သစ်သီးအလှပုံဖော်နှင့် ပန်းအလှထိုးနည်း သင်တန်းဖွင့်လှစ်

တောင်ကြီး စက်တင်ဘာ   -   ၁၀

638

   ရှမ်းပြည်နယ်အမျိုးသမီးရေးရာအဖွဲ့မှ ကြီးမှူးကျင်းပသည့် သစ်သီးအလှပုံဖော်နှင့် ပန်းအလှထိုးနည်းသင်တန်းကို စက်တင်ဘာ(၁၀)ရက် နံနက်(၉)နာရီက တောင်ကြီးမြို့၊ ပြည်နယ်အမျိုးသမီးရေးရာအဖွဲ့ရုံး၌ ကျင်းပကြောင်းသိရသည်။

   သစ်သီးအလှပုံဖော်နှင့် ပန်းအလှထိုးနည်းသင်တန်းကို ပြည်နယ်/ ခရိုင်၊ မြို့နယ်အဆင့်ဌာနဆိုင်ရာများမှ အမျိုးသမီး ဝန်ထမ်း(၃၅)ဦးတက်ရောက်ပြီး၊ ရှမ်းပြည်နယ်အမျိုးသမီးရေးရာအဖွဲ့၊ ယဉ်ကျေးမှုလုပ်ငန်းအဖွဲ့ခွဲ ခေါင်းဆောင် ဒေါ်နန်းခမ်းလွင်နှင့် အဖွဲ့များက အနီးကပ်ကြီးကြပ်၍ အခြေခံရက်တို သင်တန်းသင်ကြားပို့ချလျှက်ရှိပြီး၊ သင်တန်းတွင် ပြိုင်ပွဲများပြုလုပ်ပေး၍ ဆုများချီးမြှင့်ပေးသွားမည်ဖြစ်ကြောင်းနှင့် သင်တန်းကို စက်တင်ဘာ(၁၀)ရက်မှ (၁၂)ရက်ထိ သင်ကြားပို့ချပေးသွား မည်ဖြစ်ကြောင်းသိရသည်။

   သစ်သီးအလှပုံဖော်နှင့် ပန်းအလှထိုးနည်းသင်တန်းကို (၂၀၀၅)ခုနှစ်မှ စတင်၍ ဝါတွင်းကာလနှင့် ဝါကျွတ်ကာလများ တွင် သင်တန်းများကို ရက်တို၊ ရက်ရှည် သင်ကြားပို့ချလျှက်ရှိပြီး၊ တောင်ကြီးခရိုင်ရှိမြို့နယ်များကိုလည်း ဆင့်ပွား သင်တန်းများ၊ ရပ်ကွက်ကျေးရွာနှင့် စာသင်ကျောင်းများ၊ ဌာနဆိုင်ရာများတွင်လည်း သင်ကြားပို့ချပေးလျှက်ရှိကြောင်း၊ သင်တန်းမှ အတတ်ပညာရရှိသူများသည် မင်္ဂလာပွဲ၊ အလှူပွဲများ၊ သာရေး၊ နာရေးတို့တွင် ပန်းအလှထိုးခြင်း၊ သစ်သီးအလှ ပုံဖော်ခြင်းဖြင့် ကုသိုလ်ပါဝင်ယူဆောင်ရွက်ပေးလျှက်ရှိကြောင်း၊ ရှမ်းပြည်နယ်အမျိုးသမီးရေးရာအဖွဲ့၊ ယဉ်ကျေးမှုလုပ်ငန်း အဖွဲ့ခွဲ ခေါင်းဆောင်ဒေါ်နန်းခမ်းလွင်က ပြောကြားသွားကြောင်းသိရှိရသည်။

                                                                  မောင်မောင်သန်း(တောင်ကြီး)