆင့် အတန်းတိုးတက်မြင့်မားလာစေရန်နှင့် ဆင်းရဲနွမ်းပါးသူများနှင့် ထိရှလွယ်သူများအပေါ် ငွေကြေးပိုင်းဆိုင်ရာ လျော့ကျစေရန် ဟူသော ကျန်းမာရေးကဏ္ဍ၏ ရည်မှန်းချက်(၂)ရပ်ကို ရောက်ရှိစေရန်ဖြစ်ကြောင်း၊ အမျိုးသားကျန်းမာရေးစီမံကိန်း ၂၀၁၇-၂၀၂၁ မှာ သက္ကရာဇ် ၂၀၃၀ အရောက်တွင် မြန်မာနိုင်ငံရှိလူတိုင်း လက်လှမ်းမီလွှမ်းခြုံနိုင်သော ကျန်းမာရေးစောင့်ရှောက်မှုသို့ ရောက်ရှိရန် ထပ်လောင်းအားဖြည့်ပေးထားပါကြောင်း၊ မြန်မာနိုင်ငံအစိုးရအဖွဲ့အနေဖြင့် ကမ္ဘာ့ဘဏ်အဖွဲ့နှင့် လက်တွဲကာ ၂၀၁၅ ခုနှစ်မှစ၍ မရှိမဖြစ်လိုအပ်သော ကျန်းမာရေးဝန်ဆောင်မှု လက်လှမ်းမီရရှိရေးစီမံကိန်းကို စတင်အကောင် အထည်ဖော် ဆောင်ရွက်ခဲ့ကြောင်း အဖွင့်အမှာစကားတွင် ထည့်သွင်းပြောကြားသွားသည်။

ထို့နောက် ရှမ်းပြည်နယ်ကုသရေးနှင့် ပြည်သူ့ကျန်းမာရေးဦးစီးဌာနမှူး ဒေါက်တာသူဇာချစ်တင်က ဆွေးနွေးပွဲ ကျင်းပရခြင်းနှင့်ပတ်သက်၍ ရှင်းလင်းတင်ပြခဲ့ပြီးနောက် ကမ္ဘာ့ဘဏ်မှ ဒေါက်တာနန်းမိုခမ်းက မရှိမဖြစ်လိုအပ်သော ကျန်းမာရေးဝန်ဆောင်မှု လက်လှမ်းမီရရှိရေး၏ ထပ်ဆောင်းငွေကြေးစီမံကိန်းအကြောင်း ရပ်ရွာလူထုအခြေပြု လက်တွဲ ဆောင်ရွက်မှုစီမံကိန်းရေးဆွဲမှု မူဘောင်အကြောင်းနှင့် ပတ်ဝန်းကျင်ဆိုင်ရာ စီမံခန့်ခွဲမှုအစီအစဉ်များအစီအစဉ်များ တင်ပြဆွေးနွေးခဲ့ကာ တက်ရောက်လာသူများမှ အပြန်အလှန်ဆွေးနွေးကြပြီး အခမ်းအနားကို ရုပ်သိမ်းခဲ့ကြောင်းသိရသည်။

အစရ(ရှမ်း)

 

တောင်ကြီးမြို့၌‌‌ရွေပါရမီစာကြည့်တိုက်ဖွင့်လှစ်

တောင်ကြီး အောက်တိုဘာ   -   ၁၉

248

ရှမ်းပြည်နယ်(တောင်ပိုင်း) တောင်ကြီးမြို့ အမှတ်(၁၁)အခြေခံပညာအလယ်တန်းကျောင်းတွင် အောက်တိုဘာ(၁၉) ရက် နံနက်(၁၀)နာရီက ဆရာတော်အရှင်ဆန္ဒာဓိကမှ ငွေကျပ်(၁၀၈)သိန်းမတည်လှူဒါန်းသော ရွေပါရမီစာကြည့်တိုက် ဖွင့်လှစ် ကြောင်းသိရသည်။

ဆက်လက်၍ တောင်ကြီးမြို့ အောင်မြင်ဘုံစံကျောင်းမှ ဆရာတော်ဉူးခေမာနန္ဒမှ အဖွင့်ဩဝါဒစကားမြွက်ကြားပြီး ရှမ်းပြည်နယ်အစိုးရအဖွဲ့ ပြည်နယ်ဝန်ကြီးချုပ်ဒေါက်တာလင်းထွဋ်က ယခုစာကြည့်တိုက်ဖွင့်လှစ်သော အဆောက်အဦမှာ (၁၉၀၅)ခုနှစ် သူဌေးဦးဖိုးကူက လှူဒါန်းခဲ့သော အဆောက်အဦဖြစ်ပြီး ၁၉၃၆-၁၉၃၇ခုနှစ်တွင် ဆရာအတတ်သင်ကျောင်း (ETC)ကျောင်းအဖြစ် အသုံးပြုခဲ့ကြောင်းသိရှိပြီး အမှတ်(၁၁)အ‌ခြေခံပညာအလယ်တန်းကျောင်းအား (၁၉၄၅)ခုနှစ်တွင် အမှတ်(၁)အခြေခံပညာမူလတန်းကျောင်း၊ (၁၉၈၆)ခုနှစ်တွင် ကျောင်းအဆင့်တိုးမြင့်ပြီး အမှတ်(၁၁)ရွေပါရမီစာကြည့်တိုက် ဖွင့်လှစ်ရန်အတွက် ဆရာတော်အရှင်ဆန္ဒာဓိကမှ ငွေကျပ်(၁၀၈)သိန်း မတည်လှူဒါန်းခဲ့ပြီး အလှူရှင်ကိုဌေး(စင်ဒရဲလားဆိုင်)မှ ငွေကျပ်သိန်း(၂၀)၊ ကျောင်းသား/သူဟောင်းများမှ ငွေကျပ်သိန်း(၄၀)၊ စုစုပေါင်းငွေကျပ်(၁၆၈)သိန်းဖြင့် မတည်ဆောင်ရွက်ခဲ့ သဖြင့် ရွေပါရမီစာကြည့်တိုက် ဖွင့်လှစ်နိုင်ခဲ့သည့်အတွက် အထူးဝမ်းမြောက်ပီတိဖြစ်မိပါကြောင်း ပြောကြားသွားသည်။

ထို့နောက် အမှတ်(၁၁)ကျောင်း ကျောင်းအုပ်ဆရာမကြီးမှ ကျေးဇူးတင်စကား‌ပြောကြားပြီး ကျောင်းသားကျောင်းသူ ဟောင်းများက စာကြည့်တိုက်ဖြစ်ပေါ်လာပုံနှင့် ရွေပါရမီစာကြည့်တိုက်အတွက် ဝမ်းသာပီတိစကားများ ပြောကြားကြသည်။

၎င်းနောက် ဆရာတော်အရှင်ဆန္ဒဓိကမှ ရွေပါရမီစာကြည့်တိုက်အကြောင်းနှင့် စာဖတ်ခြင်း အကျိုးကျေးဇူးများကို ရှင်းလင်းပြီး အလှူငွေများ ပေးအပ်လှူဒါန်းရာ ရှမ်းပြည်နယ်အစိုးရအဖွဲ့မှ အလှူငွေကျပ်(၁၀)သိန်းကို ပြည်နယ်ဝန်ကြီးချုပ် ဒေါက်တာလင်းထွဋ်မှ ပေးအပ်လှူဒါန်းပေးခြင်း၊ ရှမ်းပြည်နယ်အမျိုးသမီး‌ရေးရာအဖွဲ့မှ အလှူ‌ငွေကျပ်(၁)သိန်းကို နာယက ဒေါ်နန်းရွေမြင့်နှင့် အဖွဲ့ဝင်များက ပေးအပ်လှူဒါန်းပေးကြရာ အလက(၁၁) ကျောင်းသားဟောင်းမှ လက်ခံရယူပြီး စာကြည့်တိုက်ခန်းမအတွင်း လှည့်လည်ကြည့်ရှုကြကြောင်း သိရှိရသည်။

မောင်မောင်သန်း(တောင်ကြီး)

09250132943

 

More Articles...

  1. ကမ္ဘာ့လေဖြတ်ရောဂါကာကွယ်ရေးနေ့(World Stroke Day)အထိမ်းအမှတ်ကျင်းပ
  2. တောင်ကြီးမြို့၌ အပြည်ပြည်ဆိုင်ရာ သဘာဝဘေးအန္တရာယ် ထိခိုက်ဆုံးရှုံးနိုင်ခြေလျှော့ချရေးနေ့ အထိမ်းအမှတ်ကျင်းပ
  3. ကျွန်း/သစ်မာ(သစ်လုံး/သစ်ခွဲသား)များအား ဒေသဖွံ့ဖြိုးရေးလုပ်ငန်းများ၊ သစ်အခြေခံအသေးစား၊ အငယ်စားနှင့် အလတ်စားလုပ်ငန်းများသို့ (ဒေသ)အိတ်ဖွင့်လေလံစနစ်ဖြင့် ရောင်းချခြင်း
  4. ဆေးလိပ်ငွေ့ကင်းစင် ရှမ်းပြည်ပြည်တစ်ခွင်အထိမ်းအမှတ် ကျောင်းအခြေပြုစက်ဘီးစီးနင်း
  5. shanstate.gov.mm@gmail.comဆေးလိပ်ငွေ့ကင်းစင် ရှမ်းပြည်တစ်ခွင် အထိမ်းအမှတ် ကျောင်းအခြေပြု မီနီမာရသွန်ပြိုင်ပွဲကျင်းပ
  6. တောင်ကြီးမြို့ တန်ဆောင်တိုင်ပွဲတော်ကျင်းပရေး လုပ်ငန်းညှိနှိုင်းအစည်းအဝေး အမှတ်စဉ်(၂/၂၀၁၉)ကျင်းပ
  7. ရှမ်းပြည်နယ် မြေလွတ်၊ မြေလပ်နှင့်မြေရိုင်းများ စီမံခန့်ခွဲရေးလုပ်ငန်းကော်မတီ အစည်းအဝေးကျင်းပ
  8. မြန်မာနိုင်ငံအတွင်း ယာဉ်မတော်တဆဖြစ်ပွားမှုအန္တရာယ်ကြောင့် ပြည်သူတို့၏အသက်နှင့် လူမှုစီးပွားဆုံးရှုံးမှု၊ ဒဏ်ရာရရှိမှုများပြား
  9. ကမ္ဘာ့ဆရာများနေ့ တောင်ကြီးမြို့၌ကျင်းပ
  10. ရွှေ(၅)၊ ငွေ(၄)၊ ကြေး(၄)ရရှိအောင် ဆွတ်ခူးပေးနိုင်သည့် အားကစားသမားများကို ဂုဏ်ပြု

Subcategories

မူလသို့

အစိုးရအဖွဲ့

သတင်းများ

ဆက်သွယ်ရန်

တိုင်းရင်းသား လူမျိုးများ

tine-linlyရှမ်းပြည်နယ်(အရှေ့ပိုင်း) ကျိုင်းတုံ၊ မိုင်းလားနှင့် မိုင်းပြင်းမြို့နယ်များတွင် အများဆုံး နေထိုင်ကြပါသည်။

We have 94 guests and no members online